ବଡବିଲ,୨।୫(ଦେବପ୍ରିୟ ରଣା): କେନ୍ଦୁଝର ଜିଲା ବଡବିଲ ପୌରାଞ୍ଚଳ ଉପକଣ୍ଠରେ ଥିବା ଆରିୟା ଆଇରନ୍ ଆଣ୍ଡ ଷ୍ଟିଲ କମ୍ପାନୀ ପ୍ରାଇଭେଟ ଲିମିଟେଡ କମ୍ପାନୀର ପ୍ଲାଣ୍ଟ ସ୍ଥିତ ଆକାଉଣ୍ଟ କାର୍ଯ୍ୟାଳୟରେ ଅଗ୍ନିକାଣ୍ଡ ଘଟି ବହୁ ମୂଲ୍ୟବାନ ସାମଗ୍ରୀ ସହ ଗୁରୁତ୍ୱପୂର୍ଣ୍ଣ କାଗଜପତ୍ର ଜଳି ପୋଡି ଛାରଖାର ହୋଇଯାଇଛି।
ମିଳିଥିବା ସୂଚନା ମୁତାବକ, ବୁଧବାର ଶ୍ରମିକ ଦିବସ ଯୋଗୁ ପ୍ଲାଣ୍ଟ ଓ କାର୍ଯ୍ୟାଳୟ ବନ୍ଦ ରହିଥିଲା। ହେଲେ ହଠାତ ଆକାଉଣ୍ଟ କାର୍ଯ୍ୟାଳୟର ଏସି(ଏୟାର କଣ୍ଡିସନର) ଲାଗିଥିବା ଝରକା ବାହାରପଟୁ ଧୂଆଁ ବାହାରୁଥିବା ଜଣେ ସୁରକ୍ଷା କର୍ମୀ ଦେଖିବାକୁ ପାଇ କାର୍ଯ୍ୟାଳୟରେ ନିଆଁ ଲାଗିଯାଇଥିବା ଆଶଙ୍କା କରିଥିଲେ। ଏ ନେଇ ସୁରକ୍ଷାକର୍ମୀ ଜଣକ ତୁରନ୍ତ ପ୍ଲାଣ୍ଟ କର୍ତ୍ତୃପକ୍ଷଙ୍କୁ ଖବର ଦେଇଥିଲେ। ତେବେ ପ୍ଲାଣ୍ଟ ପକ୍ଷରୁ ଏ ନେଇ ଅଗ୍ନିଶମ ବିଭାଗକୁ ସୂଚନା ଦିଆଯାଇଥିବା ବେଳେ ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ଦୀର୍ଘ ଘଣ୍ଟା ଧରି ଅକ୍ଳାନ୍ତ ପରିଶ୍ରମ ପରେ ନିଆଁକୁ ଆୟତ୍ତ କରିବାକୁ ସକ୍ଷମ ହୋଇଥିଲେ।
ଅଗ୍ନି କାଣ୍ଡରେ କାର୍ଯ୍ୟାଳୟରେ ଥିବା ବିଭିନ୍ନ ମୂଲ୍ୟବାନ ସାମଗ୍ରୀ ମଧ୍ୟରେ ଏସି, ଜେରକ୍ସ ମେଶିନ ଓ ଆସବାବପତ୍ର ସହ ବହୁ ଗୁରୁତ୍ୱପୂର୍ଣ୍ଣ କାଗଜପତ୍ର ଜଳିପୋଡି ଛାରଖାର ହୋଇଯାଇଥିବା ଜଣାପଡିଛି। ତେବେ ନିଆଁ କିଭଳି ଲାଗିଲା ତାହା ଏଯାଏଁ ସ୍ପଷ୍ଟ ହୋଇପାରି ନ ଥିବାବେଳେ ଶର୍ଟ ସର୍କିଟ ଯୋଗୁ ନିଆଁ ଲାଗିଥିବା ଅନୁମାନ କରାଯାଇଛି।