କୋରୁକୋଣ୍ଡା,୨୩।୧(ଡି.ଏନ.ଏ): ମାଲକାନାଗିରି ଜିଲା କୋରୁକୋଣ୍ଡା ବ୍ଲକ ସଦର ମଉଳି ମା’ ଛକଠାରେ ଥିବା ଏକ ସାଇକେଲ ମରାମତି ଦୋକାନରେ ନିଆଁ ଲାଗି ପ୍ରାୟ ୫୦ହଜାର ଟଙ୍କାରୁ ଊର୍ଦ୍ଧ୍ୱ ଜିନିଷ ପତ୍ର ପୋଡି ନଷ୍ଟ ହୋଇଯାଇଛି। ସୂଚନାନୁଯାୟୀ, କୋରୁକୋଣ୍ଡା ନିକଟ ଏମ୍ଭି-୩୧ ଗ୍ରାମର ସହଦେବ ବିଶ୍ୱାସ ବହୁଦିନ ଧରି କୋରୁକୋଣ୍ଡା ଏକ ସାଇକେଲ ମରାମତି ଦୋକାନ କରି ପରିବାର ପ୍ରତି ପୋଷଣ କରୁଛନ୍ତି। ସୋମବାର ସାପ୍ତାହିକ ହାଟ ଥିବାରୁ ସାଇକେଲ ମରାମତି ପାଇ ଗ୍ରାହାକମାନେ ଭିଡ଼ ଥିବାବେଳେ ହଠାତ୍ ଘର ଭିତରୁ ଧୁଆଁ ବାହାରିଥିଲା। ଏହା ଦେଖି ସହଦେବ ଘର ଭିତରକୁ ଯାଇ ଦେଖିଲେ କି ଭିତର ଘରେ ନିଆଁ ଲାଗିଯାଇଛି। କିଛି ଉପାୟ ନ ପାଇ ସହଦେବ ବାହାରକୁ ଆସି ପାଟି କରିବାରୁ ସ୍ଥାନୀୟ ଲୋକେ କୋରୁକୋଣ୍ଡା ଦମକଳ କେନ୍ଦ୍ରକୁ ଯୋଗାଯୋଗ କରିଥିଲେ। ଖବରପାଇ ଦମକଳବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିବାକୁ ଚେଷ୍ଟା କରିଥିଲେ। ହେଲେ ଘର ଭିତରେ ବିଦ୍ୟୁତ୍ ସଂଯୋଗ ହୋଇଥିବା କାରଣରୁ ଘର ଭିତରକୁ କେହି ଯିବାକୁ ସାହସ କରିନଥିଲେ। ପରେ ବିଦ୍ୟୁତ ସଂଯୋଗ ବିଚ୍ଛିନ୍ନ ହେବାପରେ ଦମକଳବାହିନୀ ଘର ଭିତରକୁ ଯାଇ ନିଆଁକୁ ଆୟତ୍ତ କରିବାରେ ସଫଳ ହୋଇଥିଲେ। ଶଟ୍ ସର୍କିଟ ଯୋଗୁ ନିଆଁ ଲାଗିଥିବା ଅନୁମାନ କରାଯାଉଥିବା ବେଳେ ନିଆଁ ଲାଗିବାର ପ୍ରକୃତ କାରଣ ଜଣାପଡ଼ିନାହିଁ।
