ବୋଲଗଡ଼,୨୪ା୪(ଡି.ଏନ୍.ଏ.): ଗ୍ରୀଷ୍ମପ୍ରବାହ ଜାରି ରହିଥିବା ବେଳେ ଖୋର୍ଦ୍ଧା ରେଞ୍ଜ୍ ବୋଲଗଡ଼ ବନପାଳ ଅଧୀନ ପାଞ୍ଚଗଡ଼ ସଂରକ୍ଷିତ ଜଙ୍ଗଲରେ ରବିବାର ନିଆଁ ଲାଗି ପ୍ରାୟ ଅଢ଼େଇ ଏକର ପରିମିତ ଅଞ୍ଚଳର ବୃକ୍ଷଲତା ଜଳିଯାଇଛି। ବୋଲଗଡ଼ ପଞ୍ଚାୟତ ମରଦାବାଡ଼ି ଗ୍ରାମ ନିକଟ ଜଙ୍ଗଲରେ ନିଆଁ ଲାଗିଥିବା ଖବର ପାଇ ବନପାଳ ପ୍ରଦୀପ ପଟ୍ଟନାୟକଙ୍କ ସମେତ ବିଭାଗୀୟ କର୍ମଚାରୀ ପହଞ୍ଚି ଅଗ୍ନିଶମ ବିଭାଗକୁ ଜଣାଇଥିଲେ। ପରେ ଅଗ୍ନିଶମ ଓ ବନ ବିଭାଗ କର୍ମଚାରୀଙ୍କ ମିଳିତ ଉଦ୍ୟମରେ ନିଆଁକୁ ଆୟତ୍ତ କରିବାକୁ ଉଦ୍ୟମ ଚାଲୁ ରହିଛି। ନିଆଁ ସମ୍ପୂର୍ଣ୍ଣ ଲିଭି ନ ଥିବା ବେଳେ ବହୁ ମୂଲ୍ୟବାନ ଗଛ ଜଳିଯାଇଛି। ସେହିପରି ଏହି ବ୍ଲକର ଡାବରଧୁଆ ପଞ୍ଚାୟତ ଅନ୍ତର୍ଗତ କପାସିଆ ନୂଆସାହି ନିକଟ ବେଲପଦର ରାସ୍ତାପାଶର୍ବ ଜମିରେ ଥିବା ଶୁଖିଲା ଘାସବୁଦାରେ ନିଆଁ ଲାଗି ଭୟଙ୍କର ପରିସ୍ଥିତ ଉପୁଜିଥିଲା। ଏଥିରେ ପ୍ରାୟ ଦୁଇ ଏକର ଜମି ଜଳୁଥିବା ବେଳେ ପବନ ଯୋଗୁ ନିକଟ କପାସିଆ ଗ୍ରାମ ନୂଆସାହିର ଏକ ବାଡ଼ରେ ନିଆଁ ଲାଗିଯାଇଥିଲା। ୫୭ ନମ୍ବର ଜାତୀୟ ରାଜପଥ ଧୂଆଁମୟ ହେବା ସହ କିଛି ସମୟ ଯାନବାହନ ଅଟକି ରହିଥିଲା। ଖବର ପାଇ ବୋଲଗଡ଼ ଅଗ୍ନିଶମ କର୍ମଚାରୀ ପହଞ୍ଚି ନିଆଁକୁ ଆୟତ୍ତ କରିବା ପରେ ପରିସ୍ଥିତି ସ୍ବାଭାବିକ ହୋଇଥିଲା।