ଭବାନୀପାଟଣା,୧୬।୪(ସ୍ବ.ପ୍ର.): କଳାହାଣ୍ଡି ଜିଲାରେ ଗତ କିଛି ଦିନ ହେବ ପ୍ରବଳ ଗ୍ରୀଷ୍ମ ପ୍ରବାହ ଜାରି ରହିଛି। ଏପରି ପରିସ୍ଥିତିରେ ଜିଲାର ବିଭିନ୍ନ ସ୍ଥାନରେ ଥିବା ଜଙ୍ଗଲ ଗୁଡିକରେ ନିଆଁ ଲାଗୁଥିବା ସୂଚନା ମିଳିଛି। ଜିଲାର ଉତ୍ତର ଡିଭିଜନରେ ଶୁକ୍ରବାର ୨୭ ଗୋଟି ସ୍ଥାନ ରେ ନିଆଁ ଲାଗି ଯାଇଥିଲା। ତେବେ ରାତି ସୁଦ୍ଧା ବିଭିନ୍ନ ଜଙ୍ଗଲରେ ଲାଗିଥିବା ନିଆଁକୁ ଆୟତ୍ତ କରାଯାଇଥିବା ଉତ୍ତର ବନଖଣ୍ଡ ଅଧିକାରୀ ଅନୁରାଗ ମିଶ୍ର ସୂଚନା ଦେଇଛନ୍ତି। ପ୍ରବଳ ତାତି ଏବଂ ଅନ୍ୟାନ୍ୟ କାରଣରୁ ଶୁକ୍ରବାର ଜିଲାର ମଦନପୁର ରାମପୁର ଡିଭିଜନର ଜୁରାଖମନ, ମଦନପୁର ଜଙ୍ଗଲରେ ବଡଧରଣର ନିଆଁ ଲାଗିଥିଲା। ସେହିପରି ଭବାନୀପାଟଣା ଡିଭିଜନ ଥୁଆପଦର ଗୁଣ୍ଡି ଜଙ୍ଗଲ ଏବଂ ଭଟାଙ୍ଗପଦର ଜଙ୍ଗଲରେ ମଧ୍ୟ ନିଆଁ ଲାଗିଥିବା ବେଳେ ନିଆଁକୁ ଆୟତ୍ତ କରାଯାଇଛି। ଏହାସହିତ ସାଉଥ ଡିଭିଜନ ଅଧୀନରେ ଥିବା ଗୋଲାମୁଣ୍ଡା ବ୍ଲକର ଗରଗାବ, ଦଶପୁର, ବୋର୍ଡା, କେଗାଁ ସମେତ ଧର୍ମଗଡ ରେଞ୍ଜ ଅଧୀନରେ ଥିବା ଆମପାଣି ସେକ୍ସନର ସାହାଜଖୋଲ ଜଙ୍ଗଲରେ ନିଆଁ ଲାଗିଥିଲା। ଏହାକୁ ବନବିଭାଗ ଅଧିକାରୀ ଏବଂ କର୍ମଚାରୀମାନଙ୍କ ତତ୍ତ୍ୱାବଧାନରେ ଆୟତ୍ତ କରାଯାଇଛି।