ଢେଙ୍କାନାଳ ଅଫିସ,୧୩।୯: ଢେଙ୍କାନାଳ ଜିଲା ଗଦିଆଁ ଅଗ୍ନିଶମ କେନ୍ଦ୍ର କର୍ମଚାରୀ ଜୟନ୍ତ ଧାରୁଆ ସୋମବାର ବିଳମ୍ବିତ ରାତିରେ ଅଗ୍ନିଶମ କେନ୍ଦ୍ର ଛାତ ଉପରୁ ପଡ଼ି ମୃତ୍ୟୁବରଣ କରିଛନ୍ତି। ସେ ରାତିରେ ନିଜ କାର୍ଯ୍ୟ ସାରିବା ପରେ ସାଥିମାନଙ୍କ ସହ କ୍ୟାରମ୍ ଖେଳୁଥିଲେ। ହଠାତ୍ ଅଧା ଖେଳରୁ ଉଠି ସେ ପଳାଇଥିଲେ। ଏହା ପରେ ଏକ ଶବ୍ଦ ଶୁଣି ଅନ୍ୟ କର୍ମଚାରୀମାନେ ଯାଇ ଦେଖିବା ବେଳକୁ ଜୟନ୍ତ ତଳେ ପଡିଯାଇଛନ୍ତି। କେନ୍ଦ୍ର ଅଧିକାରୀ ଓ ସାଥି କର୍ମଚାରୀମାନେ ତୁରନ୍ତ ତାଙ୍କୁ ଏକ ଗାଡିରେ ନିକଟସ୍ଥ ଶ୍ରୀରାମଚନ୍ଦ୍ର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ନେଇଥିଲେ। ପରେ ଗୁରୁତର ହେବାରୁ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି। ସୂଚନାଯୋଗ୍ୟ, ଜୟନ୍ତ ଦେଢ଼ବର୍ଷ ହେଲା ଗଦିଆଁ ଅଗ୍ନିଶମ କେନ୍ଦ୍ରରେ ଯୋଗ ଦେଇଥିଲେ। ତାଙ୍କ ଘର ବରଗଡ଼ ଜିଲା ପଦ୍ମପୁର ଥାନା ଅଞ୍ଚଳରେ ହୋଇଥିବା ବେଳେ ସେ ଅଧିକାଂଶ ସମୟରେ ଚିନ୍ତାଗ୍ରସ୍ଥ ରହୁଥିଲେ ବୋଲି ଅଗ୍ନିଶମ ଅଧିକାରୀ ଅକ୍ଷୟ ପ୍ରଧାନ କହିଛନ୍ତି। ଅନ୍ୟପଟେ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିବା ସହ ବ୍ୟବଚ୍ଛେଦ ପାଇଁ ପଠାଇଛି। ଏଥିସହ ଘଟଣାର ତଦନ୍ତ ଜାରି ରହିଛି।