ବରଗଡ଼ ଅଫିସ,୧୫।୫: ବରଗଡ଼ ଜିଲା ଭଟଲି ବ୍ଲକ ମୁରୁମକେଲ ଗ୍ରାମରେ ଶନିବାର ଜ୍ବଳନ୍ତା ବିଦ୍ୟୁତ୍ ଟ୍ରାନ୍ସଫର୍ମରରୁ ଅର୍ଦ୍ଧଦଗ୍ଧ ଅବସ୍ଥାରେ ଜଣେ ଯୁବକଙ୍କୁ ଭଟଲି ଅଗ୍ନିଶମ ବିଭାଗ କର୍ମଚାରୀମାନେ ଉଦ୍ଧାର କରି ଥିଲେ। ପରେ ଅଗ୍ନିଶମ କର୍ମଚାରୀ ନିଜ ଗାଡିରେ ଆହତ ଯୁବକଙ୍କୁ ଜିଲା ମୁଖ୍ୟ ଚିକତ୍ସାଳୟରେ ଭର୍ତ୍ତି କରି ମାନବିକତାର ପରିଚୟ ଦେଇଛନ୍ତି । ଆହତ ଯୁବକ ଜଣକ ହେଲେ, ଭଡିଗାଁ ପଞ୍ଚାୟତ ମୁରୁମକେଲ ଗ୍ରାମର ସମୀର ଖମାରୀ (୨୭) ।
ସମୀର କୌଣସି କାରଣରୁ ବିଦ୍ୟୁତ୍ ଟ୍ରାନ୍ସଫୋର୍ମର ଉପରକୁ ଚଢିଥିଲେ। ସେଠାରେ ତାଙ୍କୁ କରେଣ୍ଟ ଲାଗି ଦେହରେ ନିଆଁ ଲାଗିଯାଇଥିଲା। କିଛି ଯୁବକ ଏହା ଦେଖି ବିଦ୍ୟୁତ୍ ବିଭାଗକୁ ଫୋନ କରି ଲାଇନ କଟାଇଥିଲେ। ପରେ ଭଟଲି ଅଗ୍ନିଶମ ବିଭାଗକୁ ଫୋନ କରି ସୂଚନା ଦେଇଥିଲେ। ଅଫିସର ଇନ୍ଚାର୍ଜ ରବୀନ୍ଦ୍ର କେତନ ସାହୁଙ୍କ ନେତୃତ୍ୱରେ ଅଗ୍ନିଶମ ବିଭାଗ ଏକ ଟିମ୍ ପହଞ୍ଚି ସାହସିକତାର ସହିତ ଜ୍ବଳନ୍ତା ଟ୍ରାନ୍ସଫର୍ମରରୁ ଯୁବକଙ୍କୁ ଉଦ୍ଧାର କରିଥିଲେ। ପରେ ଆମ୍ବୁଲାନ୍ସକୁ ଫୋନ କରିଥିଲେ । ତେବେ ଅମ୍ବୁଲାନ୍ସ ଆସିବା ବିଳମ୍ବ ହେବାରୁ ନିଜ ଗାଡ଼ିରେ ଅଗ୍ନିଶମ କର୍ମଚାରୀମାନେ ତାଙ୍କୁ ବରଗଡ ଜିଲା ମୁଖ୍ୟ ଚିକତ୍ସାଳୟକୁ ଆଣିଥିଲେ । ପ୍ରାଥମିକ ଚିକତ୍ସା ପରେ ତାଙ୍କୁ ଭୀମସାର, ବୁର୍ଲାକୁ ସ୍ଥାନାନ୍ତର କରାଯାଇଥିଲା। ଜିଲା ମୁଖ୍ୟ ଚିକତ୍ସାଲୟରୁ ସଂକଲ୍ପ ପରିବାରର ସଦସ୍ୟ ବିକାଶ ଅଗ୍ରୱାଲ ଓ ନିଧାନ ଦନ୍ତା ସଂକଲ୍ପ ରଥ ସାହାଯ୍ୟରେ ତାଙ୍କୁ ବୁର୍ଲ୍ଲା ପହଞ୍ଚାଇଥିଲେ। ଯୁବକଙ୍କ ବାମହାତ ଜଳିଯାଇଛି। ଭଟଲି ଅଗ୍ନିଶମ ବିଭାଗର ଭାରପ୍ରାପ୍ତ ଅଗ୍ନିଶମ ଅଧିକାରୀ ରବୀନ୍ଦ୍ର କେତନ ସାହୁଙ୍କ ନେତୃତ୍ୱରେ ଆଗ୍ନିକ ଚିରଞ୍ଜିବି ଦାଶ, ସୌମେତ୍ରି ମଲ୍ଲିକ, ରଞ୍ଜନ ଖଡ଼ିଆ, ଦୀପକ ମିନଜ଼, ପ୍ରଦୀପ କୁମାର ଫାଟକାର ପ୍ରମୁଖ ଉଦ୍ଧାର କାର୍ଯ୍ୟରେ ନିୟଜିତ ହୋଇଥିଲେ।