ଅମରପାଲି,୧୨।୩(ଡି.ଏନ୍.ଏ.): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅଧ୍ୟକ୍ଷ ପାଇଁ ଶନିବାର ନିର୍ବାଚନ ଅନୁଷ୍ଠିତ ହୋଇଯାଇଛି। ଶାନ୍ତି ଲୁହା ବ୍ଲକ ଅଧ୍ୟକ୍ଷା ଭାବେ ନିର୍ଦ୍ୱନ୍ଦ୍ୱରେ ନିର୍ବାଚିତ ହୋଇଛନ୍ତି। ପ୍ରଥମ ବ୍ଲକ ମହିଳା ଅଧ୍ୟକ୍ଷା ଭାବେ ସେ ନିର୍ବାଚିତ ହୋଇଛନ୍ତି।
ସ୍ଥାନୀୟ ବ୍ଲକ ସଭାଗୃହରେ ହୋଇଥିବା ନିର୍ବାଚନରେ ବ୍ଲକର ସମସ୍ତ ୧୫ଜଣ ସମିତି ସଭ୍ୟାସଭ୍ୟ ଉପସ୍ଥିତ ଥିଲେ। ତରଭା ବିଡିଓ ବିଜୟ କୁମାର ପଟେଲ ନିର୍ବାଚନ ଅଧିକାରୀ ଭାବେ ପରିଚାଳନା କରିଥିଲେ। ବୀରମହାରାଜପୁର ତହସିଲଦାର ବିବୁଧ ଗଡ଼ନାୟକ ଓ ଏବିଡିଓ ପୁରୁଷୋତ୍ତମ ଧରୁଆ ନିର୍ବାଚନ ପରିଚାଳନା କରିଥିଲେ। ନୂତନ ବ୍ଲକ ଅଧ୍ୟକ୍ଷା ଶାନ୍ତି ଲୁହା ଲୁତୁରପଙ୍କ ପଞ୍ଚାୟତରୁ ସମିତି ସଭ୍ୟ ଭାବେ ନିର୍ଦ୍ୱନ୍ଦ୍ୱରେ ନିର୍ବାଚିତ ହୋଇଥିଲେ। ବ୍ଲକ ଅଧ୍ୟକ୍ଷା ଭାବେ କେବଳ ଶାନ୍ତି ଲୁହା ନାମାଙ୍କନ ଦାଖଲ କରିଥିଲେ। ନିର୍ବାଚିତ ବ୍ଲକ ଅଧ୍ୟକ୍ଷା ବର୍ତ୍ତମାନ ଜିଲା ମହିଳା ବିଜେଡି ସମ୍ପାଦିକା ଅଛନ୍ତି। ତାଙ୍କ ସ୍ବାମୀ ନାରାୟଣ ଲୁହା ମଧ୍ୟ ବୀରମହାରାଜପୁର ବ୍ଲକ ଯୁବ ବିଜେଡିର ସଭାପତି ଅଛନ୍ତି। ସେ ମଧ୍ୟ ଉଫୁଲା ପଞ୍ଚାୟତରୁ ସମିତି ସଭ୍ୟ ଭାବେ ନିର୍ବାଚିତ ହୋଇଛନ୍ତି। ନବନିର୍ବାଚତା ଅଧ୍ୟକ୍ଷା ବୀରମହାରାଜପୁରବାସୀଙ୍କୁ ଧନ୍ୟବାଦ ଦେବା ସହିତ ଅଞ୍ଚଳର ବିକାଶ ପାଇଁ କାମ କରିବାକୁ କହିଛନ୍ତି।
