ନୂଆଦିଲ୍ଲୀ,୫।୧୨ : ଭାରତ ଅଧ୍ୟକ୍ଷତାରେ ଜି୨୦ ଶେର୍ପା ବୈଠକ ରବିବାର ରାଜସ୍ଥାନର ଉଦୟପୁରରେ ଆରମ୍ଭ ହୋଇଛି। ଆସନ୍ତା ବର୍ଷ ସେପ୍ଟେମ୍ବରରେ ନୂଆଦିଲ୍ଲୀରେ ହେବାକୁ ଥିବା ଜି୨୦ ନେତାମାନଙ୍କ ସମିଟ୍ ଲାଗି ଏହି ବୈଠକରେ କାର୍ଯ୍ୟସୂଚୀ ସ୍ଥିର ହେବ। ଏହି ୪ ଦିନିଆ ବୈଠକରେ ଗୁରୁତ୍ୱପୂର୍ଣ୍ଣ ବିଶ୍ୱ ପ୍ରସଙ୍ଗ ଉପରେ ଆଲୋଚା ହେବ।
ଭାରତର ଶେର୍ପା ଅମିତାଭ କାନ୍ତ ଜି୨୦ ଅତିଥିମାନଙ୍କୁ ଉଦୟପୁରରେ ସ୍ବାଗତ କରିଛନ୍ତି। ଭବ୍ୟ ଆତିଥେୟତା ଏବଂ ଐତିହାସିକ ବୈଭବ ପାଇଁ ରାଜସ୍ଥାନ ଜଣାଶୁଣା ହୋଇଥିବାରୁ ‘ଅତିଥି ଦେବୋ ଭବ’ ପରମ୍ପରାର ପ୍ରଦର୍ଶନ ଲାଗି ଜି୨୦ ବୈଠକର ପ୍ରତୀକାତ୍ମକ ଆରମ୍ଭ ଉଦୟପୁରରୁ ହୋଇଥିବା କାନ୍ତ କହିଛନ୍ତି। କାନ୍ତଙ୍କ ଅଧ୍ୟକ୍ଷତାରେ ଆରମ୍ଭ ହୋଇଥିବା ଶେର୍ପା ବୈଠକରେ ପ୍ରଯୁକ୍ତି ପରିବର୍ତ୍ତନ, ସବୁଜ ବିକାଶ, ମହିଳାକୈନ୍ଦ୍ରିକ ବିକାଶ, ସ୍ଥାୟୀ ବିକାଶ ଲକ୍ଷ୍ୟ (ଏସ୍ଡିଜି) କାର୍ଯ୍ୟକାରିତା ବଢ଼ାଇବା ଆଦି ପ୍ରସଙ୍ଗ ଆଲୋଚନାରେ ସ୍ଥାନ ପାଇବ।
