ଓ୍ବାଶିଂଟନ,୯ା୪: ଇଣ୍ଟରନ୍ୟାଶନାଲ ସ୍ପେସ୍ ସେଣ୍ଟର (ଆଇଏସ୍ଏସ୍) ପାଇଁ ପ୍ରଥମ ଘରୋଇ ମିଶନ୍ ଲଞ୍ଚ ହୋଇଛି। ଆମେରିକାର ଫ୍ଲୋରିଡାସ୍ଥିତ କେନେଡି ସ୍ପେସ୍ ସେଣ୍ଟରରୁ ୪ କ୍ରିଉ ମେମ୍ବରଙ୍କୁ ନେଇ ସ୍ସେ୍ସ୍ଏକ୍ସ ରକେଟ୍ ଭାରତୀୟ ସମୟ ରାତି ୮ଟା ୪୩ରେ ଟେକ୍ଅଫ୍ କରିଛି। ଉକ୍ତ ମିଶନ ପାଇଁ ଏକ୍ସିଓମ୍ ସ୍ପେସ୍ ପକ୍ଷରୁ ୪ କ୍ରିଉ ମେମ୍ବରଙ୍କୁ ଚୟନ କରାଯାଇଛି। ଏହି ମିଶନର ନାମ ‘ଏକ୍ସିଓମ୍-୧’ ରଖାଯାଇଛି। ଏଥିରେ ଆମେରିକା ମହାକାଶ ଗବେଷଣା ସଂସ୍ଥା ନାସା (ନ୍ୟାଶନାଲ ଏରୋନଟିକ୍ସ ଆଣ୍ଡ ସ୍ପେସ୍ ଆଡମିନିଷ୍ଟ୍ରେଶନ୍)ର ସହଭାଗିତା ରହିଛି। ମହାକାଶର ‘ଲୋ ଆର୍ଥ ଅର୍ବିଟ’ ରିଜିୟନ୍କୁ ବ୍ୟବସାୟୀକରଣ କରିବା ହେଉଛି ଏହି ମିଶନର ମୁଖ୍ୟ ଉଦ୍ଦେଶ୍ୟ।
ଆମେରିକା ଏବଂ ସ୍ପେନ୍ ନାଗରିକତ୍ୱ ହାସଲ କରିଥିବା ନାସାର ପୂର୍ବତନ ମହାକାଶ ଯାତ୍ରୀ ମିଶେଲ୍ ଲୋପେଜ୍-ଆଲେଗ୍ରିଆ ମିଶନର କମାଣ୍ଡିଂ କରିଛନ୍ତି। ନିର୍ଦ୍ଦିଷ୍ଟ ଦେୟ ଦେଇ ଏଥିରେ ସାମିଲ ହୋଇଥିବା ୩ ମହାକାଶ ଯାତ୍ରୀ ହେଲେ ଆମେରିକାର ରିୟଲଇଷ୍ଟେଟ୍ ଇନ୍ଭେଷ୍ଟର ଲାରି କୋନ୍ନର, କାନାଡାର ବ୍ୟବସାୟୀ ମାର୍କ ପାଥି ଏବଂ ଇସ୍ରାଏଲର ପୂର୍ବତନ ଯୁଦ୍ଧ ବିମାନ ପାଇଲଟ ଇଟାନ ଷ୍ଟିବ। ମିଶନ ଜରିଆରେ ମହାକାଶ ଯାତ୍ରୀମାନେ ମୋଟ ୨୫୦ ମାଇଲ୍ ଅର୍ଥାତ୍ ସମୁଦ୍ର ପତ୍ତନଠାରୁ ୪୦୦ କିଲୋମିଟର ଅତିକ୍ରମ କରିବେ। ମୋଟ ୧୦ଦିନିଆ ମିଶନରେ ୨୫ ମାଇକ୍ରୋ ଗ୍ରାଭିଟି ଏକ୍ସପେରିମେଣ୍ଟ ଲାଗି ମହାକାଶ ଯାତ୍ରୀମାନଙ୍କୁ ଆଇଏସ୍ଏସ୍ରେ ୮ ଦିନ ବିତାଇବାକୁ ପଡ଼ିଥିଲା। ଯିବା ଆସିବାରେ ବାକି ୨ ଦିନ ଲାଗିବ ବୋଲି ନାସା ପକ୍ଷରୁ କୁହାଯାଇଥିଲା। ମହାକାଶ ଯାତ୍ରା ପାଇଁ ନିର୍ଦ୍ଦାରିତ ଟିକେଟ ମୂଲ୍ୟ ୫୫ ମିଲିୟନ ଧାର୍ଯ୍ୟ କରାଯାଇଥିଲା।
ଇଲାନ ରାମୋନ ହେଉଛନ୍ତି ଇସ୍ରାଏଲର ପ୍ରଥମ ମହାକାଶ ଯାତ୍ରୀ। କଲମ୍ବୋର ଏକ ମହାକାଶ ମିଶନ ବେଳେ ତାଙ୍କ ମୃତ୍ୟୁ ଘଟିଥିଲା। ମିଶନରେ ସାମିଲ ହୋଇଥିବା ଷ୍ଟିବ୍ ନିଜ ବନ୍ଧୁ ଇଲାନ ରାମୋନଙ୍କୁ ଆଇଏସ୍ଏସ୍ରେ ଶ୍ରାଦ୍ଧାଞ୍ଜଳି ଅର୍ପଣ କରିବେ ବୋଲି ଏକ୍ସିଓମ୍ ସ୍ସେସ୍ର ନିର୍ଦ୍ଦେଶକ ଡେରେକ୍ ହାସମାନ୍ କହିଛନ୍ତି। ଏକ୍ସିଓମ୍ ପକ୍ଷରୁ ମୋଟ ୪ଟି ଅନ୍ତରୀକ୍ଷ ମିଶନ କରାଯିବାକୁ ଥିବାବେଳେ ନାସା ଓ ସ୍ସେ୍ସ୍ ଏକ୍ସ ଏହାର ଦ୍ୱିତୀୟ ମିଶନ ପାଇଁ ସ୍ବୀକୃତି ପ୍ରଦାନ କରିସାରିଛନ୍ତି। ଏକ୍ସିଓମ୍ କମ୍ପାନୀ ନିଜର ଘରୋଇ ସ୍ସେସ୍ ଷ୍ଟେଶନ ତିଆରି କରିବାକୁ ଯୋଜନା କରୁଛି। ୨୦୨୪ ସେପ୍ଟେମ୍ବରରେ ଏହାର ପ୍ରଥମ ମୋଡ୍ୟୁଲ ଲୋକାର୍ପିତ ହେବା କଥା ଏକ୍ସିଓମ୍ର ସଭାପତି ତଥା ସିଇଓ ମିଶେଲ ପ୍ରକାଶ କରିଛନ୍ତି। ୨୦୩୦ ପରେ ଏକ୍ସିଓମ୍ର ଆଇଏସ୍ଏସ୍ ସହ ସ୍ବାକ୍ଷରିତ ଚୁକ୍ତିନାମା ଅବଧି ଶେଷ ହେବା ପରେ ଏକ୍ସିଓମ ନିଜସ୍ବ ମହାକାଶ ମିଶନ ଲଞ୍ଚ କରିବ।