ରୋମ/ନୂଆଦିଲ୍ଲୀ,୨୯।୧୧: କରୋନା ମହାମାରୀର ଦକ୍ଷିଣ ଆଫ୍ରିକାରେ ମିଳିଥିବା ନୂଆ ଭାରିଆଣ୍ଟ ଓମିକ୍ରନ୍ର ପ୍ରଥମ ଚିତ୍ର ଜାରି କରାଯାଇଛି। କରୋନାର ଅନ୍ୟ ଭାରିଆଣ୍ଟ ତୁଳନାରେ ଓମିକ୍ରନ୍ ନିଜକୁ ଅଧିକ ପରିବର୍ତ୍ତନ କରିଥାଏ। ଏହାର ୩୦ ପ୍ରକାର ମ୍ୟୁଟେଶନ ରୂପ ରହିଛି ବୋଲି ଇଟାଲୀର ରାଜଧାନୀ ରୋମର ବମ୍ବିନୋ ଗେସୁ ହସ୍ପିଟାଲ ଚିତ୍ର ଆଧାରରେ ଏହି ସୂଚନା ପ୍ରଦାନ କରାଯାଇଛି।
ଗବେଷକ କହିଛନ୍ତି ଯେ ଚିତ୍ରରେ ସ୍ପଷ୍ଟ ଭାବରେ ଜଣାପଡୁଛି ଯେ ଡେଲ୍ଟା ଭାରିଆଣ୍ଟ ତୁଳନାରେ ଓମିକ୍ରମ ଅଧିକ ପରିବର୍ତ୍ତନଶୀଳ। ଏହା ପ୍ରୋଟିନର ଶୀର୍ଷରେ ରହିଥାଏ। ଯାହା ମାନବ କୋଷ ସହିତ ସହଜରେ ଯୋଗାଯୋଗ କରିବାକୁ ସକ୍ଷମ ହୋଇପାରିଥାଏ।
ବିଶ୍ୱ ସ୍ବାସ୍ଥ୍ୟ ସଂଗଠନ କହିଛି, ପ୍ରାଥମିକ ପ୍ରମାଣରୁ ଜଣାପଡିଛି ଯେ ଯେଉଁମାନେ ପୂର୍ବରୁ ସଂକ୍ରମିତ ହୋଇଥିଲେ ସେମାନେ ଓମିକ୍ରନ ଦ୍ୱାରା ପୁନର୍ବାର କରୋନାରେ ଆକ୍ରାନ୍ତ ହେବାର ଆଶଙ୍କା ଅଧିକ। ଏହା ସହଜରେ ଏଭଳିି ଲୋକଙ୍କୁ ସଂକ୍ରମିତ କରିବାକୁ ସକ୍ଷମ।
ଡେଲ୍ଟା ଏବଂ ଅନ୍ୟ କରୋନା ଭାରିଆଣ୍ଟ ଅପେକ୍ଷା ’ଓମିକ୍ରନ’ କେତେ ଅଧିକ ଟ୍ରାନ୍ସମିଶିବୁଲ। ଅର୍ଥାତ୍ ଜଣେବ୍ୟକ୍ତିଙ୍କଠାରୁ ଅନ୍ୟକୁ ସହଜରେ ସଂକ୍ରମିତ ହେବ ସେ ନେଇ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ବର୍ତ୍ତମାନ ପାଇଁ ଏହାର ଚିହ୍ନଟ ଆର୍ଟି-ପିସିଆର୍ ପରୀକ୍ଷା ଦ୍ୱାରା ହୋଇପାରିବ। ତେବେ ପରବର୍ତ୍ତୀ ମ୍ୟୁଟେଶନ କ୍ଷେତ୍ରରେ ଏହି ପରୀକ୍ଷା କେତେଦୂର ଉପଯୋଗୀ ହେବ ତାହା ସମୟ ହିଁ କହିବ ବୋଲି ବିଶ୍ୱ ସ୍ବାସ୍ଥ୍ୟ ସଂଗଠନ କହିଛି।
ବିଶ୍ୱସ୍ବାସ୍ଥ୍ୟ ସଂଗଠନ କହିଛି ଯେ କରୋନା ଟିକାର ପ୍ରଭାବ ଓମିକ୍ରନ ଉପରେ କେତେକ ଦୂର ପଡ଼ିବ ତାହା ଅଧିକ ପରୀକ୍ଷା ନିରୀକ୍ଷା ପରେ ଜଣାପଡ଼ିବ।
ଦକ୍ଷିଣ ଆଫ୍ରିକାରେ ଡାକ୍ତରଖାନାରେ ଲୋକଙ୍କ ଭର୍ତ୍ତି ହେବା ସଂଖ୍ୟା ବୃଦ୍ଧି ପାଇଛି। କିନ୍ତୁ ’ଓମିକ୍ରନ’ ଯୋଗୁୁ ନୁହେଁ ବରଂ ସଂକ୍ରମିତ ଲୋକଙ୍କ ସଂଖ୍ୟା ବୃଦ୍ଧି ଲାଗି ଏହା ଏଭଳି ହୋଇଥାଇପାରେ ବୋଲି ବିଶ୍ୱ ସ୍ବାସ୍ଥ୍ୟ ସଂଗଠନ କହିଛି। ଓମିକ୍ରନ ଭାରିଆଣ୍ଟଗୁଡିକର ବିପଜ୍ଜନକ ସ୍ଥିତି ସମ୍ପର୍କରେ ଜାଣିବା ଲାଗି କିଛି ଦିନରୁ ଆରମ୍ଭ କରି ବହୁ ସପ୍ତାହ ଲାଗି ଯାଇପାରେ ବୋଲି ସଂଗଠନ ପକ୍ଷରୁ କୁହାଯାଇଛି।
ଓମିକ୍ରନ ସଂକ୍ରମଣକୁ ରୋକିବା ପାଇଁ ବିଭିନ୍ନ ଦେଶ ଯଥାସମ୍ଭବ ଉଦ୍ୟମ କରୁଛନ୍ତି। ଏହି କ୍ରମରେ ଦକ୍ଷିଣ ଆଫ୍ରିକାରୁ ବିମାନ ଉଡ଼ାଣ ଉପରେ ପ୍ରତିବନ୍ଧକ ମଧ୍ୟ ଲଗାଯାଇଛି।
