ଲଣ୍ଡନ,୧୪।୧୨:ଦକ୍ଷିଣ ଆଫ୍ରିକାରେ ଚିହ୍ନଟ ହୋଇଥିବା କୋଭିଡ୍-୧୯ର ଓମିକ୍ରନ୍ ଭାରିଆଣ୍ଟ ସଂକ୍ରମଣରେ ପ୍ରଥମ ମୃତ୍ୟୁ ବ୍ରିଟେନରେ ହୋଇଛି। ବ୍ରିଟିଶ ପ୍ରଧାନମନ୍ତ୍ରୀ ବୋରିସ୍ ଜନ୍ସନ ଏହି ସୂଚନା ଦେବା ସହ ଦୁଃଖ ପ୍ରକାଶ କରିଛନ୍ତି। ଓମିକ୍ରନ୍ ସଂକ୍ରମଣ ପରେ ବ୍ରିଟେନରେ ରୋଗୀ ସଂଖ୍ୟା ବହୁତ ବଢ଼ିଯାଇଛି। ଲୋକଙ୍କୁ ତୁରନ୍ତ ବୁଷ୍ଟର ଡୋଜ୍ ନେବାକୁ ସେ ପରାମର୍ଶ ଦେଇଛନ୍ତି।
ଲଣ୍ଡନର ଏକ ଟିକାକରଣ କ୍ଲିନିକ୍କୁ ଯାଇ ବୋରିସ୍ ଲୋକଙ୍କୁ ଅଧିକ ସତର୍କ ହେବା ସହ ଓମିକ୍ରନ୍ ଏକ ସାଧାରଣ ଭାରିଆଣ୍ଟ ଏ ଧାରଣା ଭୁଲିଯିବାକୁ କହିଥିଲେ। ଚଳିତ ମାସ ଶେଷ ସୁଦ୍ଧା ୩୦ ବର୍ଷରୁ ଊର୍ଦ୍ଧ୍ୱ ସମସ୍ତେ ବୁଷ୍ଟର ଡୋଜ୍ ନେବା ଲାଗି ଲକ୍ଷ୍ୟ ଧାର୍ଯ୍ୟ କରାଯାଇଛି। ଏଥିପାଇଁ ସୋମବାରଠାରୁ ପଞ୍ଜିକରଣ ଆରମ୍ଭ ହୋଇଥିବା ବେଳେ ଲକ୍ଷାଧିକ ଲୋକ ବୁକିଂ କରିବାକୁ ଉଦ୍ୟମ କରୁଥିବାରୁ ଓ୍ବେବ୍ସାଇଟ୍ କ୍ରାସ୍ ହୋଇଛି। ଓମିକ୍ରନ୍ ସଂକ୍ରମଣ ପ୍ରତିହତ କରିବାରେ ବୁଷ୍ଟର ଡୋଜ୍ ସହାୟକ ହେବ ବୋଲି କୁହାଯାଉଛି। କାରଣ ସଂକ୍ରମଣ ରୋକିବା ଲାଗି କୋଭିଡ୍ ଭାକ୍ସିନ୍ର ଦୁଇଟି ଡୋଜ୍ ଯଥେଷ୍ଟ ନୁହେଁ ବୋଲି ପୂର୍ବରୁ ହୋଇଥିବା ଅନୁଧ୍ୟାନରେ କୁହାଯାଇଥିଲା।