ସାଉଥାମ୍ପଟନ,୨୨।୬: ଚଳିତ ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲର ୫ମ ଦିନରେ ପ୍ରଥମ ସେସନ ସମ୍ପୂର୍ଣ୍ଣ ରୂପେ ଭାରତୀୟ ପେସରଙ୍କ ନାମରେ ରହିଛି। ଖେଳ ଆରମ୍ଭ ହେବାର ପ୍ରଥମ ଘଣ୍ଟା ନ୍ୟୁଜିଲାଣ୍ଡର ଅଧିନାୟକ କେନ ଓ୍ବିଲିୟମସନ ଓ ରସ ଟେଲର ବେଶ୍ ଧୈର୍ଯ୍ୟର ସହ ଖେଳିଥିଲେ। କିନ୍ତୁ ଡ୍ରିଙ୍କ୍ସ ପରେ ବଦଳି ଯାଇଛି ମ୍ୟାଚ୍ର ସ୍ଥିତି। ଡ୍ରିଙ୍କ୍ସ ପରେ ଖେଳାଯାଇଥିବା ୮ ଓଭର ମଧ୍ୟରେ ଭାରତକୁ ମିଳିଛି ୩ ସଫଳତା।
ପ୍ରଥମେ ୬୪ତମ ଓଭରରେ ରସ ଟେଲର (୧୧)ଙ୍କୁ ଶୁବମାନ ଗିଲଙ୍କ ହାତରେ କ୍ୟାଚ୍ ଆଉଟ୍ କରି ପ୍ୟାଭେଲିଅନ ବାଟ ଦେଖାଇଥିଲେ ମହମ୍ମଦ ଶାମି। ସେହିଭଳି ହେନରୀ ନିକୋଲାସ (୭) ୬୯ତମ ଭରରେ ଇଶାନ୍ତ ଶର୍ମାଙ୍କ ଶିକାର ପାଲଟିଥିଲେ। ପରବର୍ତ୍ତୀ ଓଭରରେ କ୍ୟାରିୟରର ଅନ୍ତିମ ମ୍ୟାଚ୍ ଖେଳୁଥିବା ବି ଜେ ଓ୍ବାଟଲିଂ(୧)ଙ୍କ କାଳ ସାଜିଥିଲା ଶାମିଙ୍କ ବଲ। ଫଳରେ ପ୍ରଥମ ସେସନ ଶେଷ ସୁଦ୍ଧା ନ୍ୟୁଜିଲାଣ୍ଡ ୫ ଉଇକେଟ ହରାଇ ୧୩୫ ରନ୍ କରିଛି।