ନୂଆଦିଲ୍ଲୀ,୨୮।୧୦: ଆସନ୍ତାବର୍ଷ ଫେବୃୟାରୀରୁ ଭାରତର ମାନବ ମହାକାଶ ଅଭିଯାନ ମିଶନର ଉଡ଼ାଣ ପରୀକ୍ଷା ଆରମ୍ଭ ହେବ ବୋଲି ଭାରତୀୟ ମହାକାଶ ଗବେଷଣା ସଂସ୍ଥା (ଇସ୍ରୋ)ର ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି।
ଗଗନୟାନର କ୍ରିଉ ମଡ୍ୟୁଲ୍ ପରୀକ୍ଷା ପାଇଁ ଇସ୍ରୋ ଚିକୁନ୍ ହେଲିକପ୍ଟର ଏବଂ ସି-୧୭ ଗ୍ଲୋବ୍ମାଷ୍ଟର ପରିବହନ ବିମାନକୁ ବ୍ୟବହାର କରିବ। ଇସ୍ରୋ ହ୍ୟୁମାନ ସ୍ପେସ୍ ଫ୍ଲାଇଟ୍ ସେଣ୍ଟରର ନିର୍ଦ୍ଦେଶକ ଆର୍.ଉମାମହେଶ୍ୱରନ୍ ଏହି ସୂଚନା ଦେଇଛନ୍ତି। ଆସନ୍ତା ବର୍ଷ ଡିସେମ୍ବରରେ ମାନବବିହୀନ ସ୍ପେସ୍ ଫ୍ଲାଇଟ୍ ପାଇଁ ଇସ୍ରୋ ଅନୂ୍ୟନ ୧୭ଟି ପରୀକ୍ଷା କରାଇବା ଯୋଜନା ରଖିଛି। ସ୍ବାଧୀନତାର ୭୫ବର୍ଷ ପୂର୍ତ୍ତି ଅବସରରେ ୨୦୨୨ରେ ଗଗନୟାନ ପ୍ରେରଣ ଲକ୍ଷ୍ୟ ହାସଲ ହେବ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୨୦୧୮ ସ୍ବାଧୀନତା ଦିବସ ଭାଷଣରେ କହିଥିଲେ। ତେବେ କୋଭିଡ୍ ମହାମାରୀ ପାଇଁ ଏହି ମିଶନ ବିଳମ୍ବିତ ହୋଇଥିଲା। ୨୦୨୪ ଶେଷ କିମ୍ବା ୨୦୨୫ ଆରମ୍ଭରେ ଭାରତୀୟ ମହାକାଶଚାରୀଙ୍କୁ ନେଇ ଗଗନୟାନ ମହାକାଶକୁ ଯିବ ବୋଲି ଉମାମହେଶ୍ୱରନ୍ ଇଣ୍ଡିଆ ସ୍ପେସ୍ କଂଗ୍ରେସରେ ଉଦ୍ବୋଧନ ଦେଇ କହିଛନ୍ତି।