Pakistans batsman Faheem Ashraf plays a shot on day three of the first cricket Test match between New Zealand and Pakistan at the Bay Oval in Mount Maunganui on December 28, 2020. (Photo by MICHAEL BRADLEY / AFP) (Photo by MICHAEL BRADLEY/AFP via Getty Images)
ମାଉଣ୍ଟ ମାଉଗାନୁଇ,୨୯।୧୨(ଏପି): ଟପ୍ ଅର୍ଡର ବ୍ୟାଟ୍ସମ୍ୟାନଙ୍କ ବିଫଳତା ପରେ ନୂଆ ଟେଷ୍ଟ ଅଧିନାୟକ ମହମ୍ମଦ ରିଜ୍ଓ୍ବାନ ଓ ଫହିମ ଆଶ୍ରଫ ଲଢୁଆ ବ୍ୟାଟିଂ କରି ଘରୋଇ ନ୍ୟୁଜିଲାଣ୍ଡ ବିପକ୍ଷ ପ୍ରଥମ ଟେଷ୍ଟ ମ୍ୟାଚରେ ପାକିସ୍ତାନକୁ ଫଲୋଅନରୁ ବଞ୍ଚାଇଛନ୍ତି। ନ୍ୟୁଜିଲାଣ୍ଡ ପ୍ରଥମ ଇନିଂସରେ ୧୫୫ ଓଭରରେ ୪୩୧ ରନ କରି ଅଲ୍ଆଉଟ ହୋଇଥିଲା। ଜବାବରେ ପାକିସ୍ତାନ ପ୍ରଥମ ଇନିଂସ ଆରମ୍ଭ କରି ସୋମବାର ତୃତୀୟ ଦିନ ଖେଳ ଶେଷସୁଦ୍ଧା ୧୦୨.୨ ଓଭରରେ ୨୩୯ ରନ କରି ଅଲ୍ଆଉଟ ହୋଇଛି। ଫଳରେ ପ୍ରଥମ ଇନିଂସରେ ପାକିସ୍ତାନ ୧୯୨ ରନରେ ପଛରେ ରହିଛି। ତେବେ ପାକିସ୍ତାନ ଫଲୋଅନ ଏଡ଼ାଇବାକୁ ସକ୍ଷମ ହୋଇଛି।
ଅସମାପ୍ତ ପ୍ରଥମ ଇନିଂସ ସ୍କୋର ୩୦/୧ରୁ ଖେଳ ଆରମ୍ଭ କରି ପାକିସ୍ତାନ ସୋମବାର ତୃତୀୟ ସେସନ ଶେଷରେ ଅଲ୍ଆଉଟ ହୋଇଥିଲା। ଓଭରନାଇଟ୍ ବ୍ୟାଟ୍ସମ୍ୟାନ ତଥା ଓପନର ଆବିଦ୍ ଅଲି ୧୯ରୁ ଖେଳ ଆରମ୍ଭ କରି ୨୫ ରନକରି ପ୍ୟାଭିଲିୟନ ଫେରିଥିଲେ। ସେହିପରି ବିନା ସ୍କୋରରୁ ଖେଳ ଆରମ୍ଭ କରି ମହମ୍ମଦ ଆବାସ ୫ ରନକରି ଆଉଟ୍ ହୋଇଥିଲେ। ଏହାପରେ ଆଝାର ଅଲୀ, ହାରିସ ସୋହେଲ, ଫଓ୍ବାଦ ଆଲମ ୫, ୩ ଓ ୯ ରନ କରିଆଉଟ ହୋଇଥିଲେ। ୮୦ ରନରେ ୬ ଉଇକେଟ ହରାଇ ପାକିସ୍ତାନ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ତେବେ ସପ୍ତମ ଉଇକେଟରେ ରିଜ୍ଓ୍ବାନ ଓ ଫହିମ ଆଶ୍ରଫ୍ ୧୦୭ ରନକରି ସ୍ଥିତି ସମ୍ଭାଳିବାକୁ ପ୍ରୟାସ କରିଥିଲେ। ୫୨ ରନରେ ୫ ଉଇକେଟର ପତନ ହୋଇଥିବା ବେଳେ ରିଜ୍ଓ୍ବାନ ବ୍ୟାଟିଂ କରିବାକୁ ଆସିଥିଲେ। ୭୧ ରନ କରିଥିବା ବେଳେ ସେ ମିଚେଲ ସାଣ୍ଟନରଙ୍କ ଡାଇରେକ୍ଟ ଥ୍ରୋରେ ଦୁର୍ଭାଗ୍ୟଜନକ ଭାବେ ରନଆଉଟ ହୋଇଥିଲେ। ସେହିପରି ଫହିମ ଆଶ୍ରଫ୍ ୯୧ ରନକରି ଇନିଂସର ଶେଷ ବ୍ୟାଟ୍ସମ୍ୟାନ ଭାବେ ଆଉଟ ହେବା ସହ ଶତକ ହାସଲରୁ ବଞ୍ଚିତ ହୋଇଥିଲେ। ରିଜ୍ଓ୍ବାନ ଓ ଫହିମ ୩୦ ଓଭର କ୍ରିଜ୍ରେ ରହି ଲଢୁଆ ବ୍ୟାଟିଂ ପ୍ରଦର୍ଶନ କରିଥିଲେ। ଅନ୍ୟମାନଙ୍କ ମଧ୍ୟରେ ୟାସିର ଶାହା ୪, ଶାହିନ ଆଫ୍ରିଦି ୬ ରନ କରି ଆଉଟ ହୋଇଥିବା ବେଳେ ନସିମ ଶାହା ବିନା ସ୍କୋରରେ ଅପରାଜିତ ରହିଥିଲେ। ବୋଲିଂରେ ନ୍ୟୁଜିଲାଣ୍ଡ ତରଫରୁ କାଏଲ ଜେମିଶନ ସର୍ବାଧିକ ୩, ଟିମ ସୌଦି, ଟ୍ରେଣ୍ଟ ବୋଲ୍ଟ ଓ ନିଲ୍ ଓ୍ବାଗନର ୨ଟି ଲେଖାଏ ଉଇକେଟ ଅକ୍ତିଆର କରିଥିଲେ।
ପୂର୍ବରୁ ନ୍ୟୁଜିଲାଣ୍ଡ ପ୍ରଥମ ଇନିଂସରେ ଅଧିନାୟକ କେନ୍ ଓ୍ବିଲିୟମସନଙ୍କ ୧୨୯ ରନର ଶତକୀୟ ପାଳି ମୁଖ୍ୟ ଘଟଣା ଥିଲା। ସେହିପରି ଅଭିଜ୍ଞ ରସ୍ ଟେଲର ୭୦, ହେନେରୀ ନିକୋଲ୍ସ ୫୬, ବିଜେ ଓ୍ବାଟଲିଂ ୭୩ ରନର ଅର୍ଦ୍ଧଶତକୀୟ ପାଳି ଖେଳି ଦଳକୁ ବୃହତ୍ ସ୍କୋର ପ୍ରଦାନ କରିଥିଲେ। ବୋଲିଂରେ ପାକିସ୍ତାନ ତରଫରୁ ଶାହିନ ଆଫ୍ରିଦି ୪ ଓ ୟାସିର ଶାହା ୩ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର:
ନ୍ୟୁଜିଲାଣ୍ଡ ପ୍ରଥମ ଇନିଂସରେ ୧୫୫ ଓଭରରେ ୪୩୧ ରନରେ ଅଲଆଉଟ।
ପାକିସ୍ତାନ ପ୍ରଥମ ଇନିଂସରେ ୧୦୨.୨ ଓଭରରେ ୨୩୯ ରନରେ ଅଲଆଉଟ
(ଫହିମ ଆଶ୍ରଫ୍- ୯୧, ମହମ୍ମଦ ରିଜଓ୍ବାନ- ୭୧, ଆବିଦ ଅଲି-୨୫, ଜେମସନ- ୩/୩୫, ସୌଦି- ୨/୬୯, ବୋଲ୍ଟ- ୨/୭୧, ଓ୍ବାଗନର- ୨/୫୦)।