ନୂଆଦିଲ୍ଲୀ, ୧୫ା୧୨ (ପି.ଟି.)-ଆଡିଲେଡ୍ ଓଭାଲଠାରେ ଅଷ୍ଟ୍ରେଲିଆ ବିପକ୍ଷ ପ୍ରଥମ ଦିବା/ରାତ୍ର ଟେଷ୍ଟ ଗୁରୁବାରଠାରୁ ଖେଳାଯିବ। ଏଥିପାଇଁ ଚୂଡ଼ାନ୍ତ ଭାରତୀୟ ଏକାଦଶରେ ରିଷଭ ପନ୍ତ୍ ଓ ରିଦ୍ଧିମାନ ଶାହାଙ୍କ ମଧ୍ୟରୁ କାହାରିକୁ ନିଆଗଲେ ଭଲ ହେବ ସେଥିପାଇଁ ଟିମ୍ ମ୍ୟାନେଜମେଣ୍ଟ ମଧ୍ୟରେ ବିଚାର ଆଲୋଚନା ଚାଲିଛି। ସମ୍ଭବତଃ ଉଇକେଟ କିପିଂରେ ତୁଳନାତ୍ମକ ଭାବେ ଅଧିକ ଦକ୍ଷ ଯୋଗୁ ଚୂଡ଼ାନ୍ତ ଭାରତୀୟ ଏକାଦଶରେ ୨୩ ବର୍ଷୀୟ ପନ୍ତଙ୍କ ଅପେକ୍ଷା ୩୬ ବର୍ଷୀୟ ଅଭିଜ୍ଞ ସାହାଙ୍କୁ ଅଗ୍ରାଧିକାର ଦିଆଯାଇପାରେ। ତେବେ କୌଣସି ନିଷ୍ପତ୍ତି ନେବାପୂର୍ବରୁ କୋଚ୍ ରବି ଶାସ୍ତ୍ରୀ, ସହକାରୀ କୋଚ୍ ବିକ୍ରମ ରାଠୋର, ଭରତ ଅରୁଣ ଏବଂ ଟ୍ରାଭେଲିଂ ସିଲେକ୍ଟର ହରବିନ୍ଦର ସିଂ ମ୍ୟାଚ ବିଭିନ୍ନ ପରିସ୍ଥିତିରେ ଉଭୟ ସାହା ଓ ପନ୍ତଙ୍କ ପ୍ରଦର୍ଶନକୁ ବିଚାର କରି ଦେଖିବେ। ଅଷ୍ଟ୍ରେଲିଆ ଏ’ ବିପକ୍ଷ ପ୍ରଥମ ଟୁର୍ ମ୍ୟାଚ ବେଳେ ଭାରତ ୧୪୩/୯ ସ୍କୋରରେ ସଙ୍କଟରେ ପଡ଼ିଥିବାବେଳେ ସାହା ୫୫ ରନ ସ୍କୋର କରିଥିଲେ। ତାଙ୍କ ପରାମର୍ଶରେ ଯୁବ ଖେଳାଳି କାର୍ତ୍ତିକ ତ୍ୟାଗୀ କ୍ରିଜ୍ରେ ଧୈର୍ଯ୍ୟର ସହ ମହଜୁଦ ରହିଥିଲେ। ଉଭୟେ ଭାରତକୁ ପରାଜୟରୁ ବଞ୍ଚାଇ ଦେଇଥିଲେ। ସାହାଙ୍କୁ ସେତେବେଳେ ଜେମ୍ସ ପ୍ୟାଟିନସନ, ମାଇକେଲ ନେସେର ଏବଂ କାମେରନ ଗ୍ରୀନ୍ଙ୍କ ଭଳି ଦକ୍ଷ ବୋଲରଙ୍କୁ ସାମ୍ନା କରିବାକୁ ପଡ଼ିଥିଲା। ସେ ତୁଳନାରେ ପରେ ପିଙ୍କବଲ୍ ଡ୍ରେସ୍ ରିହରସାଲ ଯେତେବେଳେ ବ୍ୟାଟିଂ କରିବାକୁ ଆସିଥିଲେ ସେତେବେଳ ଲେଗ୍ ସ୍ପିନର ମିଚେଲ ସ୍ବେପସନ ଏବଂ ପାର୍ଟଟାଇମ୍ ବୋଲର ନିକ୍ ମାଡିନସନ ବୋଲିଂ କରୁଥିଲେ। ପନ୍ତ ଯୋଗ ଦେବାପୂର୍ବରୁ ଶୁବମନ ଗିଲ୍, ମୟଙ୍କ ଅଗ୍ରଓ୍ବାଲ ଏବଂ ହନୁମା ବିହାରୀ ଚମତ୍କାର ବ୍ୟାଟିଂ କରି ଦଳର ସ୍ଥିତିକୁ ମଜଭୁତ କରିସାରିଥିଲେ। ଦେଶ ତରଫରୁ ୩୭ଟେଷ୍ଟ ଖେଳି ସାରିଥିବା ସାହା ୧୨୩୮ରନ ସଂଗ୍ରହ କରିସାରିଥିବାବେଳେ ତାଙ୍କର ଆଭରେଜ ୩୦ରୁ ଅଧିକ ରହିଛି। ସେ ତିନୋଟି ଶତକ ମଧ୍ୟ ହାସଲ କରିଛନ୍ତି। ସେ ଉଇକେଟ ପଛରେ ଥାଇ୧୦୩ଜଣଙ୍କୁ ଆଉଟ କରିଛନ୍ତି। ତନ୍ମଧ୍ୟରେ ୯୨ କ୍ୟାଚ୍ ଓ ୧୧ ଷ୍ଟମ୍ପ୍ସ ରହିଛି। ଶାହାଙ୍କୁ ଯଦି ପ୍ରଥମ ଟେଷ୍ଟରେ ଖେଳାଯାଏ ଆଉ ପନ୍ତଙ୍କ ସମ୍ଭାବନା ନାହିଁ ବୋଲି କହିହେବ ନାହିଁ। ଚୂଡ଼ାନ୍ତ ଏକାଦଶରେ ସ୍ଥାନ ପକ୍କା କରିବାକୁ ହେଲେ ବେଙ୍ଗଲ ଷ୍ଟମ୍ପରଙ୍କୁ ପ୍ରଥମ ଟେଷ୍ଟରେ ଉଭୟ କିପିଂ ଓ ବ୍ୟାଟିଂରେ ଭଲ ପ୍ରଦର୍ଶନ କରିବାକୁ ହେବ।