ଗାଲେ,୧୭।୧(ଏ.ପି.): ଇଂଲଣ୍ଡ ଅଧିନାୟକ ଜୋ ରୁଟ୍ଙ୍କ ଚିତ୍ତାକର୍ଷକ ଦ୍ୱିଶତକ ପରେ ଦୁଇ ଓପନର କୁଶଲ ପେରେରା ଓ ଲାହିରୁ ଥିରିମାନେଙ୍କ ଲଢୁଆ ବ୍ୟାଟିଂ ବଳରେ ଶ୍ରୀଲଙ୍କା ମ୍ୟାଚକୁ ଫେରିଛି। ଏଠାରେ ଚାଲିଥିବା ଇଂଲଣ୍ଡ ବିପକ୍ଷ ପ୍ରଥମ ଟେଷ୍ଟରେ ଶ୍ରୀଲଙ୍କା ବିପର୍ଯ୍ୟୟର ସମ୍ମୁଖୀନ ହୋଇ ପ୍ରଥମ ଇିନିଂସରେ ୪୬.୧ ଓଭରରେ ୧୩୫ ରନ କରି ଅଲଆଉଟ ହୋଇଥିଲା। ଜବାବରେ ଇଂଲଣ୍ଡ ପ୍ରଥମ ଇନିଂସରେ ରୁଟ୍ଙ୍କ ଦ୍ୱିଶତକୀୟ ପାଳି ବଳରେ ୧୧୭ ଓଭରରେ ୪୨୧ ରନ କରି ଅଲଆଉଟ ହୋଇଥିଲା। ଫଳରେ ଇଂଲଣ୍ଡ ୨୮୬ ରନର ବୃହତ୍ ଅଗ୍ରଣୀ ହାସଲ କରିଥିଲା। ଏହାପରେ ଦ୍ୱିତୀୟ ଇନଂସ ଆରମ୍ଭ କରି ଶ୍ରୀଲଙ୍କା ତୃତୀୟ ଦିବସ ଖେଳ ଶେଷ ସୁଦ୍ଧା ୬୧ ଓଭରରେ ୨ ଉଇକେଟ ହରାଇ ୧୫୬ ରନ ସଂଗ୍ରହ କରିଛି। ଫଳରେ ଶ୍ରୀଲଙ୍କା ଏବେ ୮ ଉଇକେଟ ବାକିଥାଇ ୧୩୦ ରନ ପଛରେ ପଡିଛି। ଷ୍ଟମ୍ପ ଅପସାରଣ ବେଳକୁ ଓପନର ଥିରିମାନେ ୭୬ ଓ ନାଇଟ୍ ଓ୍ବାଚ୍ମ୍ୟାନ୍ ଲାସିଥ ଏମ୍ବୁଲଡେନିୟା ବିନା ସ୍କୋରରେ ଅପରାଜିତ ରହିଛନ୍ତି। ଅନ୍ୟତମ ଓପନର କୁଶଲ ପେରେରା ୬୨ ରନର ଅର୍ଦ୍ଧଶତକୀୟ ପାଳି ଖେଳି ସାମ କୁରାନଙ୍କ ବଲ୍ରେ ଜ୍ୟାକ୍ ଲିଚ୍ଙ୍କୁ କ୍ୟାଚ୍ ଦେଇ ଆଉଟ ହୋଇଥିଲେ। ଏହାପରେ ୧୫ ରନ କରିଥିବା ବେଳେ କୁଶଲ ମେଣ୍ଡିସ୍ ଲିଚ୍ଙ୍କ ବଲ୍ରେ ଉଇକେଟକିପର ଜୋଶ ବଟଲରଙ୍କୁ କ୍ୟାଚ୍ ଦେଇ ଆଉଟ ହୋଇଥିଲେ। ବୋଲିଂରେ ଇଂଲଣ୍ଡ ତରଫରୁ କୁରାନ ଓ ଲିଚ୍ ଗୋଟିଏ ଲେଖାଏ ଉଇକେଟ ଅକ୍ତିଆର କରିଥିଲେ।
ଅସମାପ୍ତ ପ୍ରଥମ ଇନିଂସ ସ୍କୋର ୩୨୦/୪ରୁ ଖେଳ ଆରମ୍ଭ କରି ଇଂଲଣ୍ଡ ଅଲ୍ଆଉଟ୍ ହୋଇଥିଲା। ଓଭରନାଇଟ୍ ବ୍ୟାଟ୍ସମ୍ୟାନ ରୁଟ୍ ୧୬୮ରୁ ଖେଳ ଆରମ୍ଭ କରି ୨୨୮ ରନର ଦ୍ୱିଶତକୀୟ ପାଳି ଖେଳି ଦିଲରୁଓ୍ବାନ ପେରେରାଙ୍କ ବଲ୍ରେ ମିଡ୍ଉଇକେଟରେ ଏମ୍ବୁଲଡେନିୟାଙ୍କୁ କ୍ୟାଚ୍ ଦେଇ ଆଉଟ ହୋଇଥିଲେ। ଏହି କ୍ରମରେ ରୁଟ୍ କ୍ୟାରିୟରର ଚତୁର୍ଥ ଟେଷ୍ଟ ଦ୍ୱିଶତକ ଅର୍ଜନ କରିଛନ୍ତି। ସେହିପରି ଓଭରନାଇଟ୍ ସ୍କୋର ୭ରୁ ଖେଳ ଆରମ୍ଭ କରି ଜୋଶ ବଟ୍ଲର ୩୦ ରନକରି ଆଉଟ ହୋଇଥିଲେ। ଅନ୍ୟମାନଙ୍କ ମଧ୍ୟରେ ଜ୍ୟାକ ଲିଚ୍ ୪, ମାର୍କ ଉଡ ୨ ରନ କରି ଆଉଟ ହୋଇଥିବା ବେଳେ ଷ୍ଟୁଆର୍ଟ ବ୍ରଡ୍ ୧୧ ରନକରି ଅପରାଜିତ ରହିଥିଲେ। ସାମ କୁରାନ ଓ ଡୋମ ବେସ୍ ଖାତା ଖୋଲିପାରି ନ ଥିଲେ। ବୋଲିଂରେ ଶ୍ରୀଲଙ୍କା ତରଫରୁ ଦିଲରୁଓ୍ବାନ ପେରେରା ସର୍ବାଧିକ ୪, ଏମ୍ବୁଲଡେନିୟା ୩, ଆସିଥା ଫର୍ନାଣ୍ଡୋ ୨ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର:
ଶ୍ରୀଲଙ୍କା ପ୍ରଥମ ଇନିଂସ-୪୬.୧ ଓଭରରେ ୧୩୫ ଅଲ୍ଆଉଟ।
ଇଂଲଣ୍ଡ ପ୍ରଥମ ଇନିଂସ- ୧୧୭.୧ ଓଭରର ୪୨୧ ଅଲ୍ଆଉଟ
(ଜୋ ରୁଟ- ୨୨୮, ଡାନ ଲରେନ୍ସ- ୭୩, ବଟଲର- ୩୦, ବେୟାରଷ୍ଟୋ- ୪୭, ପେରେରା- ୪/୧୦୯, ଏମ୍ବୁଲଡେନିୟା- ୩/୧୭୬, ଅସିଥ ଫର୍ନାଣ୍ଡୋ- ୨/୪୪)।
ଶ୍ରୀଲଙ୍କା ଦ୍ୱିତୀୟ ଇନିଂସ: ୬୧ ଓଭରରେ ୧୫୬/୨
(ପେରେରା- ୬୨, ଥିରିମାନେ- ୭୬*, କୁରାନ- ୧/୨୫, ଲିଚ୍-୧/୬୭)।