ଯାଜପୁର ଅଫିସ,୧୧ା୪: ଯାଜପୁର ଜିଲା ଦାନଗଦି ବ୍ଲକ ଅଧୀନ ବହୁ ଗ୍ରାମର ବାସିନ୍ଦା ପ୍ରଦୂଷଣ ଜ୍ୱାଳାରେ ବିସ୍ଥାପିତ ହୋଇ ଅନ୍ୟତ୍ର ରହିବାକୁ ଦାବି କରି ଆସୁଛନ୍ତି। କିନ୍ତୁ ଏ ଦିଗରେ ପ୍ରତିବନ୍ଧକ ସାଜିଛି ରାଜ୍ୟ ସରକାରଙ୍କ ୨୦୦୫ କଳିଙ୍ଗନଗର ବିସ୍ଥାପନ ନୀତି। କାରଣ ଏହି ନୀତି ଅନୁଯାୟୀ ୧ା୧ା୨୦୦୫ରେ ତାଲିକାଭୁକ୍ତ ହୋଇଥିବା ପରିବାର ହିଁ ବିସ୍ଥାପନ ହୋଇପାରିବେ। ହେଲେ ସେତେବେଳେ ସେହି ତାଲିକାଭୁକ୍ତ ପରିବାରରେ ଥିବା ନାବାଳକମାନେ ଏବେ ସାବାଳକ ସାଜି ନୂଆ ପରିବାର ବସାଇଲେଣି। କିନ୍ତୁ ଏହି ନୂଆ ପରିବାରଗୁଡ଼ିକ ୨୦୦୫ ବିସ୍ଥାପନ ନୀତିର ସୁବିଧା ସୁଯୋଗରୁ ବଞ୍ଚତ୍ତ ହୋଇଛନ୍ତି। ଏହାକୁ ନେଇ ଶିଳ୍ପ ପ୍ରଭାବିତ ଗ୍ରାମଗୁଡ଼ିକରେ ଅସନ୍ତୋଷ ପ୍ରକାଶ ପାଇଛି।
୧୮ ବର୍ଷ ତଳର ବିସ୍ଥାପନ ନୀତିକୁ ଆପଣାଇ ସରକାର ସମ୍ପ୍ରତି ଯୁବବର୍ଗଙ୍କୁ ହତାଦର କରୁଛନ୍ତି। ତେଣୁ ପୁନର୍ବାସ ଓ ପାରିପାର୍ଶ୍ୱିକ ଉନ୍ନୟନ ପରାମର୍ଶଦାତା କମିଟି (ଆର୍ପିଡିଏସି) ବୈଠକ ଆୟୋଜନ କରି ୨୦୦୫ କଳିଙ୍ଗନଗର ବିସ୍ଥାପନ ନୀତିର ପୁନର୍ବିଚାର ଓ ସଂଶୋଧନ କରିବାକୁ ଦାବି ହେଉଛି। ହେଲେ ୬ ବର୍ଷ ହେଲା ଆର୍ପିଡିଏସି ବୈଠକ ହେଉ ନ ଥିବାରୁ ୨୦୦୫ ବିସ୍ଥାପନ ନୀତିରେ ରହିଥିବା ପରିବାର ପ୍ରସ୍ତୁତି ନିର୍ଦ୍ଧାରିତ ତାରିଖ ୧ା୧ା୨୦୦୫କୁ ସଂଶୋଧନ କରାଯାଇପାରୁନାହିଁ। ଏନେଇ ଦାନଗଦି ବ୍ଲକ ଯଖପୁରା ପଞ୍ଚାୟତର କୁଡୁମୀସାହି ଏବଂ ଚାନ୍ଦିଆ ପଞ୍ଚାୟତର କଚେରିଗଁା, ଅରାସାହି ଓ ଟାଙ୍ଗରସାହି ଅଧିବାସୀଙ୍କ ପକ୍ଷରୁ ଦାବି ଓ ଆନ୍ଦୋଳନ କରାଯାଇଛି। କଟକ କେନ୍ଦ୍ରାଞ୍ଚଳ ଆର୍ଡିସିଙ୍କ ପକ୍ଷରୁ ଏ ସମ୍ପର୍କରେ ତଦନ୍ତ କରାଯାଇ ବିହିତ ପଦକ୍ଷେପ ନେବାକୁ ଯାଜପୁର ଜିଲାପାଳଙ୍କୁ ନିର୍ଦ୍ଦେଶ ହୋଇଥିଲା। ହେଲେ ଏଯାଏ କିଛି ସୁଫଳ ମିଳି ପାରିନାହିଁ। ଏହାକୁ ନେଇ ଅସନ୍ତୋଷ ତେଜୁଥିବାବେଳେ ରାଜସ୍ବ ଏବଂ ବିପର୍ଯ୍ୟୟ ପରିଚାଳନା ବିଭାଗ ପକ୍ଷରୁ ଅନୁସଚିବ ପ୍ରବୀଣ କୁମାର ଚକ୍ର ଗତ ୪ ତାରିଖରେ ଆଇନ ଅନୁଯାୟୀ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ଯାଜପୁର ଜିଲାପାଳଙ୍କୁ ନିର୍ଦ୍ଦେଶ ଦେଇଛନ୍ତି।
ବିସ୍ଥାପିତ ଓ ଜମିହରାଙ୍କ ସମସ୍ୟାର ପ୍ରତିକାର ଏବଂ ପ୍ରଭାବିତ ଅଞ୍ଚଳର ଉନ୍ନୟନ ପାଇଁ ଆରପିଡିଏସି ବୈଠକ ଶେଷ ଥର ପାଇଁ ୧୪ା୯ା୨୦୧୬ରେ ଅନୁଷ୍ଠିତ ହୋଇଥିଲା। କଟକଠାରେ ଆର୍ପିଡିଏସି ବୈଠକ ହୋଇଛି ବୋଲି ପ୍ରଶାସନ ପକ୍ଷରୁ ଦାବି କରାଯାଉଛି। ତେବେ ତାହା ଲୁଚାଛପାରେ ହୋଇଥିବା ଅଭିଯୋଗ ହେଉଛି। କଳିଙ୍ଗନଗର ଶିଳ୍ପାଞ୍ଚଳରେ ଆର୍ପିଡିଏସି ବୈଠକ ନହେବା ଶିଳ୍ପ ବିସ୍ଥାପିତଙ୍କ ପ୍ରତି ପ୍ରଶାସନର ସମ୍ବେଦନହୀନତା ବୋଲି ସବୁଠି ଚର୍ଚ୍ଚା ହେଉଛି। ରାଜ୍ୟ ସରକାରଙ୍କ ପୁନର୍ବାସ ଓ ଥଇଥାନ ନୀତି ଅନୁସାରେ ବର୍ଷରେ ଅନ୍ତତଃ ୪ ଥର ଆର୍ପିଡିଏସି ବୈଠକ ହେବା କଥା, କିନ୍ତୁ ୬ ବର୍ଷରୁ ଅଧିକ ହେଲା ଉକ୍ତ ବୈଠକ ହୋଇନାହିଁ। ଅପରପକ୍ଷରେ ବିସ୍ଥାପିତ ଓ ଜମିହରାଙ୍କ ଅସନ୍ତୋଷରୁ ବିଭିନ୍ନ କାରଖାନାରେ ଆଇନ ଶୃଙ୍ଖଳା ପରିସ୍ଥିତି ସୃଷ୍ଟି ହେବା ଏବଂ କାରଖାନା ପ୍ରତିଷ୍ଠାରେ ବାଧା ସୃଷ୍ଟି ହେଉଥିଲେ ବି ପ୍ରଶାସନ ତତ୍ପରତା ପ୍ରକାଶ କରୁନାହିଁ।
ସୂଚନାଥାଉ କି, ଉପରୋକ୍ତ ୪ ଗ୍ରାମ ବିସ୍ଥାପିତ ହେବାକୁ ଥିବାରୁ ସେଠାରେ ବିକାଶ ପହଞ୍ଚତ୍ ପାରିନାହିଁ। ଫଳରେ ୨୮ ବର୍ଷ ହେଲା ଏହି ୪ ଗ୍ରାମର ବାସିନ୍ଦା ଶିଳ୍ପ ପ୍ରଦୂଷଣର ଜ୍ୱାଳାରେ ଦହଗଞ୍ଜ ହେବା ସହ ଅନୁନ୍ନତ ଅଞ୍ଚଳର ଅଧିବାସୀ ସାଜିଛନ୍ତି। ଏଭଳିସ୍ଥିତିରେ ଆର୍ପିଡିଏସି ବୈଠକ ନ ବସିବା ପ୍ରଶାସନର କମ୍ପାନୀ ପ୍ରୀତି ଜଳଜଳ ହୋଇ ଦିଶୁଛି ବୋଲି ମତପ୍ରକାଶ ପାଇଛି। ଏ ସଂକ୍ରାନ୍ତରେ କଳିଙ୍ଗନଗର ଅତିରିକ୍ତ ଜିଲାପାଳ ସନ୍ତୋଷ କୁମାର ମିଶ୍ରଙ୍କୁ ପଚାରିବାରେ ସେ କହିଛନ୍ତି, ସରକାରଙ୍କ ଗାଇଡ୍ଲାଇନ୍ ଅର୍ଥାତ୍ ୨୦୦୫ ବିସ୍ଥାପନ ନୀତି ଅନୁସାରେ ପଦକ୍ଷେପ ଗ୍ରହଣ କରାଯିବ। ଏହାକୁ କେହି ସଂଶୋଧନ କରିପାରିବେ ନାହିଁ। ଏଥିରେ ଆର୍ପିଡିଏସିର କୌଣସି କର୍ତ୍ତୃତ୍ୱ ନାହିଁ।