ପୁରୀ ଅଫିସ,୨୫।୫: ବାତ୍ୟା ୟାସ୍ ସ୍ଥଳ ଭାଗ ଛୁଇଁବା ପୂର୍ବରୁ ପୁରୀ ବେଳାଭୂମିରେ ୨ଦିନରେ ବହୁସଂଖ୍ୟାରେ ମାଛ, ଜେଲି ଫିଶ୍ ମରିପଡ଼ିଥିବା ଦେଖିବାକୁ ମିଳିଛି। ଲାଇଟ୍ ହାଉସ୍ଠାରୁ ଆରମ୍ଭ କରି ପେଣ୍ଠକଟା ପର୍ଯ୍ୟନ୍ତ ସୋମବାର ବେଳାଭୂମିରେ ଶହ ଶହ ଜେଲି ଫିସ୍ ସମୁଦ୍ରକୂଳରେ ପଡ଼ି ରହିଥିଲା। ଦିଗବାରେଣୀ ଖୁଣ୍ଟିଠାରେ ସର୍ବାଧିକ ଜେଲି ଫିଶ୍ ପଡ଼ିଥିଲା। ତେବେ କେଉଁ କାରଣରୁ ଏହି ଜେଲି ଫିଶ୍ ସମୁଦ୍ରକୂଳକୁ ଚାଲି ଆସୁଛନ୍ତି ସେନେଇ କୌଣସି ସ୍ପଷ୍ଟ ଚିତ୍ର ମିଳିପାରୁ ନାହିଁ। ଏ ନେଇ ମତ୍ସ୍ୟଜୀବୀ ସମରେଶ ରେଡ୍ଡୀଙ୍କ କହିବା ଅନୁଯାୟୀ, ରବିବାର ପେଣ୍ଠକଟାଠାରେ ମାଛ ମରି ପଡ଼ିଥିବା ଦେଖିବାକୁ ମିଳିଥିବାବେଳେ ସୋମବାର ଜେଲି ଫିଶ୍ ମରି ପଡ଼ିଛନ୍ତି। ସମୁଦ୍ର ଅଶାନ୍ତ ସମୟରେ ମାଛମାନେ କୂଳକୁ ଆସିଯାଉଥିବା ଘଟଣା ଆମେ ପୂର୍ବରୁ ମଧ୍ୟ ଲକ୍ଷ୍ୟ କରିଛୁ। ମାତ୍ର ଏତେ ସଂଖ୍ୟକ ଜେଲି ଫିଶ୍ ଏକକାଳୀନ ଭାବେ ନଜରକୁ କେବେ ଆସି ନ ଥିଲା। ସାଧାରଣତଃ ଶୀତ ଦିନରେ ଜେଲିଫିଶ୍ ଦେଖିବାକୁ ମିଳିଥାଏ। ରାଜ୍ୟରେ ଏସବୁର ଚାହିଦା ନ ଥିବାରୁ ରାଜ୍ୟ ବାହାର କେରଳକୁ ଜେଲି ଫିସ୍ ପଠାଇ ଦିଆଯାଇଥାଏ। ସେଠାରୁ ଏହି ଜେଲି ଫିସ୍ ଚାଇନା ଯାଉଥିବା ମତ୍ସ୍ୟଜୀବୀମାନେ କହିଛନ୍ତି। ମତ୍ସ୍ୟଜୀବୀମାନେ ଏହି ଜେଲି ଫିଶ୍କୁ ସୋମବାର ଦିନ ତମାମ୍
ସଂଗ୍ରହ କରିଥିବା ଦେଖିବାକୁ ମିଳିଛି। ଅନ୍ୟପକ୍ଷେ ସେଣ୍ଟ୍ରାଲ୍ ମେରାଇନ୍ ଫିସରିଜ୍ ଫିଲ୍ଡ ରିସର୍ଚ୍ଚ ସେଣ୍ଟରର ବୈଜ୍ଞାନିକ ଜ୍ଞାନରଞ୍ଜନ ଦାସ କହିଛନ୍ତି, ବେଳାଭୂମିରେ ଏତେ ମାତ୍ରାରେ ଜେଲି ଫିଶ୍ ସାଧାରଣତଃ ଦେଖିବାକୁ ମିଳେ ନାହିଁ। ବାତ୍ୟା ଭଳି ଭୟଙ୍କର ବାୟୁ ପ୍ରବାହ ବେଳେ ଏମାନେ କୂଳକୁ ଚାଲି ଆସିଥାଆନ୍ତି। ଜେଲି ଫିଶ୍ର ନିଜସ୍ବ ଭାବେ ଲୋକେଟ୍ରିକ୍ ଅର୍ଗାନ୍ ନ ଥିବା ହେତୁ ସେମାନଙ୍କ ଗତିଶୀଳତା ପ୍ରଭାବିତ ହୋଇଥାଏ। ଯାହାଫଳରେ ସେମାନେ ପବନରେ ଭାସି ଚାଲି ଆସନ୍ତି। ତେବେ ବାସ୍ତବ କାରଣ କ’ଣ ସେନେଇ ଆମେ ଅନୁସନ୍ଧାନ କରିବୁ। କିଛି ଜେଲି ଫିଶ୍ଙ୍କ ଶରୀରରେ ଥିବା ଲାଳୁଆ ଅଂଶ ମଣିଷ ଚର୍ମ ଉପରେ କୁପ୍ରଭାବ ଥାଏ ଓ ଚର୍ମକୁ କଷ୍ଟ ହୋଇଥାଏ। ଏଭଳି କିଛି ଜେଲି ଫିଶ୍ ମଧ୍ୟ ରହିଛନ୍ତି ଯେଉଁମାନେ ଆଦୌ କ୍ଷତିକାରକ ନୁହେଁ। ରବିବାର ବହୁସଂଖ୍ୟକ ମାଛ ମରିପଡ଼ିଥିବା କାରଣ ସମ୍ପର୍କରେ ଅନୁଷ୍ଠାନ କହିଛି ଯେ, ପାଣିରେ ଲୁଣିଆ ଅଂଶ କମ୍ ବେଶି ହୋଇଯିବା, ପାଣିର ତାପମାତ୍ରା ଖୁବ୍ କମ୍ ସମୟ ମଧ୍ୟରେ ବଢ଼ିଯିବା ଫଳରେ ମାଛ ସବୁ କୂଳରେ ମରି ପଡ଼ନ୍ତି।
