ଛତ୍ରପୁର,୧୮।୧୧( ଦିଲ୍ଲୀପ ସାମଲ): ଛତ୍ରପୁର ବାଳିକା ବିଦ୍ୟାଳୟ ରୋଡ ଏବଂ ଅନ୍ୟାନ୍ୟ ସ୍ଥାନରେ ଥିବା ଆମିଷ ମାର୍କେଟ ହଟିବ। ଏନେଇ ଶୁକ୍ରବାର ଏନଏସି କାର୍ଯ୍ୟାଳୟରେ ବ୍ୟବସାୟୀ ଓ ପ୍ରଶାସନିକ ଅଧିକାରୀଙ୍କୁ ନେଇ ଏକ ଆଲୋଚନା ବୈଠକ ଅନୁଷ୍ଠିତ ହୋଇଥିଲା। ଛତ୍ରପୁର ନୂଆବସଷ୍ଟାଣ୍ଡ ନିକଟରେ ଏକ ଆମିଷ ମାର୍କେଟ କରାଯିବ ବୋଲି ବୈଠକରେ ନିଷ୍ପତି ହୋଇଛି। ଏନେଇ ୭୦ ଲକ୍ଷ ବ୍ୟୟ ଅଟକଳ ରହିଛି। ସେଠାରେ ସମସ୍ତ ଆନୁସଙ୍ଗିକ ବ୍ୟବସ୍ଥା ରହିବ। ବାଳିକା ଉଚ୍ଚ ବିଦ୍ୟାଳୟ ନିକଟରେ ଥିବା ଆମିଷ ମାର୍କେଟ ଓ ପନିପରିବା ମାର୍କେଟ ପାଇଁ ଟ୍ରାଫିକ ସମସ୍ୟା ସହ ନାନା ପ୍ରକାରର ଅସୁବିଧା ହେଉଛି। ଏହାକୁ ଦୃଷ୍ଟିରେ ରଖି ଉକ୍ତ ସ୍ଥାନରେ କେବଳ ପନିପରିବା ବଜାର ରହିବ, କିନ୍ତୁ ରାସ୍ତା ଉପରେ କେହି ବସିବେ ନାହିଁ। ଆମିଷ ବଜାର ଏଠାରୁ ହଟି ଛତ୍ରପୁର ନୂଆବସଷ୍ଟାଣ୍ଡରେ କରାଯିବ। ତେବେ ବୈଠକରେ ଆମିଷ ବଜାରର ବ୍ୟବସାୟୀ ପ୍ରଶାସନ ନିକଟରେ କିଛି ସର୍ତ୍ତ ରଖିଥିଲେ। ଛତ୍ରପୁର ଏନଏସିରେ କୌଣସି ସ୍ଥାନରେ ଆମିଷ ଦୋକାନ ଖୋଲିବେ ନାହିଁ। କେବଳ ଗୋଟିଏ ସ୍ଥାନରେ ଆମିଷ ଦୋକାନ ଖୋଲାଯିବ। ସେ ଉପରେ ଏନଏସି ପ୍ରଶାସନ ଦୃଷ୍ଟି ଦେବା ସହ ଲିଖିତ ଭାବେ ଦେବାକୁ କହିଥିଲେ। ଏନଏସି ପ୍ରଶାସନ ଆଗାମୀ ଦିନରେ ଛତ୍ରପୁର ଏନଏସି ଯେଉଁସବୁ ସ୍ଥାନରେ ଆମିଷ ବିକ୍ରି କରୁଛନ୍ତି ସେମାନଙ୍କୁ ଚିହ୍ନଟ କରିବାକୁ କୁହାଯାଇଛି। ଏହି ବୈଠକ ରେ ପ୍ରୋବେସନାଲ ଆଇଏଏସ ଅଧିକାରୀ ସମୀର ଜେନା, ଛତ୍ରପୁର ଏନଏସି ଅଧିକାରୀ ସମ୍ବିତ ସଂଗ୍ରାମଜିତ ସାହୁଙ୍କ ସମେତ ବହୁ ଆମିଷ ବ୍ୟବସାୟୀ ଉପସ୍ଥିତ ଥିଲେ।