ଷ୍ଟକ୍ହୋମ୍: ଜୈବ ବିବର୍ତ୍ତନର ଧାରା ପୃଥିବୀରେ ସବୁବେଳେ ଜାରି ରହିଛି। ଗବେଷକଙ୍କ ମତରେ ମନୁଷ୍ୟଠାରେ ଦେଖାଯାଉଥିବା ଦାନ୍ତ ୪୦ କୋଟି ବର୍ଷତଳେ ମାଛଠାରୁ ବିକଶିତ ହୋଇଥିଲା। ମାଛର ତଳ ମାଢ଼ିରେ କୋମଳ ଦାନ୍ତ ସୃଷ୍ଟି ହେବା ପରେ ଏହାର କ୍ରମବିକାଶ ଧାରା ଜାରି ରହିଥିଲା। ଏଭଳି ଦାନ୍ତ ୬୦ ହଜାରରୁ ଅଧିକ ପ୍ରଜାତିର ପ୍ରାଣୀଙ୍କଠାରେ ଦେଖାଯାଇଥିଲା। ସେମାନଙ୍କ ମଧ୍ୟରେ ଶାର୍କ, ବୋନି ଫିଶ୍, ଆମ୍ଫିବିୟା, ରେପ୍ଟାଇଲ୍ ଆଦି ରହିଥିଲେ। ପରେ ଏହା ପକ୍ଷୀ ଏବଂ ସ୍ତନ୍ୟପାୟୀ ପ୍ରଜାତିଠାରେ ମଧ୍ୟ ବିକଶିତ ହୋଇଥିଲା ବୋଲି ସ୍ବିଡେନ୍ର ଉପାସାଲା ବିଶ୍ୱବିଦ୍ୟାଳୟ ଏବଂ ସ୍ପେନ୍ର ୟୁରୋପିଆନ୍ ସାଇକ୍ରୋଟ୍ରୋନ୍ର ମିଳିତ ସହଯୋଗରେ ହୋଇଥିବା ଗବେଷଣା ରିପୋର୍ଟରେ ଉଲ୍ଲେଖ କରାଯାଇଛି। ବିଭିନ୍ନ ମାଛ ପ୍ରଜାତିର ଜୀବାଶ୍ମର ଏକ୍ସ-ରେ ପରୀକ୍ଷଣ କରାଯାଇ ଗବେଷକ ଏହା ଜାଣିପାରିଛନ୍ତି। ଗବେଷଣାରେ ଚେକ୍ ଗଣରାଜ୍ୟର ଚାଲର୍ସ ବିଶ୍ୱବିଦ୍ୟାଳୟ, ବ୍ରିଟେନ୍ର ଲଣ୍ଡନ ସ୍ଥିତି ନାଚୁରାଲ ହିଷ୍ଟ୍ରି ମ୍ୟୁଜିୟମ୍ ଆଦି ଆବଶ୍ୟକ ସହାୟତା କରିଥିଲେ। ମ୍ୟୁଜିୟମ୍ରେ ରଖାଯାଇଥିବା କିଛି ପୁରାତନ ଜୀବାଶ୍ମ ଉପରେ ମଧ୍ୟ ଦୀର୍ଘ ଦିନ ଧରି ଅଧ୍ୟୟନ କରାଯାଇଥିଲା। ୪୦କୋଟି ବର୍ଷ ତଳର ଏକ ପଥର ଖଣ୍ଡରେ ଥିବା ଜୀବାଶ୍ମ ଉପରେ ଗବେଷଣା କରାଯାଇଥିବା ଉପାସାଲା ବିଶ୍ୱବିଦ୍ୟାଳୟର ଗବେଷକ ଭେଲାରିଆ ଭାକ୍ସାନିନୋଭା ସୂଚନା ଦେଇଛନ୍ତି।
