ପାରାଦୀପ,୧୪।୬(ଶରତ ରାଉତ): ୨ ମାସର ସାମୁଦ୍ରିକ ମାଛଧରା କଟକଣା ବୁଧବାର ଶେଷ ହେଉଛି। ଏନେଇ ମଙ୍ଗଳବାର ପାରାଦୀପ ମାଛଧରା ବନ୍ଦର ପରିସର ଚଳଚଞ୍ଚଳ ହୋଇଉଠିଛି । ବୁଧବାର ପ୍ରାୟ ୪୦୦ରୁ ଊର୍ଦ୍ଧ୍ୱ ବୋଟ ଓ ୨୫୦ରୁ ଅଧିକ ଛୋଟ ଡଙ୍ଗା ସମୁଦ୍ର ଭିତରକୁ ଯିବେ। ଏଥିପାଇଁ ସେମାନେ ସମସ୍ତ ପ୍ରକାର ପ୍ରସ୍ତୁତି ଶେଷ କରିଛନ୍ତି। ବରୁଣେଶ୍ୱର ଯଜ୍ଞ ମଧ୍ୟ ସରିଛି। ବୋଟ୍ରେ ତେଲ, ବରଫ, ଜାଲ, ଖାଇବା ସାମଗ୍ରୀ ଆଦି ରଖାଯାଇଛି। ଏନେଇ ବୋଟର କର୍ମଚାରୀ (ମତ୍ସ୍ୟଜୀବୀ)ମାନେ ଆସି ପହଞ୍ଚତ୍ଗଲେଣି। ଏଥର ନୂଆ ଉଦ୍ଦିପନା ନେଇ ସମୁଦ୍ରକୁ ଯିବୁ ବୋଲି ମତ୍ସ୍ୟଜୀବୀ ତ୍ରିନାଥ କହିଛନ୍ତି। ମାଛ ଧରିବା ପାଇଁ ମତ୍ସ୍ୟ ବିଭାଗ ପକ୍ଷରୁ ଡାକବାଜି ଯନ୍ତ୍ର ଯୋଗେ କେତେକ ସତର୍କ ସୂଚନା ଦିଆ ଯାଉଥିବା ଦେଖିବାକୁ ମିଳିଛି। ପ୍ରତ୍ୟେକ ମତ୍ସ୍ୟଜୀବୀ ସେମାନଙ୍କ ପରିଚୟପତ୍ର, ଆଧାରକାର୍ଡ ସହ ବୋଟ୍ର କାଗଜପତ୍ର ଆଦି ସାଙ୍ଗରେ ନେବାପାଇଁ ପରାମର୍ଶ ଦିଆଯାଇଛି। ଏଥିସହ ସୁରକ୍ଷା ଉପକରଣ ପୋଷାକ, ଅଗ୍ନି ନିର୍ବାପକ ବ୍ୟବସ୍ଥା, ଦ୍ୟାଟ (ଡିଷ୍ଟ୍ରେସ ଆଲାର୍ଟ ଟ୍ରାନ୍ସମିଟର)ଆଦି ବୋଟରେ ରଖିବା ପାଇଁ କୁହାଯାଇଛି।
ପ୍ରତିବର୍ଷ ଏପ୍ରିଲ ୧୫ରୁ ଜୁନ୍ ୧୪ ପର୍ଯ୍ୟନ୍ତ ୨ ମାସ ସରାକାରୀ ଭାବେ ସାମୁଦ୍ରିକ କଟକଣା କରାଯାଇଥାଏ। ସମୁଦ୍ରରେ ମାଛ ବଂଶ ବୃଦ୍ଧି ପାଇଁ ଏହା କରାଯାଇଥାଏ। ଏହି ସମୟରେ ମାଛ ପ୍ରଜନନ, ଅଣ୍ଡାଦାନ, ଯାଆଁଳ ସୁରକ୍ଷା ଅପରିହାର୍ଯ୍ୟ ବୋଲି ସାମୁଦ୍ରିକ ମତ୍ସ୍ୟ ଅଧିକାରୀ ବିଜୟ କୁମାର କର କୁହନ୍ତି। ପାରାଦୀପ ମାଛଧରା ବନ୍ଦର ଉପରେ ପ୍ରତ୍ୟକ୍ଷ ପରୋକ୍ଷ ଭାବେ ପ୍ରାୟ ୫୦ ହଜାର ମତ୍ସ୍ୟଜୀବୀ ନିର୍ଭରଶୀଳ ବୋଲି ଓମ୍ଫା (ଓଡିଶା ସାମୁଦ୍ରିକ ମତ୍ସ୍ୟ ଉତ୍ପାଦକ ସଂଘ)ସମ୍ପାଦନ ଅରବିନ୍ଦ ସ୍ବାଇଁ କୁହନ୍ତି। ଅପରପକ୍ଷେ ଏହି ମତ୍ସ୍ୟ ଶିଳ୍ପ ଏବେ ଅନେକ ସମସ୍ୟା ମଧ୍ୟରେ ଗତି କରୁଛି। ମାଛ ଉତ୍ପାଦନ ହ୍ରାସ ପାଉଥିବାବେଳେ ତେଲ ଦର ବଢ଼ି ଚାଲିଛି। ଏଥିପାଇଁ ଅଧିକାଂଶ ବୋଟ ମାଲିକ ଆଉ ସମୁଦ୍ରକୁ ବୋଟ୍ ପଠାଉନାହାନ୍ତି। ପୂର୍ବରୁ ବର୍ଷକୁ ଗୋଟିଏ ବୋଟ୍ ୨୦ ରୁ ୨୫ ଥର ମାଛ ଧରୁଥିଲେ। ଏବେ ୧୦ ରୁ ୧୫ ଥର ଫିଶିଂ କରିବା କଷ୍ଟକର ବୋଲି ଓମ୍ଫା ସଭାପତି ଶ୍ରୀକାନ୍ତ ପରିଡ଼ା କୁହନ୍ତି। ଏତେ ଲୋକଙ୍କୁ ରୋଜଗାର ଯୋଗାଉଥିବା ମତ୍ସ୍ୟ ଶିଳ୍ପ ତେଲ ମୂଲ୍ୟ ଉପରେ ରିହାତି ପାଇଁ ଦୀର୍ଘ ବର୍ଷ ହେଲା ଦାବି କରାଯାଉଛି। ସରକାର ଏ ସମ୍ପର୍କରେ ବିଚାର କଲେ ଭଲ ହେବ ବୋଲି ପରିଡ଼ା କହିଛନ୍ତି।