ପଦ୍ମପୁର, ୧୯।୫ (ଡି.ଏନ.ଏ.): ଭଦ୍ରକ ଜିଲା ସଦର ବ୍ଲକ ସାହାଡ଼ା ପଞ୍ଚାୟତର ନିଲାମ ହୋଇ ନ ଥିବା ଦୁଇଟି ପୋଖରୀରୁ ଗ୍ରାମର କେତେଜଣ ବ୍ୟକ୍ତି ଜାଲ ଟାଣି ବୁଧବାର ମାଛ ଧରି ନେଇଥିବା ଅଭିଯୋଗ ହୋଇଛି। ଏହାକୁ ନେଇ ଗ୍ରାମବାସୀ ବିଡିଓଙ୍କ ନିକଟରେ ଲିଖିତ ଅଭିଯୋଗ କରିଥିବା ବେଳେ ସରପଞ୍ଚ ମାଧବ ମଲ୍ଲିକ ସାବରଙ୍ଗ ଥାନାରେ ଏତଲା ଦେଇଛନ୍ତି। ଏହି ପଞ୍ଚାୟତ ବାସୁଦେବପୁର ମୌଜାର ନାଣ୍ଡିପୋଖରୀ ଓ କାକୁଡ଼ି ପୋଖରୀ ଗତ ୩ବର୍ଷ ଧରି ନିଲାମ ହୋଇନାହିଁ। କେତେଜଣ ବ୍ୟକ୍ତି ଦୁଇ ପୋଖରୀରୁ ଜାଲ ଟାଣି ୬୦ରୁ ୭୦ କୁଇଣ୍ଟାଲ ମାଛ ଧରି ନେଇଛନ୍ତି। ଏହାପରେ ପମ୍ପ ପକାଇ ପୋଖରୀ ଶୁଖାଇଥିବା ବେଳେ ସ୍ଥାନୀୟ ଗ୍ରାମବାସୀ ଓ ସରପଞ୍ଚ ମିଳିତ ଭାବେ ଏହାକୁ ବିରୋଧ କରି ମାଛଧରା ବନ୍ଦ କରିଛନ୍ତି। ପୋଖରୀ ନିଲାମ ଦିଆଯାଇ ନ ଥିବାବେଳେ କେଉଁ ପରିସ୍ଥିତିରେ କାହା ପ୍ରରୋଚନାରେ ମାଛ ଧରାଯାଇଛି। ଏ ବାବଦରେ ତଦନ୍ତ କରି ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଗ୍ରାମବାସୀ ଦାବି କରିଛନ୍ତି।
