ଲଣ୍ଡନ, ୧୧।୬(ପି.ଟି.)-
ୟୁନାଇଟେଡ କିଙ୍ଗ୍ଡମ୍ରେ ଚଳିତ ମାସ ୨୧ରୁ ଆରମ୍ଭ ହେବାକୁ ଯାଉଥିବା ‘ଦି ହଣ୍ଡ୍ରେଡ’ କ୍ରିକେଟ ଟୁର୍ନାମେଣ୍ଟରେ ଭାରତର ୫ ମହିଳା ଖେଳାଳି ଅଂଶଗ୍ରହଣ କରିବେ। ଭାରତୀୟ ଟି୨୦ ଅଧିନାୟିକା ହରମନପ୍ରୀତ କୌର ମାଞ୍ଚେଷ୍ଟର ଅରିଜିନାଲ୍ସ ଏବଂ ଶେଫାଳି ବର୍ମା ବର୍ମିଂହାମ ଫୋଏନିକ୍ସରୁ ପ୍ରତିନିଧିତ୍ୱ କରିବେ। ଅନ୍ୟ ଭାରତୀୟଙ୍କ ମଧ୍ୟରେ ଓପନର ସ୍ମୃତି ମନ୍ଧାନା, ଅଲରାଉଣ୍ଡର ଦୀପ୍ତି ଶର୍ମା ଏବଂ ବ୍ୟାଟ୍ସଓମ୍ୟାନ ଜେମିମା ରୋଡ୍ରିଗ୍ବେଜ ଏହି ୧୦୦ ବଲ୍ ଟୁର୍ନାମେଣ୍ଟରେ ଖେଳିବେ। ପ୍ରତିଯୋଗିତାରେ ୮ ମହିଳା ଓ ପୁରୁଷ ଦଳ ଭାଗନେବେ। ଟି୨୦ ର଼୍ୟାଙ୍କିଙ୍ଗ୍ର ନମ୍ବରଓ୍ବାନ ସ୍ଥାନରେ ଥିବା ୧୭ ବର୍ଷୀୟା ଶେଫାଳି ନ୍ୟୁଜିଲାଣ୍ଡର ସୋଫି ଡିଭାଇନ୍ଙ୍କ ସ୍ଥାନରେ ବର୍ମିଂହାମ ଫୋଏନିକ୍ସରୁ ଖେଳିବେ। ଦୀପ୍ତି ଲଣ୍ଡନ ସ୍ପିରିଟ, ଭାରତୀୟ ଟି୨୦ ଉପ-ଅଧିନାୟିକା ସ୍ମୃତି ସର୍ଦ୍ଦର୍ନ ବ୍ରେଭ୍ ଏବଂ ରୋଡ୍ରିଗ୍ବେଜ ନର୍ଦ୍ଦର୍ନ ସୁପରଚାର୍ଜର୍ସ ପକ୍ଷରୁ ପ୍ରତିନିଧିତ୍ୱ କରିବେ।
ବିସ୍ଫୋରକ ବ୍ୟାଟିଂ ପାଇଁ ବିଶେଷ ପରିଚିତ ହରମନପ୍ରୀତ ମାଞ୍ଚେଷ୍ଟର ଦଳ ପକ୍ଷରୁ ଉଦ୍ଘାଟନୀ ମ୍ୟାଚ ଖେଳିବେ। ଦି ହଣ୍ଡ୍ରେଡ ଟୁର୍ନାମେଣ୍ଟର ସର୍ବପ୍ରଥମ ଗେମ୍ ଖେଳିବାକୁ ଯାଉଥିବାରୁ ସେ ଖୁବ୍ ଉତ୍ସାହିତ ବୋଲି ହରମନପ୍ରୀତ ପ୍ରକାଶ କରିଛନ୍ତି। ପୂର୍ବରୁ ରୋଡ୍ରିଗ୍ବେଜ, ହରମନପ୍ରୀତ, ସ୍ମୃତି ଓ ଦୀପ୍ତି ୨୦୧୯ରେ ଇଂଲଣ୍ଡ ଆଣ୍ଡ ଓ୍ବେଲ୍ସ କ୍ରିକେଟ ବୋର୍ଡର ଟି୨୦ ଘରୋଇ ଟୁର୍ନାମେଣ୍ଟ କିଆ ସୁପର ଲିଗ୍ (କେଏସ୍ଏଲ)ରେ ଖେଳିଥିଲେ। ଏହି ଟୁର୍ନାମେଣ୍ଟ ଏବେ ‘ଦି ହଣ୍ଡ୍ରେଡ୍’ରେ ପରିଣତ ହୋଇଛି। କୋଭିଡ୍-୧୯ ମହାମାରୀ ଯୋଗୁ ଦି ହଣ୍ଡ୍ରେଡ ଟୁର୍ନାମେଣ୍ଟ ଗତବର୍ଷ ସ୍ଥଗିତ ରହିଥିଲା। ଚଳିତ ମାସ ୨୧ ତାରିଖରେ ଏହା ଆରମ୍ଭ ହେବ। ମାଞ୍ଚେଷ୍ଟର ଓରିଜିନାଲ୍ସ ଏବଂ ଦି ଓଭାଲ ଇନ୍ଭିସିବଲ୍ସ ମଧ୍ୟରେ ଉଦ୍ଘାଟନୀ ମ୍ୟାଚ ଅନୁଷ୍ଠିତ ହେବ। ”ଭାରତର କେତେକ ସୁପରଷ୍ଟାର କ୍ରିକେଟର ସାମିଲ ହେବା ବହୁ ଖୁସିର କଥା। ଏହା ପ୍ରତିଯୋଗିତାକୁ ଅଧିକ ସଂଘର୍ଷପୂର୍ଣ୍ଣ କରିବ“ ବୋଲି ଦି ହଣ୍ଡ୍ରେଡ ପ୍ରତିଯୋଗିତା ମୁଖ୍ୟ ବେଥ୍ ବେରେଟ-ଓ୍ବିଲ୍ଡ ପ୍ରକାଶ କରିଛନ୍ତି।
