ଭବାନୀପାଟଣା,୯ା୯(ଡି.ଏନ୍.ଏ.)-ପୁଣି ସୀମାନ୍ତରେ ଫୁଟିଛି ଗୁଳି। କଳାହାଣ୍ଡି-କନ୍ଧମାଳ ସୀମାନ୍ତ ରାମପୁର ଥାନା ସିର୍କି ଜଙ୍ଗଲରେ ବୁଧବାର ସୁରକ୍ଷା କର୍ମୀଙ୍କ ଗୁଳିରେ ନିହତ ହୋଇଛନ୍ତି ୫ ମାଓବାଦୀ। କଳାହାଣ୍ଡି ପୋଲିସ, ଡିଭିଏଫ୍ ଏବଂ ଏସଓଜିର ମିଳିତ ଅପରେଶନବେଳେ ଏହି ସଫଳତା ମିଳିଛି। ଏହାପରେ ସିର୍କି ଜଙ୍ଗଲରେ କମ୍ବିଂ ଅପରେଶନକୁ ଜୋରଦାର କରାଯାଇଛି। ସେଠାକୁ ଅଧିକ ଫୋର୍ସ ପଠାଯାଇଛି। ମୃତ ମାଓବାଦୀଙ୍କ ମଧ୍ୟରେ ୩ ମହିଳା ଓ ୨ ପୁରୁଷ ଥିବା କଳାହାଣ୍ଡି ଏସ୍ପି ବାତୁଲା ଗଙ୍ଗାଧର ସୂଚନା ଦେଇଛନ୍ତି। ଘଟଣାସ୍ଥଳରୁ ୨ଏସ୍ଏଲ୍ଆର୍ ବନ୍ଧୁକ ଓ ୩ଟି ଦେଶୀ ବନ୍ଧୁକ ସମେତ ବିପୁଳ ମାଓସାମଗ୍ରୀ ଜବତ ହୋଇଛି।
ପୂର୍ବାହ୍ନ ୧୧ଟା ବେଳେ ମାଓବାଦୀ ଗତିବିଧି ନେଇ ସୂଚନା ଆଧାରରେ କଳାହାଣ୍ଡି-କନ୍ଧମାଳ ପୋଲିସ ସହାୟତାରେ ଅପରେଶନ ଆରମ୍ଭ ହୋଇଥିଲା। ଉଭୟ ପଟୁ ଗୁଳିବିନିମୟ ବେଳେ ୫ ମାଓବାଦୀ ନିହତ ହୋଇଥିଲେ। ଅପରେଶନ୍କୁ ଜୋରଦାର କରିବା ପାଇଁ ସେଠାକୁ ଅଧିକ ଏସ୍ଓଜି, ଡିଭିଏସ୍ ଓ ସିଆର୍ପିଏଫ୍ ଜବାନଙ୍କୁ ପଠାଯାଇଛି। ଖବର ଲେଖା ହେବା ବେଳକୁ ଅପରେଶନ୍ ଜାରି ରହିଥିଲା। ନିହତମାନେ ମାଓବାଦୀ ସଂଗଠନ ସିପିଆଇ ମାଓବାଦୀ କେକେବିଏନ୍ (କଳାହାଣ୍ଡି-କନ୍ଧମାଳ-ବଉଦ୍-ନୟାଗଡ଼) ଡିଭିଜନର ବୋଲି ସୂଚନା ମିଳିଛି।
ଏହାପୂର୍ବରୁ କଳାହାଣ୍ଡି ଜିଲାର ମଦନପୁର ରାମପୁର, ବୁଲାମୁଣ୍ଡା, ଥାଆମୁଲରାମପୁର, କୋକସରା ବ୍ଲକ ଏବଂ ଭବାନୀପାଟଣା ବ୍ଲକର ଜୁକସେପାଟଣାର ବିଭିନ୍ନ ଆଭ୍ୟନ୍ତରିଣ ଜଙ୍ଗଲ ଅଞ୍ଚଳରେ ପୋଲିସ, ଏସଓଜି ଏବଂ ଡିଭିଏଫ୍ ଯବାନମାନେ କମ୍ବିଂ ଅପରେଶନ କରିଥିଲେ। ଏଥିରେ କେତେକ ମାଓବାଦୀ ମୃତ୍ୟୁବରଣ କରିଥିବାବେଳେ ବିପୁଳ ପରିମାଣରେ ଅସ୍ତ୍ରଶସ୍ତ୍ର ଜବତ ହୋଇଥିଲା।