ଛତ୍ରପୁର,୭ା୧୧(ଡି.ଏନ.ଏ.): ଗଞ୍ଜାମ ଜିଲାରେ ଥିବା ହୁମୁରି ତାମ୍ପରା ସମେତ ୫ ଜଳାଶୟ ପ୍ରଦୂଷିତ ରହିଛି। ସେଥିମଧ୍ୟରେ ଛତ୍ରପୁର ବ୍ଲକ ହୁମୁରି ତାମ୍ପରା ହ୍ରଦ(୩୩୭.୮୫୭ ଏକର), ଭଞ୍ଜନଗର ଇନ୍ଦ୍ରଗୁଡା ଗ୍ରାମରେ ଥିବା ଦହ ଜଳଭଣ୍ଡାର,(୯୬.୭୧ଏକର), ଭଞ୍ଜନଗର ଜିଲୁଣ୍ଡି ପୋଖରୀ (୧୫.୨୩ ଏକର), ଖଲ୍ଲିକୋଟ ବ୍ଲକ ବଡପଲ୍ଲୀ କେନ୍ଦ୍ରଘାଇ ପୋଖରୀ (୨୭.୨୭୯ ଏକର) ଓ ଚିକିଟି ଚାନ୍ଦପୁରରେ ଥିବା ଜଗନ୍ନାଥ ସାଗର (୨୦.୮୯୫ ଏକର) ରହିଛି । ଫଳରେ ଏନ୍ଜିଟି (ନ୍ୟାଶନାଲ ଗ୍ରୀନ୍ ଟ୍ରିବ୍ୟୁନାଲ) ନିର୍ଦ୍ଦେଶନାମା ଉକ୍ତ ଜଳାଶୟରେ କାର୍ଯ୍ୟକାରୀ ହୋଇପାରୁନି । ହୁମୁରି ତାମ୍ପରା ସମେତ ୫ ଜଳାଶୟର ପୁନରୁଦ୍ଧାର ଓ ରକ୍ଷଣାବେକ୍ଷଣ ଏନଜିଟିର ଓଏନଂ-୩୨୫/୧୫ ନିର୍ଦ୍ଦେଶର ଅନୁପାଳନ କରିବା ଜରୁରୀ ହୋଇପଡିଛି ।
ବିଭିନ୍ନ ପ୍ରକାର ବ୍ୟବହାର ଲାଗି ଏନଜିଟି ନିୟମ ପୂରଣ କରିପାରୁ ନ ଥିବା ଜଣାପଡିଛି । ଉକ୍ତ ଜଳାଶୟଗୁଡିକ ସଫା ରହିବା ପରିବଶେ ସୁରକ୍ଷା ସହ ଏନ୍ଜିଟିର ନିର୍ଦ୍ଦେଶକୁ ଅନୁପାଳନ ପାଇଁ ଗୁରୁତ୍ୱ ରହିଛି । ଏଗୁଡିକର ସୁରକ୍ଷା ଓ ପୁନରୁଦ୍ଧାର ପାଇଁ ରାଜ୍ୟ ଜଳସମ୍ପଦ ବିଭାଗର ପ୍ରମୁଖ ଶାସନ ସଚିବ ଅନୁ ଗର୍ଗଙ୍କଠାରୁ ଏକ ଚିଠି ଜିଲାପାଳଙ୍କୁ (ନଂ-୨୭୯୪୧/୫ା୧୧ା୨୧) ଆସିଛି। ତାମ୍ପରା ସମେତ ୫ ଜଳାଶୟର ପୁନରୁଦ୍ଧାର ଓ ରକ୍ଷା ପାଇଁ ଏକ ଆକ୍ସନ ପ୍ଲାନ ପ୍ରସ୍ତୁତ କରିବାକୁ ନିର୍ଦ୍ଦେଶ ଦିଆଯାଇଛି । ବିଭାଗୀୟ ମୁଖ୍ୟଯନ୍ତ୍ରୀ ଓ ନିର୍ବାହୀ ଯନ୍ତ୍ରୀଙ୍କ ବୈଠକ ସହ ନିଜେ ଯାଇ ଏହାର ଯାଞ୍ଚ କରି ଆକ୍ସନପ୍ଲାନ ପ୍ରସ୍ତୁତ କରିବାକୁ ଚିଠିରେ କୁହାଯାଇଛିା ପ୍ରତି ଜଳାଶୟ ପାଇଁ ପୃଥକ୍ ଆକ୍ସନପ୍ଲାନ ପ୍ରସ୍ତୁତ କରି ୧୫ ତାରିଖ ସୁଦ୍ଧା ବିଭାଗକୁ ପଠାଇବାକୁ ନିର୍ଦ୍ଦେଶ ଦିଆଯାଇଛିା ଜଳାଶୟ କେତେ ଏକର ଅଛି, କେତେ ଲୋକ ଏହାକୁ ବ୍ୟବହାର କରୁଛନ୍ତି, କ୍ୱାଲିଟି ଟେଷ୍ଟ, ଟ୍ରିଟ୍ମେଣ୍ଟ ପ୍ଲାନ୍, ପ୍ରଦୂଷଣର କାରଣ ଓ କେଉଁ ସମୟସୀମା ମଧ୍ୟରେ ଏହାର ପୁନରୁଦ୍ଧାର କାର୍ଯ୍ୟ ସରିବ ସେ ଉପରେ ଆକ୍ସନ
ରିପୋର୍ଟରେ ଦର୍ଶାଇବାକୁ କୁହାଯାଇଛି ।