ଗୋପାଳପୁର,୩ା୩(ଡି.ଏନ.ଏ.): ବ୍ରହ୍ମପୁର ପୋଲିସ ଜିଲା ଅଧୀନ ୪ ଥାନା ଅଞ୍ଚଳରୁ ଗତ ୬ରୁ ୭ ମାସ ମଧ୍ୟରେ ଏକାଧିକ ଘରୁ ଚୋରି ଘଟଣାରେ ସମ୍ପୃକ୍ତ ୫ ଚୋରଙ୍କୁ ଗୋଳନ୍ଥରା ଥାନା ପୋଲିସ ଗିରଫ କରିଛି। ସେମାନେ ହେଲେ ବଡ଼ବଜାର ଥାନା ସୁକୁଣ୍ଡା ଗ୍ରାମର ସିଏଚ୍ ରାମବାବୁ , ଏସ.ଶ୍ରୀନୁ , ଏସ.ଗଣେଶ , ସିଏଚ୍ ସେନବାବୁ ଓ ପି. ନରସିଂହ। ଅଭିଯୁକ୍ତମାନଙ୍କୁ ଗୁରୁବାର କୋର୍ଟ ଚାଲାଣ କରାଯାଇଛି। ଏହି ଗ୍ୟାଙ୍ଗର ଆଉ ୨ ଜଣ ଖସିଯାଇଥିବା ଜଣାପଡ଼ିଛି।
ଗତ କିଛିଦିନ ହେଲା ଗୋଳନ୍ଥରା, ବ୍ରହ୍ମପୁର ସଦର, ବୈଦ୍ୟନାଥପୁର, ଗୋପାଳପୁର ଓ ବଡ଼ବଜାର ଅଞ୍ଚଳରେ ବିଭିନ୍ନ ତାଲା ବନ୍ଦ ଘରୁ ଲୁଟପାଟ ହେଉଥିଲା। ଏହି ଘଟଣା ପୋଲିସ ପାଇଁ ଚିନ୍ତାର କାରଣ ପାଲଟିଥିଲା। ବୁଧବାର ରାତିରେ ଗୋଳନ୍ଥରା ଥାନା ଅନ୍ତର୍ଗତ କନିଷି ହାଟ ଅଞ୍ଚଳରେ ଏକ ଘରେ କିଛିଜଣ ଦୁର୍ବୃତ୍ତ ପଶି ଡକାୟତି ଯୋଜନା କରୁଥିଲେ। ଖବରପାଇ ପାଟ୍ରୋଲିଂ କରୁଥିବା ଗୋଳାନ୍ଥରା ପୋଲିସ ଚଢ଼ାଉ କରିଥିଲା। ପୋଲିସକୁ ଦେଖି ୨ ଦୁର୍ବୃତ୍ତ ବୋମା ଫିଙ୍ଗି ଘଟଣାସ୍ଥଳରୁ ଚମ୍ପଟ ମାରିଥିଲେ। ହେଲେ ଅନ୍ୟ ୫ ଚୋରଙ୍କୁ ପୋଲିସ କାବୁ କରିବାରେ ସକ୍ଷମ ହୋଇଥିଲା। ସେମାନଙ୍କଠାରୁ ଗୋଟିଏ କାତି, ଦୁଇଟି ଲୁହାରଡ଼, ୩ ବୋମା, ୪୦ ଗ୍ରାମ ସୁନା ଅଳଙ୍କାର, ୨ କେଜି ୬୦୦ ଗ୍ରାମ ରୂପା, ୨୦ ହଜାର ଟଙ୍କା ଜବତ କରାଯାଇଥିଲା। ୫ ଅଭିଯୁକ୍ତଙ୍କୁ ପଚରାଉଚରା ବେଳେ ସେମାନେ ଗୋଳନ୍ଥରା, ବ୍ରହ୍ମପୁର ସଦର, ବୈଦ୍ୟନାଥପୁର, ଗୋପାଳପୁର ଓ ବଡ଼ବଜାର ଅଞ୍ଚଳର ବିଭିନ୍ନ ଘରୁ ଚୋରି କରିଥିବା ସ୍ବୀକାର କରିଥିଲେ। ଏନେଇ ଗୋଳନ୍ଥରା ଥାନା ପୋଲିସ ଏକ ମାମଲା(ନଂ. ୮୦/୨୨) ରୁଜୁ କରିିଛି। ଅଭିଯୁକ୍ତଙ୍କ ନାମରେ ଗୋଳନ୍ଥରା ଥାନାରେ ୫ଟି, ବ୍ରହ୍ମପୁର ସଦର ଥାନାରେ ୩ଟି, ବୈଦ୍ୟନାଥପୁର ଥାନାରେ ୨ଟି, ଗୋପାଳପୁର ୨ଟି ଓ ବଡ଼ବଜାର ୨ଟି ମାମଲା ରହିଥିବା ସଦର ଏସଡିପିଓ ଶିବ ଶଙ୍କର ମହାପାତ୍ର ସୂଚନା ଦେଇଛନ୍ତି। ଚୋରି ଘଟଣାରେ ସମ୍ପୃକ୍ତ ଅନ୍ୟ ଅଭିଯୁକ୍ତଙ୍କୁ ଖୁବଶୀଘ୍ର କାବୁ କରାଯିବ ବୋଲି ପୋଲିସ କହିଛି।