ଭାରତର ଅନ୍ୟତମ ସଫଳ ଅଧିନାୟକ ମହେନ୍ଦ୍ର ସିଂ ଧୋନୀ ୨୦୧୪ରେ ଆଜିର ଦିନରେ ଟେଷ୍ଟ କ୍ରିକେଟରୁ ଅବସର ନେଇଥିଲେ। ୬ ବର୍ଷ ପୂର୍ବେ ମେଲବୋର୍ନରେ ଅଷ୍ଟ୍ରେଲିଆ ବିପକ୍ଷରେ ଖେଳାଯାଇଥିବା ତୃତୀୟ ଟେଷ୍ଟ ମ୍ୟାଚ ପରେ ଧୋନୀ ହଠାତ୍ ଅବସର ଘୋଷଣା କରି କ୍ରିକେଟ ପ୍ରଶଂସକଙ୍କୁ ଆଶ୍ଚର୍ଯ୍ୟ କରିଥିଲେ। ଭାରତ ପାଇଁ ୯୦ଟି ଟେଷ୍ଟ ମ୍ୟାଚ ଖେଳିଥିବା ଧୋନୀ ହାରାହାରି ୩୮.୦୯ରେ ୪୮୭୬ ରନ ସଂଗ୍ରହ କରିଛନ୍ତି। ଟେଷ୍ଟ କ୍ରିକେଟରେ ତାଙ୍କର ସର୍ବାଧିକ ସ୍କୋର ଥିଲା ୨୨୪ ଯାହା ସେ ଅଷ୍ଟ୍ରେଲିଆ ବିପକ୍ଷରେ ସ୍କୋର କରିଥିଲେ। ସେ ଏହି ଫର୍ମାଟରେ ୬ଟି ଶତକ ଏବଂ ୩୩ ଅର୍ଦ୍ଧଶତକ ହାସଲ କରିଛନ୍ତି। ୨୦୧୪ରେ, ଅଷ୍ଟ୍ରେଲିଆ ଗସ୍ତରେ ଯାଇଥିବା ଭାରତୀୟ ଦଳ ପ୍ରଥମ ଟେଷ୍ଟ ମ୍ୟାଚ ଆଡିଲେଡରେ ୪୮ ରନ ଏବଂ ବ୍ରିସବେନ୍ରେ ଦ୍ୱିତୀୟ ଟେଷ୍ଟ ମ୍ୟାଚ ୪ ଉଇକେଟରେ ପରାସ୍ତ ହୋଇଥିଲା। ଆଙ୍ଗୁଠିରେ ଆଘାତ ଲାଗି ଧୋନୀ ପ୍ରଥମ ଟେଷ୍ଟ ମ୍ୟାଚରେ ଖେଳିପାରି ନ ଥିଲେ ଏବଂ ତାଙ୍କ ସ୍ଥାନରେ ବିରାଟ କୋହଲି ଦାୟିତ୍ୱରେ ରହିଥିଲେ। ମେଲବୋର୍ନ ଟେଷ୍ଟରେ ଧୋନୀ ଦଳକୁ ଫେରିଥିଲେ ଏବଂ କୌଣସି ପ୍ରକାରେ ଏହି ଟେଷ୍ଟ ଦଳ ଭାରତକୁ ଡ୍ର କରିବାରେ ସଫଳ ହୋଇଥିଲେ। ମ୍ୟାଚ ଶେଷ ହେବା ପରେ ଧୋନି ଡ୍ରେସିଂ ରୁମରେ ପହଞ୍ଚିବା ପରେ ସେ ସାଥୀ ଖେଳାଳିଙ୍କୁ ତାଙ୍କ ଅବସର ବିଷୟରେ ସୂଚନା ଦେଇଥିଲେ। ଧୋନୀ ଯଦି ଚାହିଁଲେ ସହଜରେ ୧୦୦ ଟେଷ୍ଟ ଖେଳିଥାନ୍ତେ, କିନ୍ତୁ ପୂର୍ବପରି ସେ ନିଜ ନିଷ୍ପତ୍ତି ଅନୁଯାୟୀ ଏହି ନିଷ୍ପତ୍ତି ନେଇଥିଲେ।
ଭାରତର ସଫଳ ଅଧିନାୟକ ଧୋନୀଙ୍କ ଅଧୀନରେ ଟିମ ଇଣ୍ଡିଆ ୬୦ଟି ଟେଷ୍ଟ ମ୍ୟାଚ ଖେଳିଛି ଯେଉଁଥିରେ ଦଳ ୨୭ ଟି ଜିତିଛି। ଏହା ବ୍ୟତୀତ ଧୋନୀ ହେଉଛନ୍ତି ଏକମାତ୍ର ଖେଳାଳି ଯିଏକି ତାଙ୍କ ଅଧିନାୟକତ୍ୱରେ ଟି -୨୦ ବିଶ୍ୱକପ, ଏକଦିବସୀୟ ବିଶ୍ୱକପ ଏବଂ ଚାମ୍ପିଅନ୍ସ ଟ୍ରଫି ଟାଇଟଲ ଜିତିଛନ୍ତି। ଚଳିତ ବର୍ଷ ଅଗଷ୍ଟ ୧୫ରେ ଧୋନୀ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିଛନ୍ତି। ଯଦିଓ ସେ ଇଣ୍ଡିଆନ ପ୍ରିମିୟର ଲିଗ ଖେଳିବା ଜାରି ରଖିବେ।