ଶ୍ରୀନଗର,୧୩ ।୮: କରୋନା ମହାମାରୀ ପରେ ଚଳିତ ବର୍ଷ ଆରମ୍ଭ ହୋଇଥିବା ବାବା ଅମରନାଥଙ୍କ ଦର୍ଶନ କରିଥିବା ଶ୍ରଦ୍ଧାଳୁ ଗତ ୫ ବର୍ଷର ରେକର୍ଡ ଭାଙ୍ଗିଛନ୍ତି । ଅମରନାଥ ଯାତ୍ରାରେ ଏଥର ୩.୬୫ ଲକ୍ଷ ଶ୍ରଦ୍ଧାଳୁ ଭୋଳା ବାବାଙ୍କ ପବିତ୍ର ଗୁମ୍ଫା ପର୍ଯ୍ୟନ୍ତ ପହଞ୍ଚି ହୀମ ଶିବଲିଙ୍ଗର ଦର୍ଶନ କରିଛନ୍ତି । ୨୦୧୬ ପରେ ସବୁଠାରୁ ଅଧିକ ସଂଖ୍ୟାରେ ଭକ୍ତ ଏଥର ବାବାଙ୍କ ଦର୍ଶନ କରିଥିବା କୁହାଯାଉଛି । ଶୁକ୍ରବାର ଅମରନଥ ଯାତ୍ରା ଶେଷ ହୋଇଥିବା ବେଳେ ଉପରାଜ୍ୟପାଳ ମନୋଜ ସିହ୍ନା ଏହି ସୂଚନା ଦେଇଛନ୍ତି ।
ଉପରାଜ୍ୟପାଳ କହିଛନ୍ତି, ୪୪ ଦିନ ପର୍ଯ୍ୟନ୍ତ ଚାଲିଥିବା ଅମରନାଥ ଯାତ୍ରାରେ ୨୦ ଦିନ ଖରାପ ପାଣିପାଗ ଯୋଗୁ ଯାତ୍ରା ବାଧାପ୍ରାପ୍ତ ହୋଇଥିଲା । ଏହାପରେ ବି ଯାତ୍ରା ସନ୍ତୋଷଜନକ ଥିଲା । ଯାତ୍ରୀଙ୍କ ଦ୍ୱାରା କରାଯାଇଥିବା ଆରଏସଏସ ସର୍ବେକ୍ଷଣ ବିଭିନ୍ନ ମାନକ ଦୃଷ୍ଟିରୁ ୯୩ ପ୍ରତିଶତ ସନ୍ତୁଷ୍ଟ ରେଟିଂ ଦର୍ଶାଇଛି । ଏଥିରେ ୭୩ ପ୍ରତିଶତ ଭକ୍ତ ପ୍ରଥମ ୨୦ ଦିନରେ ଦର୍ଶନ କରିଛନ୍ତି ।