ଦିଲ୍ଲୀର ହର ପ୍ରକାଶ ରିଶି। ବୟସ ୭୫ ବର୍ଷରୁ ଉର୍ଦ୍ଧ୍ୱ। ହେଲେ ତାଙ୍କ ଭିତରେ ଭରି ରହିଛି ରେକର୍ଡ କରିବାର ନିଶା। ଫଳରେ ତାଙ୍କ ନାମରେ ଏବେ ୨୦ରୁ ଉର୍ଦ୍ଧ୍ୱ ଗିନିଜ୍ ଓ୍ବାର୍ଲଡ ରେକର୍ଡ ରହିଛି। ସେଇଥିପାଇଁ ଅନେକେ ତାଙ୍କୁ ‘ଗିନିଜ ରିଶି’ ବୋଲି ମଧ୍ୟ ଡାକନ୍ତି। ଏଇ ରେକର୍ଡ ନିଶାରେ ସେ ନିଜ ଦେହରେ ଅନେକ ଟାଟୁ ବି କରାଇଛନ୍ତି। ଆଉ ଏହିସବୁ ଟାଟୁ ବିଭିନ୍ନ ଦେଶର ରାଷ୍ଟ୍ରୀୟ ପତାକାର ଅଟେ। ମୁଣ୍ଡ, ମୁହଁ, ବେକ, ପିଠି, ପେଟ ଆଦି ସ୍ଥାନରେ ସେ ୩୬୬ଟି ପତାକାର ଟାଟୁ କରି ଗିନିଜ ଓ୍ବାର୍ଲଡ ରେକର୍ଡସ୍ରେ ସ୍ଥାନ ପାଇଛନ୍ତି। ଏହାବାଦ ସେ ରେକର୍ଡ ପାଇଁ ଏତେ ପାଗଳ ଯେ, ୪୯୬ଟି ଷ୍ଟ୍ରକୁ ପାଟିରେ ଧରି ରଖିବା ଲାଗି ନିଜର ସବୁ ଦାନ୍ତ ବାହାର କରି ଦେଇଛନ୍ତି। ତା’ସହ ଦିଲ୍ଲୀରୁ ସାନ ଫ୍ରାନ୍ସିସ୍କୋସ୍ଥ ରିପ୍ଲିସ୍ ବିଲିଭ ଅର ନଟ୍ ମ୍ୟୁଜିୟମକୁ ଯାଇ ପିଜ୍ଜା ଡେଲିଭର୍ କରି ରେକର୍ଡ କରିଛନ୍ତି। ତେବେ ସେ ପ୍ରଥମ ରେକର୍ଡ ନିଜର ଦୁଇ ବନ୍ଧୁଙ୍କ ସହ ସ୍କୁଟରରେ ଅବିରତଭାବେ ୧୦୦୧ ଘଣ୍ଟା ଯାଇ କରିଥିଲେ। ତାପରଠାରୁ ସେ ଅନେକ ଅଜବ ଯୋଜନା କରି ରେକର୍ଡ ପରେ ରେକର୍ଡ କରି ଚାଲିଛନ୍ତି।