ସାଧାରଣତଃ ବିମାନ ଯାତ୍ରା ବହୁ ଶାନ୍ତିଦାୟକ ବୋଲି କୁହାଯାଏ। ବସ୍ କିମ୍ବା ଟ୍ରେନରେ ଯାତ୍ରା କରିବା ସମୟରେ ଅଧିକ କୋଳାହଳ ଶୁଣିବାକୁ ମିଳିଥାଏ। ବସ୍ ଏବଂ ଟ୍ରେନ୍ରେ ଅନେକ ପ୍ରକାରର ଲୋକ ବିଭିନ୍ନ ସାମଗ୍ରୀ ବିକ୍ରୟ କରୁଥିବା ଦେଖିବାକୁ ମିଳିଥାଏ। କିନ୍ତୁ ବିମାନରେ ଏସବୁ ଦେଖିବାକୁ ମିଳେନାହିଁ। ଏଥିରେ ଯାତ୍ରା କରିବା ଅତ୍ୟନ୍ତ ଶାନ୍ତିପୂର୍ଣ୍ଣ। ମାତ୍ର ଏବେ ସୋସିଆଲ ମିଡିଆରେ ଏକ ଭିଡିଓ ଭାଇରାଲ ହେଉଛି, ଯାହାକୁ ଦେଖିଲେ ଆଶ୍ଚର୍ଯ୍ୟ ହେବେ। ବିମାନରେ ଜଣେ ଏୟାରହୋଷ୍ଟେସ୍ ସ୍ପିକର ଦେଇ ଖୁବ୍ ଜୋର୍ରେ ଗୀତ ଗାଉଛନ୍ତି। ଫଳରେ ଯାତ୍ରୀମାନେ ଅସନ୍ତୋଷ ପ୍ରକାଶ ସହ ହୋ-ହଲ୍ଲା କରୁଛନ୍ତି।
ଦକ୍ଷିଣ ପଶ୍ଚିମ ଏୟାରଲାଇନ୍ସର ଏକ ବିମାନରେ ଏପରି ଘଟଣା ଘଟିଛି। ସକାଳ ୬ଟାରେ ସ୍ପିକରରେ ଏକ ଗୀତ ଗାଇ ଏୟାରହୋଷ୍ଟେସ୍ ଯାତ୍ରୀମାନଙ୍କ ନିଦ ଭାଙ୍ଗି ଦେଇଥିଲେ। ଯଦିଓ ଏୟାରହୋଷ୍ଟେସ ଆଶା କରିଥିଲେ ଯେ, ଲୋକମାନେ ତାଙ୍କ ଏହି ଗୀତକୁ ପସନ୍ଦ କରିବେ, କିନ୍ତୁ ଏହା ଠିକ୍ ବିପରୀତ ହେଲା।
ଲୋକେ ଖୁସି ହେବା ପରିବର୍ତ୍ତେ କ୍ରୋଧିତ ଉଠିଲେ। ବିମାନ କର୍ମଚାରୀ ହଟ୍ନି ହ୍ୟୁଷ୍ଟନ ସକାଳେ ସ୍ପିକରରେ ଗୀତ ଗାଇଥିଲେ। ସେ ଭାବିଥିଲେ ଲୋକମାନେ ସକାଳୁ ଉଠିବା ପାଇଁ ଏହି ଉପାୟକୁ ପସନ୍ଦ କରିବେ। ମାତ୍ର ତାଙ୍କର ବେସୁରା ସ୍ବର ଶୁଣି ଅନେକ ଲୋକ ରାଗି ଯାଇଥିଲେ।
କେହି ଜଣେ ଯାତ୍ରୀ ଏହି ଘଟଣାର ଏକ ଭିଡିଓ ପ୍ରସ୍ତୁତ କରି ସୋସିଆଲ ମିଡିଆରେ ଶେୟାର କରିଥିଲେ। ଏହାକୁ ଏପର୍ଯ୍ୟନ୍ତ ୩ ଲକ୍ଷରୁ ଅଧିକ ଥର ଦେଖାସରିଲାଣି। ଭିଡିଓରେ କ୍ୟାପଶନ ଲେଖାଯାଇଛି, ଯେତେବେଳେ ସକାଳ ୬ଟାରେ ବିମାନ କର୍ମଚାରୀ ଏପରି କରିବାକୁ ନିଷ୍ପତ୍ତି ନିଅନ୍ତି। ଅନେକ ଲୋକ ଏହି ଭିଡିଓ ଉପରେ ମନ୍ତବ୍ୟ ଦେଇଛନ୍ତି। ଜଣେ ୟୁଜର କହିଛନ୍ତି, ବିମାନ କର୍ମଚାରୀ ସ୍ବରରେ ମାଧୁର୍ଯ୍ୟ ନାହିଁ। ଅନେକ ଲୋକ ଲେଖିଛନ୍ତି, ଏହା ଶୁଣିବା ଅପେକ୍ଷା ବିମାନରୁ ଡେଇଁ ପଡ଼ିବା ଭଲ। ଅଧିକାଂଶ ଏହାକୁ ବିରୋଧ କରି ନକାରାତ୍ମକ ମନ୍ତବ୍ୟ ଦେଇଛନ୍ତି।