ବ୍ରହ୍ମପୁର/ଗୋପାଳପୁର,୩ା୩(ଡି.ଏନ୍.ଏ.): ଖୁବ୍ଶୀଘ୍ର ରଙ୍ଗେଇଲୁଣ୍ଡା ଏୟାରଷ୍ଟ୍ରିପ୍ରୁ ବିମାନ ଉଡ଼ାଣ ଆରମ୍ଭ ହେବ। ଏନେଇ ରାଜ୍ୟ ବାଣିଜ୍ୟ ଓ ପରିବହନ ବିଭାଗ ଏବଂ ବୈଷୟିକ ଶିକ୍ଷା ବିକାଶ ବିଭାଗର ପ୍ରମୁଖ ସଚିବ ଉଷା ପାଢ଼ୀ ସୂଚନା ଦେଇଛନ୍ତି। ‘ଉଡାନ୍’ ଯୋଜନାର ଅନ୍ତର୍ଭୁକ୍ତ ହୋଇଥିବା ରଙ୍ଗେଇଲୁଣ୍ଡା ଏୟାରଷ୍ଟ୍ରିପ୍ରୁ କ୍ଷୁଦ୍ର ବିମାନ ପ୍ରାଥମିକ ପର୍ଯ୍ୟାୟରେ ଉଡ଼ାଣ ହେବ। ଏଠାରୁ ୯ରୁ ୧୦ ସିଟ୍ ବିଶିଷ୍ଟ କ୍ଷୁଦ୍ର ନନ୍ସିଡ୍ୟୁଲ୍ଡ ବିମାନ ଚଳାଚଳ ହେବ। ଏହାସହ ସପ୍ତାହକୁ ଦୁଇଥର ରଙ୍ଗେଇଲୁଣ୍ଡାରୁ ଭୁବନେଶ୍ୱର ଅଭିମୁଖେ ବିମାନ ଉଡ଼ାଣ ହେବ। ଶୁକ୍ରବାର ସଚିବ ପାଢ଼ୀ ରଙ୍ଗେଇଲୁଣ୍ଡା ଏୟାରଷ୍ଟ୍ରିପ୍ ପଡ଼ିଆର ସମ୍ପ୍ରସାରଣ ଓ ଭିତ୍ତିଭୂମି ତଦାରଖ କରି ଫେରିଛନ୍ତି। ପୂର୍ବାହ୍ନରେ ବିମାନ ବନ୍ଦର ପରିଦର୍ଶନ କରିବା ସହ ନିକଟରେ ଥିବା କ୍ରିଉଶେଡ୍ରେ ଜିଲା ପରିଷଦ ମୁଖ୍ୟ ଉନ୍ନୟନ ଅଧିକାରୀ ଭି.କୀର୍ତ୍ତିଭାସନ, ବ୍ରହ୍ମପୁର ଏସ୍ପି ଡ. ଶ୍ରବଣ ବିବେକ୍ ଏମ୍, ଅତିରିକ୍ତ ଜିଲାପାଳ ପ୍ରିୟରଞ୍ଜନ ପୃଷ୍ଟି, ବ୍ରହ୍ମପୁର ଉପଜିଲାପାଳ ଆଶୁତୋଷ କୁଲକର୍ଣ୍ଣି ଓ ଅନ୍ୟ ବିଭାଗର ବରିଷ୍ଠ ଅଧିକାରୀଙ୍କ ସହିତ ଆଲୋଚନା କରିଛନ୍ତି। ବର୍ତ୍ତମାନ କେତେ କାମ ହୋଇଛି, କେଉଁ କେଉଁ କାମ ରହିଛି ସେ ନେଇ ଆଲୋଚନା କରିଛନ୍ତି।
