ଓ୍ବାଶିଂଟନ,୧୨।୧ : ଆମେରିକାରେ ବିମାନ ସେବା ଗୁରୁବାର ଠାରୁ ଆରମ୍ଭ ହୋଇପାରେ। ଫେଡେରାଲ ଆଭିଏଶନ ଆଡମିନିଷ୍ଟ୍ରେଶନ କମ୍ପ୍ୟୁଟରରେ ଯାନ୍ତ୍ରିକ ତ୍ରୁଟି ଯୋଗୁଁ ବୁଧବାର ଦିନ ସାରା ଦେଶରେ ବିମାନ ସେବା ବନ୍ଦ ହୋଇଯାଇଥିଲା। ଫ୍ଲାଇଟ ଆୱାରର ରିପୋର୍ଟ ଅନୁଯାୟୀ, ଏହି ସମୟ ମଧ୍ୟରେ ଆମେରିକାରେ ପ୍ରାୟ ୧୦ ହଜାର ବିମାନ ବିଳମ୍ବ ହୋଇଥିଲା ଏବଂ ପ୍ରାୟ ୧୩୦୦ ବିମାନ ବାତିଲ କରାଯାଇଥିଲା। ଆମେରିକାରେ ୧୧ ସେପ୍ଟେମ୍ବର ୨୦୦୧ ଆତଙ୍କବାଦୀ ଆକ୍ରମଣର ପ୍ରାୟ ୨୦ ବର୍ଷ ପରେ ଏପରି ସ୍ଥିତି ସୃଷ୍ଟି ହୋଇଥିଲା, ଯେତେବେଳେ ସମଗ୍ର ଦେଶରେ ବିମାନ ସେବା ପ୍ରଭାବିତ ହୋଇଥିଲା। ଦକ୍ଷିଣ-ପଶ୍ଚିମ ଏୟାରଲାଇନ୍ସ, ୟୁନାଇଟେଡ ଏୟାରଲାଇନ୍ସ, ଡେଲଟା ଏୟାରଲାଇନ୍ସ ଭଳି ଆମେରିକାର ପ୍ରମୁଖ ବିମାନ ସେବାଗୁଡିକର ପ୍ରାୟ ୪୦ ପ୍ରତିଶତ ବିମାନ ବିଳମ୍ବ କିମ୍ବା ବାତିଲ କରାଯାଇଥିଲା। ଏହି କ୍ଷେତ୍ର ସହିତ ଜଡିତ ବିଶେଷଜ୍ଞମାନେ କହିଛନ୍ତି ଯେ ଗୁରୁବାର ଠାରୁ ବିମାନ ସେବା ପୁଣି ସାଧାରଣ ଭାବରେ କାର୍ଯ୍ୟ ଆରମ୍ଭ କରିବ।
ଆମେରିକାର ଫେଡେରାଲ ଆଭିଏଶନ ଆଡମିନିଷ୍ଟ୍ରେଶନ କମ୍ପ୍ୟୁଟର ସିଷ୍ଟମରେ ତ୍ରୁଟି ଦେଖାଦେଇଥିବା ନେଇ ସାଇବର ଆକ୍ରମଣ ହେବାର ସମ୍ଭାବନା ପ୍ରକାଶ ପାଇଥିଲା। ତେବେ ହ୍ବାଇଟ ହାଉସ୍ ଏକ ବିବୃତ୍ତି ଜାରି କରି ସ୍ପଷ୍ଟ କରିଛି ଯେଏଫଏଏରେ ସାଇବର ଆକ୍ରମଣର କୌଣସି ପ୍ରମାଣ ମିଳିନାହିଁ। ହ୍ବାଇଟ ହାଉସର ପ୍ରେସ ସଚିବ କରୀନ ଜାନ ପିଏରେ ଏହି ସୂଚନା ଦେଇଛନ୍ତି। ତେବେ ଏହି ଘଟଣାର ପୁଙ୍ଖାନୁପୁଙ୍ଖ ତଦନ୍ତ କରିବାକୁ ରାଷ୍ଟ୍ରପତି ଜୋ ବାଇଡେନ ବୈଷୟିକ ବିଭାଗକୁ ନିର୍ଦ୍ଦେଶ ଦେଇଛନ୍ତି। ଏଫଏଏ ଅଧିକାରୀ କହିଛନ୍ତି ଯେ ପ୍ରାଥମିକ ଅନୁସନ୍ଧାନରେ ସେମାନଙ୍କ ସିଷ୍ଟମରେ ଡାଟାବେସ ଫାଇଲରେ ଏକ ସମସ୍ୟା ଦେଖାଦେଇଥିଲ। ଏହି ଡାଟାବେସ ଫାଇଲ ମୁଖ୍ୟ ସିଷ୍ଟମ ଏବଂ ବ୍ୟାକଅପ ସିଷ୍ଟମକୁ ପ୍ରଭାବିତ କରିଥିଲା, ଯାହା ଯୋଗୁ ଏହି ସମସ୍ୟା ସୃଷ୍ଟି ହୋଇଥିଲା।