ଲଙ୍ଗଳେଶ୍ୱର, ୨୬ା୮(ଡି.ଏନ.ଏ.): ବନ୍ୟାକୁ ୫ ଦିନ ବିତିଯାଇଥିବା ବେଳେ ଜଳସ୍ତର କମୁଥିବାରୁ ଲୋକମାନେ ଧୀରେ ଧୀରେ ସ୍ବାଭାବିକ ଅବସ୍ଥାକୁ ଫେରୁଛନ୍ତି। ବାଲେଶ୍ୱର ଜିଲା ବାଲିଆପାଳ ବ୍ଲକ ସର୍ବାଧିକ କ୍ଷତିଗ୍ରସ୍ତ ତାଳପଦା ଗ୍ରାମକୁ କୋଷ୍ଟକେନାଲ ଉପରେ ନିର୍ମାଣ ହୋଇଥିବା ଅସ୍ଥାୟୀ ପୋଲ ବୁଧବାର ରାତିରେ ବନ୍ୟାର ପ୍ରଖରସ୍ରୋତରେ ଭାସିଯାଇଛି। ତାଳପଦା ଗ୍ରାମକୁ ସ୍ଥାୟୀ ଭାବେ ସବୁଦିନିଆ ରାସ୍ତା ନ ଥିବା ବେଳେ ସେଠାକାର ଗ୍ରାମବାସୀ ଯାତାୟାତରେ ନାନା ଅସୁବିଧାର ସମ୍ମୁଖୀନ ହେଉଛନ୍ତି। ତେବେ କୁହ୍ଲାଚଡ ଗ୍ରାମରୁ ତାଳପଦାକୁ ସଂଯୋଗ କରିବା ପାଇଁ ଗ୍ରାମ ଉନ୍ନୟନ ବିଭାଗ ପକ୍ଷରୁ ଏକ ସ୍ଥାୟୀ ପୋଲ ନିର୍ମାଣ କାର୍ଯ୍ୟ ଚାଲୁୁରହିଥିବା ବେଳେ ଲୋକମାନଙ୍କର ଯାତାୟାତ ପାଇଁ ସେଠାରେ ଏକ ଅସ୍ଥାୟୀ ପୋଲ ନିର୍ମାଣ କରାଯାଇଥିଲା। ବନ୍ୟା ସମୟରେ ପାୱାର ବୋଟ ସାହାଯ୍ୟରେ ତାଳପଦା ଗ୍ରାମକୁ ଯୋଗାଯୋଗ କରାଯାଉଥିଲା।
ମାତ୍ର ନଦୀର ଜଳସ୍ତର କମିବା ଫଳରେ ଏବେ ବୋଟ ସାହାଯ୍ୟରେ ଯିବା ଏବେ ଅସମ୍ଭବ ହୋଇପଡିଛି। ଗ୍ରାମକୁ ଯାତାୟାତ କରିବା ପାଇଁ ଅନ୍ୟ କୌଣସି ବ୍ୟବସ୍ଥା ନାହିଁ। ତେଣୁ ଭାଙ୍ଗିଯାଇଥିବା ଅସ୍ଥାୟୀ ପୋଲକୁୁ ଯଥାଶୀଘ୍ର ମରାମତି କରି ଯାତାୟାତ ବ୍ୟବସ୍ଥା କରିବା ପାଇଁ ଗ୍ରାମବାସୀ ଦାବି କରିଛନ୍ତି।
