ଭବାନୀପାଟଣା,୮।୮(ସ୍ବ.ପ୍ର.): ଲଘୁଚାପ ପ୍ରଭାବରେ କଳାହାଣ୍ଡି ଜିଲାରେ ଗତ ୨ ଦିନ ଧରି ଲଗାଣ ବର୍ଷା ଜାରି ରହିଛି। ଫଳରେ ଜିଲାରେ ପ୍ରବାହିତ ହେଉଥିବା ବିଭିନ୍ନ ନଦୀ ନାଳରେ ଜଳସ୍ତର ବୃଦ୍ଧି ପାଇବାରେ ଲାଗିଛି। ସେହିପରି ଅନେକ ମୁଖ୍ୟ ରାସ୍ତାରେ ବନ୍ୟା ପାଣି ପ୍ରବାହିତ ହେଉଥିବାରୁ ଯୋଗାଯୋଗ ସମ୍ପୂର୍ଣ୍ଣ ବିଚ୍ଛିନ୍ନ ହୋଇଛି। ଏପରିସ୍ଥଳେ ଉପରମୁଣ୍ଡରେ ପ୍ରବଳ ବର୍ଷା ଓ ମଙ୍ଗଳପୁର ବ୍ୟାରେଜରୁ ୨ଟି ଗେଟ୍ ଖୋଲିଯିବା ପରେ ରବିବାର ବିଳମ୍ବିତ ରାତିରୁ ଜୁନାଗଡ଼ ସହର ନିକଟସ୍ଥ ହାତୀ ନଦୀରେ ବନ୍ୟା ପରିସ୍ଥିତି ସୃଷ୍ଟି ହୋଇଛି।
ଏନେଇ ନଦୀ କୂଳରେ ଥିବା ଗ୍ରାମବାସୀଙ୍କ ମଧ୍ୟରେ ଭୟର ବାତାବରଣ ଦେଖାଦେଇଛି। ଏହାସହ ଚାଷ ଜମିଗୁଡିକ ଜଳମଗ୍ନ ହୋଇପଡିଛି। ଯାହାକୁ ନେଇ ଚାଷୀଙ୍କ ମଧ୍ୟରେ ଚିନ୍ତାର କାରଣ ପାଲଟିଛି। ଏପରି କି ଚଳିତ ବର୍ଷ ହାତୀ ନଦୀରେ ଏହା ସବୁଠୁ ବଡ଼ ବନ୍ୟା ହୋଇଥିବା ଦେଖିବାକୁ ମିଳିଛି। ଏପଟେ ଚିଚୈଗୁଡ଼ା-ଜୁନାଗଡ଼ ପିଡବ୍ଲୁଡି ମୁଖ୍ୟ ରାସ୍ତାରେ ହାତୀନଦୀର ବନ୍ୟାଜଳ ପ୍ରବାହିତ ହେଉଥିବାରୁ ଯାତାୟତ ଠପ୍ ହୋଇଯାଇଛି। ସେହିପରି କୁରୁଗୁଡ଼ା-ନାନ୍ଦୋଲ ମୁଖ୍ୟ ରାସ୍ତା, ମାଲପଡ଼ା-ଖୁର୍ସେଲଗୁଡ଼ା ପୋଲ ଉପରେ ବନ୍ୟା ଜଳ ପ୍ରବାହିତ ହେଉଥିବାରୁ ସେଠାରେ ମଧ୍ୟ ଯାତାୟତ ବନ୍ଦ ରହିଛି।
ସେହିପରି ଜୁନାଗଡ଼ ବ୍ଲକ ବଣ୍ଡାକୁଟ୍ରା ନିକଟରେ ଥିବା ହାଲେର ଜୋର ଆପ୍ରୋଚ ପୋଲରେ ରବିବାର ସନ୍ଧ୍ୟାରୁ ବନ୍ୟା ପାଣି ପ୍ରବାହିତ ହେଉଛି। ହେଲେ ଏଠାରେ ଅଧିକ ବିପଦ ରହିଥିବାରୁ ପ୍ରଶାସନ ପକ୍ଷରୁ ଉକ୍ତ ରାସ୍ତାକୁ ସେତେବେଳଠୁ ବନ୍ଦ କରିଦିଆଯାଇଛି। ଫଳରେ ଜୁନାଗଡ଼-ଧର୍ମଗଡ଼ ଜାତୀୟ ରାଜପଥ ୧୩୦ସି ମୁଖ୍ୟ ରାସ୍ତାରେ ଯୋଗାଯୋଗ ବିଚ୍ଛିନ୍ନ ହୋଇଛି। ନୂତନ ପୋଲ କାମ ଅଧାପନ୍ତରିଆ ହୋଇଥିବାରୁ ଆପ୍ରୋଚ ପୋଲରେ ଚଳିତ ବର୍ଷ ଏହାକୁ ମିଶାଇ ୩ ଥର ବର୍ଷା ପାଣି ପ୍ରବାହିତ ହୋଇସାରଲାଣି। ହାତୀନଦୀରେ ବନ୍ୟା ଆସିବା ଯୋଗୁ ଏହାରି କୂଳରେ ଥିବା କଲମପୁର ବ୍ଲକ ମାଟିଖାଲ-ବିରିପୁର ରାସ୍ତା ମଧ୍ୟରେ ବନ୍ୟା ଜଳ ପ୍ରବାହିତ ହେଉଛି। ସେହିପରି ଲୋକଙ୍କ ଘରେ ବନ୍ୟା ଜଳ ପ୍ରବେଶ କରିଛି।
