ଗ୍ୟାଙ୍ଗଟକ୍,୧୧।୧୦: ସିକିମରେ ବନ୍ୟାରେ ମୃତ୍ୟୁ ସଂଖ୍ୟା ୯୪କୁ ବୃଦ୍ଧି ପାଇଛି। ଏଥିମଧ୍ୟରୁ ସିକିମରୁ ୩୬ ଟି ଏବଂ ପଶ୍ଚିମବଙ୍ଗରୁ ୫୮ଟି ମୃତଦେହ ଉଦ୍ଧାର କରାଯାଇଛି। ୭୯ ଜଣ ଏବେ ବି ନିଖୋଜ ଥିବା ବେଳେ ୩୦ ଜଣ ଆହତ ହୋଇଛନ୍ତି। ସେମାନଙ୍କୁ ବିଭିନ୍ନ ଡାକ୍ତରଖାନାରେ ଚିକିତ୍ସା କରାଯାଉଛି। ସିକିମ ରାଜ୍ୟ ବିପର୍ଯ୍ୟୟ ନିୟନ୍ତ୍ରଣ କକ୍ଷ (ଏସ୍ଏସ୍ଡିଏମ୍ଏ) ଏବଂ ବେଙ୍ଗଲ ପୋଲିସ ଏହି ସୂଚନା ଦେଇଛନ୍ତି।
ସିକିମ ଏସ୍ଏସ୍ଡିଏମ୍ଏ ଅନୁଯାୟୀ, ବର୍ତ୍ତମାନ ସୁଦ୍ଧା ବନ୍ୟା ହେତୁ ମଙ୍ଗନ, ଗାଙ୍ଗକୋଟ, ପାକିଙ୍ଗ ଏବଂ ନାମଚିରେ ଜିଲାରେ ୩୬ ଜଣଙ୍କର ମୃତ୍ୟୁ ହୋଇଛି। ସେଥିରୁ ୧୦ ଜଣ ଭାରତୀୟ ସେନା ସୈନିକ ସାମିଲ ଅଛନ୍ତି। ସେହିପରି ପଶ୍ଚିମବଙ୍ଗର ଜଲପାଇଗୁଡି, କୁଚବିହାର ଏବଂ କଳିଙ୍ଗପୋଙ୍ଗରୁ ଏ ପର୍ଯ୍ୟନ୍ତ ୫୮ଟି ମୃତଦେହ ଉଦ୍ଧାର କରାଯାଇଛି, ସେଥିମଧ୍ୟରୁ ୬ଜଣ ସେନା କର୍ମଚାରୀ। ସେପଟେ ସିକିମ ମୁଖ୍ୟ ସଚିବ ବି ବି ପାଠକ କହିଛନ୍ତି , ଯଦି ଆସନ୍ତା ଦୁଇ ଦିନ ଧରି ପାଗ ଯଦି ଭଲ ରହେ ତେବେ ମଙ୍ଗନ ଜିଲା ତଥା ଅନ୍ୟାନ୍ୟ ଜିଲାରେ ଫସିଥିବା ପର୍ଯ୍ୟଟକଙ୍କୁ ବାହାର କରାଯିବ।