ବରଗଡ଼ ଅଫିସ,୨୯।୮: ବରଗଡ଼ ଜିଲା ଅମ୍ବାଭୋନା ବ୍ଲକ ଅନ୍ତର୍ଗତ ଚିଖିଲି ଗ୍ରାମରେ ବନ୍ୟା ପରିସ୍ଥିତି ସୃଷ୍ଟି ହୋଇଛି। ଶୁକ୍ରବାରରୁ ବନ୍ୟାଜଳ ତଥା ହୀରାକୁଦ ଜଳଭଣ୍ଡାରର ପଛୁଆ ପାଣି ଉକ୍ତ ଗ୍ରାମରେ ପଶିଥିଲା। ତେବେ ଶନିବାର ସ୍ଥିତି ଗମ୍ଭୀର ହୋଇ ପଡିଛି। ଗ୍ରାମ ସମ୍ପୂର୍ଣ୍ଣ ଜଳମଗ୍ନ ହୋଇଯାଇଥିବା ବେଳେ ପ୍ରାୟ ୧୦ ଫୁଟ ଉଚ୍ଚର ପାଣି ଚାଲୁଛି। ଅନ୍ୟପକ୍ଷରେ ପ୍ରଶାସନ ପକ୍ଷରୁ ଉଦ୍ଧାର କାର୍ଯ୍ୟ ମଧ୍ୟ ଚାଲିଛି। ପ୍ରଶାସନିକ ଅଧିକାରୀ ଏବଂ ଅଗ୍ନିଶମ କର୍ମଚାରୀମାନେ ଉପସ୍ଥିତ ରହି ପରିସ୍ଥିତି ପ୍ରତି ନଜର ରଖିଥିବା ବେଳେ ଡଙ୍ଗା ସାହାଯ୍ୟରେ ଗ୍ରାମବାସୀଙ୍କୁ ନିରାପଦ ସ୍ଥାନକୁ ଆଣୁଛନ୍ତିି। ଶୁକ୍ରବାର କିଛି ଗ୍ରାମବାସୀ ନିଜ ପିଲାଛୁଆ ଏବଂ ଗୃହପାଳିତ ପଶୁଙ୍କୁ ଧରି ଗ୍ରାମରୁ ଚାଲି ଆସିଥିବା ବେଳେ ଆହୁରି ଅନେକ ପକ୍କାଘର ଛାତ ଉପରେ ଆଶ୍ରୟ ନେଇ ବନ୍ୟାଭୟରେ ସାରାରାତି ଉଜାଗର ରହିଥିବା କହିଛନ୍ତି। ତେବେ ଶୁକ୍ରବାରରୁ ଗ୍ରାମର କୌଣସି ଘରେ ଚୂଲି ଜଳି ନ ଥିବା ଯୋଗୁ ବନ୍ୟା ପ୍ରପୀଡ଼ିତଙ୍କୁ ତୁରନ୍ତ ରିଲିଫ ଯୋଗାଇ ଦେବାକୁ ସାଧାରଣରେ ଦାବି ହେଉଛି।