ଆଳି,୨ା୯(ଡି.ଏନ.ଏ.): ଚଳିତ ଥର ବନ୍ୟାରେ କେନ୍ଦ୍ରାପଡ଼ା ଜିଲା ଆଳି ଅଞ୍ଚଳରେ ପ୍ରବାହିତ ଖରସ୍ରୋତା, ବ୍ରାହ୍ମଣୀ ଓ କାଣୀନଦୀରେ ଜଳସ୍ତର ବୃଦ୍ଧି ପାଇ ମୁଖ୍ୟ ରାସ୍ତା ବୁଡ଼ିଯିବା ସହ ହଜାର ହଜାର ହେକ୍ଟର ଚାଷଜମି ବୁଡାଇ ଦେଇଥିଲା। ସପ୍ତାହେ ହେବ ବନ୍ୟା କମିଯାଇଛି। କିନ୍ତୁ ବିଭିନ୍ନ ସ୍ଥାନରେ ଥିବା ଚାଷଜମିକୁ ବନ୍ୟା ଜଳ ବୁଡାଇ ରଖିଛି। ଚଳିତଥର କାଣୀ ନଦୀରେ ବନ୍ୟା ଆସିବା ଦ୍ୱାରା ଆଳି ଧୋୟାଞ୍ଚଳର ଡିମିରିପାଳ, ଅରଗଳ, ଜୁଆଣିଆ, ଗୋବିନ୍ଦପୁର, କେତୁଆପାଳ, ଦେସାହି, ପାଳିମୀ, ଏରଡଙ୍ଗ, ପେତପଡା ଓ ସଂସିଧା ଆଦି ୧୦ ପଞ୍ଚାୟତର ହେକ୍ଟର ହେକ୍ଟର ଧାନ ଓ ପନିପରିବା ଚାଷ ନଷ୍ଟ ହୋଇଯାଇଛି। ବନ୍ୟା ଜଳ କମିଥିବା ବେଳେ କେତୁଆପାଳ, ଏରଡ଼ଙ୍ଗ, ଦେସାହି ଓ ପାଳିମୀ ପଞ୍ଚାୟତରେ ଥିବା ଚାଷ ଜମିରେ ଏବେବି ୧ ଫୁଟ ଲେଖାଏ ପାଣି ଜମି ରହିଛି। ଅଞ୍ଚଳର ଚାଷୀମାନେ ଅଭିଯୋଗ କରିଛନ୍ତି, ପାନପେଣ୍ଠଠାରୁ ଏରଡଙ୍ଗ ପର୍ଯ୍ୟନ୍ତ ହୋଇଥିବା ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଗୁ ଏହି ସମସ୍ୟା ସୃଷ୍ଟି ହୋଇଛି। କାରଣ ଏହି ବାଟ ଦେଇ ଆଳି ବ୍ଲକର କେତୁଆପାଳ, ଦେସାହି, ଏରଡ଼ଙ୍ଗ ଓ ପାଳିମୀ ପଞ୍ଚାୟତ ସମେତ ଯାଜପୁର ଜିଲାର ମଧୁସୂଦନପୁର, ବୋଇତାଳୁପାଟଣା, କଣ୍ଟିପୁର ଆଦି ପଞ୍ଚାୟତର ପାଣି ଯାଇଥାଏ। ତେଣୁ ଏହି ରାସ୍ତା ନିର୍ମାଣ ସମୟରେ ୨୦୧୭ରେ ଦେସାହି ସମବାୟ ସମିତିର ପୂର୍ବତନ ସଭାପତି ସରୋଜ ଜେନା ଓ କେତୁଆପାଳରେ ପୂର୍ବତନ ସରପଞ୍ଚ ରଶ୍ମିତା ଜେନା ତତ୍କାଳୀନ ଜିଲାପାଳ ରେଘୁ ଜୀଙ୍କ ନିକଟରେ ଜଳ ନିଷ୍କାସନକୁ ନେଇ ଅଭିଯୋଗ କରିଥିଲେ। ଜିଲାପାଳ ରେଘୁ ଜୀ ଘଟଣାସ୍ଥଳ ପରିଦର୍ଶନ କରି ଜଳ ନିଷ୍କାସନ ନିମନ୍ତେ ଦୁଇଟି କଲଭର୍ଟ ନିର୍ମାଣ କରିବାକୁ ବିଭାଗକୁ ଜଣାଇଥିଲେ। କିନ୍ତୁ ବିଭାଗୀୟ ଅଧିକାରୀ ଓ ରାସ୍ତା ନିର୍ମାଣ କରୁଥିବା ଠିକାଦାର ଏହାକୁ ଅମାନ୍ୟ କରି ଚାଷଜମିରୁ ୩ ଫୁଟ ଉଚ୍ଚାରେ ରାସ୍ତା ନିର୍ମାଣ କରିଥିଲେ। ଫଳରେ ଚାଷଜମିରେ ବର୍ଷା ଜଳ ନିଷ୍କାସିତ ହୋଇ ନ ପାରି ଜମି ରହିଛି। ତେଣୁ ତୁରନ୍ତ ଏହି ସମସ୍ୟା ସମାଧାନର ଆବଶ୍ୟକତା ଦେଖାଦେଇଛି। ତୁରନ୍ତ ଏହା କରା ନ ଗଲେ ଚାଷୀମାନେ ସେମାନଙ୍କ ବର୍ଷକର ଦାନା ହରାଇବେ। ଚାଷୀମାନଙ୍କ ଜୀବନ ଜୀବିକା ସହ ସମ୍ପୃକ୍ତ ଏହି ସମସ୍ୟାର ତୁରନ୍ତ ସମାଧାନ କରା ନ ଗଲେ ସେମାନେ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେବାକୁ ଅଞ୍ଚଳର ଚାଷୀ ଗଜେନ୍ଦ୍ର ଜେନା, ମାଧବାନନ୍ଦ ମଲିକ, ସୁରେନ୍ଦ୍ର ସାମଲ, ମହେନ୍ଦ୍ର ଦାସ, କଳ୍ପତରୁ ଦାସ, ଜୟଦେବ ମଲିକ ପ୍ରମୁଖ ଚେତାବନୀ ଦେଇଛନ୍ତି।