ଢେଙ୍କାନାଳ ଅଫିସ,୧୪ା୮: ଢେଙ୍କାନାଳ ଜିଲାରେ ଲଗାଣ ବର୍ଷା ଯୋଗୁ ବନ୍ୟା ପରିସ୍ଥିତି ସୃଷ୍ଟି ହୋଇଛି। ଢେଙ୍କାନାଳ ଓ କାମାକ୍ଷାନଗର ରାସ୍ତାର ଗେଙ୍ଗୁଟିଆ ଏବଂ କମଗରା ମଧ୍ୟରେ ଥିବା ବ୍ରାହ୍ମଣୀ ଫୁଲିବାରେ ଲାଗିଛି। ନଦୀରେ ବନ୍ୟା ଜଳ ପ୍ରବେଶ କରିଛି। ଫଳରେ ନଦୀ କୂଳରେ ଥିବା ଜିଲାର ସଦର ବ୍ଲକରେ ଗେଙ୍ଗୁଟିଆ, ସାଙ୍କୁଲେଇ, ଗଁଦିଆ ବ୍ଲକ କଙ୍ଖା, ଭୁବନ ବ୍ଲକର ଓଢଣା, ମାଳ ପୁରା ଓ କାମାକ୍ଷାନଗର ବ୍ଲକ କାମଗରା ଓ ତୁମୁସିଙ୍ଗା ଆଦି ଗ୍ରାମରେ ବନ୍ୟାଜଳ ପ୍ରବେଶ କରିବା ଆଶଙ୍କା ରହିଛି। ସେହିପରି ଓଡ଼ାପଡ଼ା ବ୍ଲକର ଖୁଣ୍ଟୁଝରୀ ପଞ୍ଚାୟତର ବିଦାବନ୍ଧରୁ ଗୁଣ୍ଡିଚାପଡ଼ା ପଞ୍ଚାୟତର ବେଶାଳିଆ ମଧ୍ୟରେ ଥିବା ଗ୍ରାମ ରାସ୍ତାର ବଡ଼ଯୋର ନାଳ ଉପରେ ଥିବା କଲଭର୍ଟ ଉପରେ ଅଣ୍ଟାଏ ଉଚ୍ଚତାରେ ପାଣି ଚାଲୁଥିବାରୁ ବିଦାବନ୍ଧରୁ ବେଶାଳିଆ ଓ ଢେଙ୍କାନାଳ ସହର ମଧ୍ୟରେ ଯୋଗାଯୋଗ ବିଚ୍ଛିନ୍ନ ହୋଇଛି। ବିଦାବନ୍ଧ ଓ ଏହାର ଆଖପାଖ ଗ୍ରାମ ଖୁଣ୍ଟୁଝରୀ, ବଲଭଦ୍ରପୁର, କୋରେଇ ଗାଡ଼ିଆ ଗ୍ରାମବାସୀ ଏଥିପାଇଁ ଜରୁରୀ କାମ ପାଇଁ ସହର କିମ୍ବା ରୋଗୀଙ୍କୁ ନେଇ ଜିଲା ମୁଖ୍ୟ ଚିକିତ୍ସାଳୟ ଆସି ପାରୁନାହାନ୍ତି। ପିଲାମାନେ ପାଠ ପଢ଼ିବାକୁ ବିଦ୍ୟାଳୟକୁ ଯାଇ ପାରୁନାହାନ୍ତି। ରୋଗୀଙ୍କୁ ନେବା ପାଇଁ ଆମ୍ବୁଲାନ୍ସ ମଧ୍ୟ ଆସିପାରୁନି। ଜିଲା ପ୍ରଶାସନ ଏଥିପ୍ରତି ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।