ଖୋର୍ଦ୍ଧା,୭ା୮(ପ୍ରଭାତ ପାଣିଗ୍ରାହୀ): ମହାନଦୀ ଫୁଲୁଛି। ଏହାର ପ୍ରଭାବରେ ଖୋର୍ଦ୍ଧା ବ୍ଲକ ଓରବସିଂ ପଞ୍ଚାୟତର ହିରିମୂଳ ଗ୍ରାମ ପାଣିଘେରରେ ରହି ବାହ୍ୟଜଗତରୁ ବିଛିନ୍ନ ହୋଇପଡ଼ିଛି। ଡିହଖଳା, ଦୁର୍ଗାପୁର, ମାନପୁର ଓ ଧବଳପୁର ଗ୍ରାମ ପାଣିଘେରରେ ରହିଥିଲା। ଏବେ ଏହି ଗାଁଗୁଡିକରୁ ବନ୍ୟାଜଳ ଧୀାର ଧୀରେ ଖସିବାରେ ଲାଗିଛି। ତେବେ ଗ୍ରାମବାସୀଙ୍କ ଚିନ୍ତା ବଢିଛି। ଚାଷ ଉଜୁଡି ଗଲା। ସରକାରଙ୍କ ପକ୍ଷରୁ ଗୋରୁଙ୍କ ପାଇଁ ଗୋଖାଦ୍ୟ ବ୍ୟବସ୍ଥା ହୋଇନାହିଁ। ଆଗକୁ ତୁରନ୍ତ ବ୍ୟବସ୍ଥା କରା ନ ଗଲେ ଗୋରୁ ମୃତ୍ୟୁମୁଖରେ ପଡିବା ଆଶଙ୍କା ଥିବା ଗ୍ରାମବାସୀ କହିଛନ୍ତି।
ବନ୍ୟାଜଳରେ ସାପ ଭାସୁଛନ୍ତି। ଫଳରେ ଗ୍ରାମବାସୀ ଭୟଭୀତ ଅବସ୍ଥାରେ ରହିଛନ୍ତି। ସ୍ଥାନୀୟ ପ୍ରଶାସନ ପକ୍ଷରୁ ରିଲିଫ ବ୍ୟବସ୍ଥା କରାଯାଇଥିଲେ ମଧ୍ୟ ଏହା ପର୍ଯ୍ୟାପ୍ତ ନୁହେଁ ବୋଲି ଗ୍ରାମବାସୀ କହିଛନ୍ତି। ଗ୍ରାମର ଦେବରାଜ ବଳିଆରସିଂ କହିଛନ୍ତି, ଲୋକେ ଭୋକ ଉପାସରେ ରହିଛନ୍ତି। ବନ୍ୟାଜଳଠାରୁ ବିଦ୍ୟୁତକାଟ ଅସହ୍ୟ ହେଲାଣି। ଦିନରେ ବିଦ୍ୟୁତ କାଟ ହେଲେ ଯେନତେନ ପ୍ରକାରେ ଚଳିଯାଉଛି। ମାତ୍ର ରାତିରେ ଭୟ ଲାଗୁଛି। ଅନ୍ଧାରରେ କିଏ କୁଆଡ଼େ ଯିବେ କିଛି ଜାଣିପାରୁନାହାନ୍ତି। ଶୌଚ ଲାଗି ଯିବାକୁ ବାଟନାହିଁ। ସେହିପରି ପରମାନନ୍ଦ ଛୋଟରାୟ କ୍ଷୋଭର ସହ କହିଛନ୍ତି, ବନ୍ୟାଜଳରେ ଶରୀର କୁଣ୍ଡେଇ ହେବା ସହ ଅନେକଙ୍କ ପାଦ ଖାଇଗଲାଣି। ବ୍ଲିଚିଙ୍ଗ ପାଉଡର ଯୋଗାଇ ଦିଆଯାଉନାହିଁ। କେତେ ଅଭିଯୋଗ କରିବୁ, ଏଠି ଗୁହାରି ଶୁଣିବାକୁ କେହି ନାହାନ୍ତି। କାଙ୍ଗୁଳି ମାର୍ଥା କହିଛନ୍ତି, ସବୁ ବ୍ୟବସ୍ଥା କରାଯାଇଥିବା ନେଇ ତିନିଦିନ ହେଲା ଗଣମାଧ୍ୟମ ଆଗରେ ପ୍ରଶାସନ ପକ୍ଷରୁ କୁହାଯାଉଛି। ଏହା ସମ୍ପୂର୍ଣ୍ଣ ମିଥ୍ୟା। କେବଳ ହିରୂମିଳ ଗ୍ରାମରେ ଡଙ୍ଗା ବ୍ୟବସ୍ଥା ହୋଇଛି, ଅନ୍ୟ କିଛି ବ୍ୟବସ୍ଥା ନାହିଁ। ବନ୍ୟା ପରିସ୍ଥିତି ଆହୁରି ଦୁଇ ସପ୍ତାହ ରହିବା ଆଶଙ୍କା କରାଯାୁଛି। ମୁଣ୍ଡୁଳି ପାଣି ପଶିଲେ ଗାଁ ସମ୍ପୂର୍ଣ୍ଣ ବୁଡ଼ିବ। ହିରିମୂଳ, ଡିହଖଳା, ଦୁର୍ଗାପୁର, ଓରମୀ, ମାନପୁର, ବଳପୁର, ଧବଳପୁର, ଶରଧାପୁର ପ୍ରଭୃତି ଗ୍ରାମର ଚାଷଜମି ଜଳମଗ୍ନ ରହିଛି। ଗତବର୍ଷ ଫସଲ କ୍ଷତି ହୋଇଥିଲା, ଏପର୍ଯ୍ୟନ୍ତ କ୍ଷତିପୂରଣ ମିଳିନାହିଁ ବୋଲି ହିିରିମୂଳର କଂଗ୍ରେସ ମାର୍ଥା କହିଛନ୍ତି।
ଏନେଇ ବିଡିଓ କ୍ଷୀରାବ୍ଧି ତନୟା ସାହୁ କହିଛନ୍ତି, ବନ୍ୟା ଘେରରେ ରହିଥିବା ଗ୍ରାମରେ ରନ୍ଧାଖାଦ୍ୟ ବ୍ୟବସ୍ଥା କରାଯାଇଛି। ପର୍ଯ୍ୟାୟ କ୍ରମେ ରନ୍ଧ୍ୟା ଓ ଶୁଖିଲା ଖାଦ୍ୟ ବ୍ୟବସ୍ଥା ହେଉଛି। ଏବେ ଗାଁରୁ ପାଣି ଖସିଛି। ଚାଷଜମି ଜଳମଗ୍ନ ରହିଛି। ଡା. ପରେଶ ଆଚାର୍ଯ୍ୟ କହିଛନ୍ତି, ବନ୍ୟା ଘେରରେ ରହିଥିବା ଅଞ୍ଚଳରେ ସ୍ବାସ୍ଥ୍ୟଟିମ୍ ବୁଲି ବୁଲି ଔଷଧ ଦେବା ଆରମ୍ଭ କରିଛନ୍ତି। ଗୋରୁଗାଇଙ୍କ ସକାଶେ ଗୋଖାଦ୍ୟ ବ୍ୟବସ୍ଥା କରାଯିବ। ଗୋରୁଗାଇଙ୍କ ଚିକିତ୍ସା ଲାଗି ଏକ ଟି ମୁତୟନ କରାଯାଇଛି ବୋଲି ପ୍ରାଣୀଧନ ବିଭାଗ ପକ୍ଷରୁ କୁହାଯାଇଛି।