ଭୁବନ,୧୫ା୮(ଡି.ଏନ୍.ଏ.): ଢେଙ୍କାନାଳ ଜିଲା ଭୁବନ ଅଞ୍ଚଳରେ ଲଗାଣ ବର୍ଷା ଯୋଗୁ ବିଭିନ୍ନ ଅଞ୍ଚଳ ଜଳମୟ ହୋଇଯାଇଛି। ଶୁକ୍ରବାର ରାତିରୁ ପ୍ରବଳ ବର୍ଷା ହୋଇଥିବାରୁ ରାମିଆଳ, ପାଣ୍ଡରା ବ୍ରାହ୍ମଣୀ ନଦୀର ପାଣି ବଢ଼ିଥିଲା। ଫଳରେ ଶନିବାର ଭୁବନକୁ କାମାକ୍ଷାନଗରକୁ ଗମନାଗମନ ବିଚ୍ଛିନ୍ନ ହୋଇଯାଇଥିଲା । ଭୁବନ ବ୍ଲକ ଦୟଣାବିଲ ଗ୍ରାମ ନିକଟରେ ବହି ଯାଇଥିବା ରାମିଆଳ ନଦୀରେ ଅଧିକ ପାଣି ଆସି ୫୩ ନଂ ଜାତୀୟ ରାଜପଥ ଉପରେ ୫ ଫୁଟରୁ ଊର୍ଦ୍ଧ ବନ୍ୟାପାଣି ପ୍ରବାହିତ ହୋଇଥିବା ବେଳେ ପାଣ୍ଡରା ନାଳରେ ଅଧିକ ପାଣି ଆସି ମହୁଲପାଳ ହାଟଛକରୁ ଦୟଣାବିଲ ଅଞ୍ଚଳକୁ ସଂଯୋଗ କରୁଥିବା ପୂର୍ତ୍ତବିଭାଗ ରାସ୍ତାଟି ଭାସିଯାଇ ଗମନାଗମନ ବନ୍ଦ ହୋଇଯାଇଛି । ଦୟଣାବିଲ ପଞ୍ଚାୟତରୁ ଗଡ଼ଗହମପୁର ଗ୍ରାମ ଦେଇ ଭୁବନ ବ୍ଲକକୁ ସଂଯୋଗ କରୁଥିବା ପାଣ୍ଡରା ନାଳରେ ଉପରେ ନିର୍ମାଣାଧୀନ ପୋଲର ଶ୍ରମିକମାନେ ଅତ୍ୟଧିକ ବନ୍ୟାପାଣି ଆସିବାରୁ ଭୟଭୀତ ହୋଇଯାଇଥିଲେ। ବନ୍ୟାପାଣି ଠିକାଦାରଙ୍କ କ୍ୟାମ୍ପରେ ପଶିଯାଇ ୪ଜଣ ଭାସି ଯାଇଥିବା ବେଳେ ୭ଜଣ ଭୟଭୀତ ହୋଇ ଚାଳ ଉପରେ ଆଶ୍ରୟ ନେଇଥିଲେ। ଶ୍ରମିକମାନେ ଭୟଭୀତ ହୋଇ ଆଖପାଖ ଅଳରେ ଥିବା ଲୋକମାନଙ୍କୁ ପାଟିକରି ଡାକିଥିଲେ। ଖବର ପାଇ ଭୁବନ ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ଭାସିଯାଇ ଗଛରେ ଓ ଛପର ଉପରେ ଆଶ୍ରୟ ନେଇଥିବା ଲୋକମାନଙ୍କୁ ଉଦ୍ଧାର କରିଥିଲେ ।
ଏ ନେଇ ଭୁବନ ବିଡିଓ ଆଶୀର୍ବାଦ ପରିଡ଼ାଙ୍କୁ ପଚାରିବାରୁ ସମସ୍ତ ଅଞ୍ଚଳ ବୁଲି ଅନୁଧ୍ୟାନ କରୁଛୁ। ଯଥା ସମ୍ଭବ ସମାଧାନ କରାଯିବ ବୋଲି କହିଥିଲେ।