ଢେଙ୍କାନାଳ ଅଫିସ, ୩୧।୮: ଢେଙ୍କାନାଳ ଜିଲା ଗଁଦିଆ ଅଞ୍ଚଳର ମତ୍ସ୍ୟଚାଷୀଙ୍କୁ ଦୁଃଖ ଦେଇଛି ବ୍ରାହ୍ମଣୀ ବନ୍ୟା। ବଢ଼ିପାଣିରେ ଯାଆଁଳ ଭାସିଯାଇଛନ୍ତି। ସୀମିତ ସମ୍ବଳରେ ମାଛଚାଷ କରି ଦୁଇ ପଇସା ରୋଜଗାର ଆଶାରେ ଥିବା ଚାଷୀମାନେ ଏବେ ଚିନ୍ତାରେ ପଡ଼ିଛନ୍ତି।
ବ୍ଲକ ମତ୍ସ୍ୟ ବିଭାଗ ପକ୍ଷରୁ ମିଳିଥିବା ସୂଚନା ଅନୁଯାୟୀ, ମନ୍ଦାର ପଞ୍ଚାୟତ, କାଲୁରିଆ ପଞ୍ଚାୟତର କେନ୍ଦୁପଡ଼ା, କାଶୀପୁର ପଞ୍ଚାୟତର ଭାଲିଆପାଟ ଗ୍ରାମରେ ବନ୍ୟା ପାଣି ମାଡ଼ିଯିବାରୁ ମାଛଚାଷ ବ୍ୟାପକ କ୍ଷତି ହୋଇଛି। ଭାଲିଆପାଟ ଗ୍ରାମର ୨ ସ୍ବୟଂ ସହାୟକ ଗୋଷ୍ଠୀ ପୋଖରୀରେ ଯାଆଁଳ ଛାଡ଼ିଥିଲେ। ସବୁ ଯାଆଁଳ ବନ୍ୟାପାଣିରେ ଭାସିଯାଇଛି। ମନ୍ଦାର ପଞ୍ଚାୟତ ଚିତ୍ତଲପୁର ଗ୍ରାମର ମାଛଚାଷୀ ଦୁଷ୍ମନ୍ତ ମଲ୍ଲିକଙ୍କ ୫୫ କୁଇଣ୍ଟାଲ ମାଛ ବନ୍ୟା ପାଣିରେ ପଳାଇଥିବା ସେ ଅଭିଯୋଗ କରିଛନ୍ତି। କେନ୍ଦୁପଡ଼ାର ଅଗ୍ରଣୀ ମତ୍ସ୍ୟଚାଷୀ କ୍ଷୀରୋଦ ଚନ୍ଦ୍ର ସାମଲ ୨ ଏକର ଜମିରେ ପୋଖରୀ ଖୋଳି ମାଛ ଚାଷ କରିଥିଲେ। ତାଙ୍କର ୫ ପୋଖରୀରେ ପାଣି ପଶିଯିବାରୁ ୧୦ କୁଇଣ୍ଟାଲରୁ ଊର୍ଦ୍ଧ୍ୱ ଯାଆଁଳ ଏବଂ ମାଛ ଭାସି ଯାଇଛି। ସୂଚନା ପାଇ ଜିଲା ସହକାରୀ ମତ୍ସ୍ୟ ନିର୍ଦ୍ଦେଶକ ଦୀପ୍ତିରଞ୍ଜନ ମହାପାତ୍ର, ବ୍ଲକ ସହକାରୀ ମତ୍ସ୍ୟ ଅଧିକାରୀ ଶରତ କୁମାର ଜେନା ପ୍ରମୁଖ କ୍ଷେତ୍ର ପରିଦର୍ଶନ କରି କ୍ଷୟକ୍ଷତି ଆକଳନ କରିଛନ୍ତି। ଏ ସଂକ୍ରାନ୍ତରେ ବ୍ଲକ ସହକାରୀ ମତ୍ସ୍ୟ ଅଧିକାରୀ କୁହନ୍ତି, କ୍ଷତି ହୋଇଥିବା ମାଛଚାଷ ସମ୍ପର୍କରେ ଜିଲା ସହକାରୀ ମତ୍ସ୍ୟ ନିର୍ଦ୍ଦେଶକଙ୍କୁ ରିପୋର୍ଟ ପ୍ରଦାନ କରାଯାଇଛି। ସରକାରଙ୍କ ପକ୍ଷରୁ ସହାୟତା ରାଶି ମଞ୍ଜୁର ହେଲେ ଚାଷୀଙ୍କୁ ପ୍ରଦାନ କରାଯିବ।
ସରକାରୀ ସହାୟତାକୁ ଅପେକ୍ଷା
ଗୁରୁବାର ରାତିରେ ହଠାତ୍ ନଦୀ ଉଛୁଳି ପାଣି ମାଡ଼ିଆସିଲା। ୫୦ରୁ ୫୫ କୁଇଣ୍ଟାଲ ମାଛ ଭାସିଗଲେ। ଯାଅଁଳ ଏବଂ ମାଛ ମିଶି ଅତିକମ୍ରେ ୧୦ଲକ୍ଷ ଟଙ୍କା କ୍ଷତି ହୋଇଛି। ଏବେ ସରକାରୀ ସହାୟତାକୁ ଅପେକ୍ଷା।
– ଦୁଷ୍ମନ୍ତ ମଲ୍ଲିକ,
ଚିତ୍ତଲପୁର
ଅଣ୍ଟା ସଳଖିବାକୁ ସମୟ ଲାଗିବ
୧୦ ଏକର ଜାଗାରେ ମାଛ ଚାଷ କରିଥିଲି। ଆଖି ଆଗରେ ବନ୍ୟାପାଣି ସବୁକିଛି ଭସାଇନେଲା। ୨୦ରୁ ୨୫ଲକ୍ଷ ଟଙ୍କାର କ୍ଷତି ହୋଇଛି। ଅଣ୍ଟା ସଳଖିବାକୁ ସମୟ ଲାଗିବ। ମତ୍ସ୍ୟଚାଷ ପାଇଁ ସରକାରଙ୍କ ପକ୍ଷରୁ ବୀମା ସୁବିଧା ହେବା ଦରକାର ା
– କ୍ଷୀରୋଦ ସାମଲ,
କେନ୍ଦୁପଡ଼ା