ବରଗଡ଼,୧୬।୯(ପ୍ରେମାନନ୍ଦ ଖମାରୀ): ଛତିଶଗଡ଼ ଉପର ମୁଣ୍ଡରେ ପ୍ରବଳ ବର୍ଷା ଯୋଗୁ ମହାନଦୀର ଜଳପତ୍ତନ ବୃଦ୍ଧି ସାଙ୍ଗକୁ ହୀରାକୁଦ ଜଳଭଣ୍ଡାର ଜଳସ୍ତର ବୃଦ୍ଧି ପାଇଛି । ଏଭଳିସ୍ଥଳେ ହୀରାକୁଦ ଜଳଭଣ୍ଡାରର ସୀମାବର୍ତ୍ତୀ ବରଗଡ଼ ଜିଲା ଅମ୍ବାଭୋନା ବ୍ଲକ ଅନ୍ତର୍ଗତ ଚିଖିଲି ଗ୍ରାମକୁ ବନ୍ୟାଜଳ ପଶିଛି । ଗ୍ରାମର ସ୍କୁଲ ନିକଟରେ ଶନିବାର ସକାଳ ସୁଦ୍ଧା ବନ୍ୟାଜଳ ପଶି ସାରିଛି । ତେବେ ହୀରାକୁଦ ଜଳଭଣ୍ଡାରର ଅଧିକ ଗେଟ ଖୋଲା ନ ଗଲେ କିମ୍ବା ଉପରମୁଣ୍ଡରେ ଅଧିକ ବର୍ଷା ହେଲେ ଚିଖିଲି ଗ୍ରାମ ଜଳମଗ୍ନ ହେବାର ଆଶଙ୍କା ଦେଖାଯାଇଛି ।
ଅନ୍ୟପକ୍ଷରେ ଇତିମଧ୍ୟରେ ଚିଖିଲି ସମେତ ଅନ୍ତରାଡି, ବେନିଆପାଲି ଆଦି ଆଖପାଖ ଅଞ୍ଚଳର ଶହ ଶହ ହେକ୍ଟର ଚାଷଜମି ଜଳମଗ୍ନ ହୋଇ ସାରିଛି । ଫଳରେ ଧାନ, ପରିବା ଆଦି ଫସଲ ପ୍ରଭାବିତ ହୋଇଛି । ସେହିପରି କୁଶମୁଦା ବ୍ରିଜ ଉପରେ ବନ୍ୟାଜଳ ପ୍ରବାହିତ ଯୋଗୁ ଅମ୍ବାଭୋନା-ଡୁଙ୍ଗୁରି ରାସ୍ତାରେ ଯାତାୟାତ ବାଧାପ୍ରାପ୍ତ ହୋଇଛି । ଛତିଶଗଡର ସରଗୁଜା, ଗାଙ୍ଗରେଲ, ସାରାଡିହି, କଲାମ ଆଦି ବ୍ୟାରେଜରୁ ମହାନଦୀକୁ ମାତ୍ରାଧିକ ବନ୍ୟାଜଳ ନିଷ୍କାସନ ଯୋଗୁ ଏଭଳି ସ୍ଥିତି ଉପୁଜିଥିବା କୁହାଯାଉଛି ।
