ଖୋର୍ଦ୍ଧା ଅଫିସ,୧୯।୯: ହୀରାକୁଦ ଗେଟ୍ ଖୋଲିବା ପରେ ରାଜୁଆ, ମଲାଗୁଣୀ ଓ ଦୟା ନଦୀରେ ଜଳସ୍ତର ବୃଦ୍ଧି ପାଇଛି। ଏହାର ପ୍ରଭାବରେ ଖୋର୍ଦ୍ଧ ବ୍ଲକରେ ବନ୍ୟା ପରିସ୍ଥିତି ସୃଷ୍ଟି ହୋଇଛି। ଓରବରସିଂ, ନରଣଗଡ଼ ଏବଂ ବ୍ରଜମୋହନପୁର ପଞ୍ଚାୟତର ୧୫ ଗ୍ରାମବାସୀ ୫ଦିନ ହେବ ଜଳବନ୍ଦୀରେ ରହିଛନ୍ତିି। ପ୍ରାୟ ୭ହଜାର ଲୋକ ପ୍ରଭାବିତ ହୋଇଥିବା ଜଣାପଡ଼ିଛି। ଜଳସ୍ତର ବଢ଼ିିବା ସହିତ ଗ୍ରାମବାସୀଙ୍କ ଦୁର୍ଦ୍ଦଶା ମଧ୍ୟ ବଢୁଛି। ଗ୍ରାମରେ ଆଣ୍ଠୁଏ ଆଣ୍ଠୁଏ ଉଚ୍ଚର ବନ୍ୟା ଜଳ ଜମି ରହିଛି। ଶନିବାର ରାତି ସୁଦ୍ଧା ଜଳସ୍ତର ଆହୁରି ବଢିବା ଆଶଙ୍କା ରହିଛି। ଗଁା ରାସ୍ତାରେ ୫ରୁ ୬ଫୁଟ ପାଣି ପ୍ରବାହିତ ହେଉଛି। ଯାତାୟାତ ଏକପ୍ରକାର ଠପ୍ ହୋଇଯାଇଛି।
ମିଳିଥିବା ସୂଚନା ମୁତାବକ, ବନ୍ୟାଜଳ ପ୍ରଭାବରେ ଓରବରସିଂ ପଞ୍ଚାୟତର ୯ଗଁା, ନରଣଗଡ଼ର ୪ଗଁା ଓ ବ୍ରଜମୋହନପୁରର ୨ଗଁା ଜଳବନ୍ଦୀରେ ରହିଛି। ଯାତାୟାତ ପାଇଁ କୌଣସି ବ୍ୟବସ୍ଥା ନ ଥିବା ବେଳେ ଲୋକଙ୍କ ଦୁର୍ଦ୍ଦଶା ବଢ଼ିବାରେ ଲାଗିଛି। ଅନ୍ୟପଟେ ସାପ ଭୟରେ ଗ୍ରାମବାସୀ ଭୟଭୀତ ଅବସ୍ଥାରେ ରହିଛନ୍ତି। ସ୍ଥାନୀୟ ପ୍ରଶାସନ ପକ୍ଷରୁ କୌଣସି ରିଲିଫ ବ୍ୟବସ୍ଥା କରାଯାଇନାହିଁ। ଫଳରେ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଗ୍ରାମବାସୀ ଉପାସରେ ରହିଥିବା ବେଳେ ଗୋରୁଗାଈଙ୍କ ଅବସ୍ଥା ବିଗିଡ଼ଲାଣି। ତୁରନ୍ତ ଗୋଖାଦ୍ୟ ନ ପହଞ୍ଚିିଲେ, ସେମାନଙ୍କ ମୃତ୍ୟୁ ହେବ ବୋଲି ଗ୍ରାମବାସୀ ଆଶଙ୍କା କରିଛନ୍ତି। ଅନ୍ୟପଟେ ବିଦ୍ୟୁତ୍ କାଟ ଯୋଗୁ ଲୋକେ ନାହିଁ ନ ଥିବା ହଇରାଣ ହେଉଛନ୍ତି। ବନ୍ୟାଜଳରେ ଚାଲିବାରୁ ଦେହ କୁଣ୍ଡେଇ ହେବା ସହ ଅନେକଙ୍କ ପାଦ ଖାଇଲାଣି। ବ୍ଲିଚିଂ ପାଉଡର ମଧ୍ୟ ଯୋଗାଇ ଦିଆଯାଉନାହିଁ। ଅଭିଯୋଗ କଲେ ମଧ୍ୟ କେହି ଶୁଣୁନାହାନ୍ତି ବୋଲି ଗ୍ରାମବାସୀ କହିଛନ୍ତି। ବନ୍ୟାଜଳରେ ଏକର ଏକର ଚାଷଜମି ବୁଡ଼ି ରହିଛି। ଗତବର୍ଷ ଫସଲ କ୍ଷତି ହୋଇଥିଲା, ଏଯାଏ କୌଣସି କ୍ଷତିପୂରଣ ମିଳିନାହିଁ ବୋଲି କେତେଜଣ ଚାଷୀ କହିଛନ୍ତି। ହିରିମୂଳ, ଓରମି ଏବଂ ମାନପୁର ଗ୍ରାମର କେତେଜଣ ବାତ୍ୟାଶ୍ରୟସ୍ଥଳୀରେ ରହିଛନ୍ତି। ହିରିମୂଳ ଗ୍ରାମବାସୀଙ୍କ କହିବାନୁଯାୟୀ, ହିରିମୂଳରୁ ମୁଖ୍ୟ ରାସ୍ତାକୁ ସଂଯୋଗ କରୁଥିବା ଦେଢ଼ କିମି ରାସ୍ତା ନିର୍ମାଣ ହେଲେ, ବନ୍ୟା ସ୍ଥିତି ଉପୁଜିବ ନାହିଁ। ଏନେଇ ସ୍ଥାନୀୟ ପ୍ରଶାସନ ଠାରୁ ଜିଲା ପ୍ରଶାସନ ପର୍ଯ୍ୟନ୍ତ ଗୁହାରି କରାଯାଇଥିଲେ ମଧ୍ୟ କେବଳ ପ୍ରତିଶ୍ରୁତି ମିଳିଛି, କାର୍ଯ୍ୟ ହୋଇନାହିଁ। ୨୨ବର୍ଷ ପୂର୍ବେ କେତେଜଣ ଲୋକଙ୍କୁ ଇନ୍ଦିରାବାସ ମିଳିଥିଲା। ଏହା ପରଠାରୁ ଆଉ ଆବାସ ଯୋଜନାରେ କାହାକୁ ଅନ୍ତର୍ଭୁକ୍ତ କରାଯାଇନାହିଁ। ସେହିପରି ଓରମି, ମାନପୁର, ଧବଳପୁର, ରାୟପୁରର କେଜେତଣ ଗ୍ରାମବାସୀ କହିଛନ୍ତି, ୨୦ବର୍ଷରୁ ଊର୍ଦ୍ଧ୍ୱ ହେବ ଏହି ୩ ପଞ୍ଚାୟତର ୧୫ଗଁା ଏଭଳି ସ୍ଥିତି ଦେଇ ଗତି କରୁଛନ୍ତି। ନିର୍ବାଚନ ଆସିଲେ ସମସ୍ତ ଦଳ ପକ୍ଷରୁ ସ୍ଥାୟୀ ପ୍ରତିକାର ପାଇଁ ପ୍ରତିଶ୍ରୁତି ମିଳୁଛି। ମାତ୍ର ନିର୍ବାଚନ ପରେ ପଦକ୍ଷେପ ନିଆଯାଉନାହିଁ ବୋଲି ଗ୍ରାମବାସୀ କହିଛନ୍ତି। ଅନ୍ୟପକ୍ଷେ ଏ ସମ୍ପର୍କରେ ତହସିଲଦାର ପଦ୍ମଚରଣ ସାହୁ କହିଛନ୍ତି, ହିରିମୂଳ ଗ୍ରାମରେ ରନ୍ଧାଖାଦ୍ୟର ବ୍ୟବସ୍ଥା କରାଯାଇଛି। ପର୍ଯ୍ୟାୟକ୍ରମେ ସବୁଠି ରନ୍ଧ୍ୟା ଓ ଶୁଖିଲା ଖାଦ୍ୟର ବ୍ୟବସ୍ଥା କରାଯିବ। ବନ୍ୟାଘେରରେ ରହିଥିବା ଅଞ୍ଚଳରେ ସ୍ବାସ୍ଥ୍ୟ ଟିମ୍ ବୁଲି ଔଷଧ ଦେବା ଆରମ୍ଭ କରିଛନ୍ତି।