ଓ୍ବାଶିଂଟନ୍,୧୬ା୧୨:ଆଧୁନିକ ଯୁଗରେ କଳକାରଖାନା ହେଉ ଅବା ରିସର୍ଚ୍ଚ ସେଣ୍ଟର ରୋବୋର ବ୍ୟବହାର ବିଭିନ୍ନ କ୍ଷେତ୍ରରେ ବଢ଼ିବାରେ ଲାଗିଛି। ରୋବୋ ସାହାଯ୍ୟରେ କମ୍ ସମୟରେ ଓ ଅତି ସହଜରେ ଅଧିକ କାମ ହେଉଥିବାରୁ ଅନେକେ ଏହାର ବ୍ୟବହାର ଲାଗି ଆଗ୍ରହ ପ୍ରକାଶ କରୁଛନ୍ତି। ବହୁ ରେଷ୍ଟୁରାଣ୍ଟରେ ମଧ୍ୟ ଏବେ ଓ୍ବେଟର୍ଙ୍କ ଜାଗା ନେଇ ସାରିଲେଣି ରୋବୋ। ସୁସ୍ବାଦୁ ବ୍ୟଞ୍ଜନ ରାନ୍ଧିବାଠାରୁ ଆରମ୍ଭ କରି ଖାଦ୍ୟ ପରଷିବା ସବୁ କାର୍ଯ୍ୟରେ ବୈଜ୍ଞାନିକ ଜ୍ଞାନକୌଶଳରେ ତିଆରି ହେଉଥିବା ରୋବୋ ନିଜର ପାରଦର୍ଶିତା ଦେଖାଇଛି। ତେବେ ରୋବୋର କାର୍ଯ୍ୟକୁ ଆହୁରି ଫାଷ୍ଟ, ଫର୍ଓ୍ବାର୍ଡ କରିବା ସକାଶେ ଆମେରିକାସ୍ଥିତ ଭର୍ଜିନିଆ ୟୁନିଭର୍ସିଟିର ଗବେଷକମାନେ ରିସର୍ଚ୍ଚ ଆରମ୍ଭ କରିଛନ୍ତି।
ଚାଲିବା, ଦୌଡ଼ିବା ସାଙ୍ଗକୁ ରୋବୋ ଏବେ ଉଡ଼ିବ। ଭର୍ଜିନିଆ ୟୁନିଭର୍ସିଟି ଏବଂ ଭର୍ଜିନିଆ ଟେକ୍ର ଗବେଷକମାନେ ମିଳିତ ଭାବେ ଏ ଦିଗରେ କାର୍ଯ୍ୟ ଆରମ୍ଭ କରିଛନ୍ତି। ତେବେ ଉଡ଼ନ୍ତା ସାପ ଯେଉଁଭଳି ଭାବେ ଗୋଟିଏ ଗଛରୁ ଆଉ ଗୋଟିଏ ଗଛକୁ ଉଡ଼ିଥାଏ ସେଭଳି ରୋବୋ ପକ୍ଷେ କିପରି ଉଡ଼ିବା ସମ୍ଭବପର ହେବ ସେ ଦିଗରେ ଗବେଷକମାନେ ଅଧ୍ୟୟନ କରିଛନ୍ତି। ସେମାନେ ୫୦ରୁ ୮୦ ଫୁଟ ଦୂର ପର୍ଯ୍ୟନ୍ତ ଉଡ଼ୁଥିବା ସାପର ଗତିବିଧିକୁ ଲକ୍ଷ୍ୟ କରୁଛନ୍ତି। ଉଡ଼ନ୍ତା ସାପଠାରୁ ସଂଗୃହୀତ ତଥ୍ୟକୁ ଗବେଷକମାନେ ନିର୍ମାଣ କରିଥିବା କମ୍ପ୍ୟୁଟେଶନାଲ ମଡେଲ ଉପରେ ପ୍ରୟୋଗ କରୁଛନ୍ତି। ସାପ ଶରୀରରେ ଥିବ କ୍ରସ୍ ସେକ୍ସନ୍ ତାକୁ ବହୁ ଦୂର ପର୍ଯ୍ୟନ୍ତ ଉଡ଼ିବାରେ ସାହାଯ୍ୟ କରୁଛି। ଉଡ଼ିବା ସମୟରେ ସାପ କଡ଼ ମୋଡ଼ୁଥିବାବେଳେ ଶରୀରର ପଛ ଭାଗରେ ଲୋ’ ପ୍ରେସର୍ ଏବଂ ପେଟ ପାଖରେ ହାଇ ପ୍ରେସର୍ ତିଆରି ହୁଏ। ଫଳରେ ସାପ ଗୋଟିଏ ପାଖରୁ ଅନ୍ୟ ପାଖକୁ ସହଜରେ ଲମ୍ଫମାରି ଉଡ଼ିଯାଇପାରେ। ଉଡ଼ିବା ଲାଗି ସାପର ଶରୀରର ଗଠନ ପ୍ରମୁଖ ଭୂମିକା ଗ୍ରହଣ କରୁଥିବା ଗବେଷକମାନେ କହିଛନ୍ତି। ବାୟୁ ମାଧ୍ୟମରେ ସାପ ପରି ରୋବୋକୁ ବହୁ ଦୂର ପର୍ଯ୍ୟନ୍ତ ଉଡ଼ାଇବା କଷ୍ଟକର ହେବ। ଆଗାମୀ ୧୦ ବର୍ଷ ଭିତରେ ଗବେଷକମାନେ ଏ କ୍ଷେତ୍ରରେ ସଫଳତା ପାଇବା ନେଇ ଆଶା ରଖିଛନ୍ତି। ଏହାପରେ ସ୍ପାଇଡ୍ର ଓ ଅକ୍ଟୋପସ୍ ଭଳି ରୋବୋ ତିଆରି କରିବା ଲାଗି ରୋବୋ କମ୍ପାନୀଗୁଡ଼ିକ ଯୋଜନା କରିଛନ୍ତି।