ଓଟାଓ୍ବା,୧୭।୧୧: ଖଲିସ୍ତାନୀ ଆତଙ୍କବାଦୀ ହରଦୀପ ସିଂ ନିଜାରଙ୍କ ହତ୍ୟାକୁ ନେଇ କାନାଡା-ଭାରତ ସମ୍ପର୍କର ତିକ୍ତତା କମିବାର ନାଁ ଧରୁନି। ସମ୍ପ୍ରତି ବ୍ୟବସାୟ ପରିପ୍ରେକ୍ଷୀରେ ଦୁଇ ଦେଶ ମଧ୍ୟରେ ସ୍ଥିତିରେ ସୁଧାର ଆସୁଥିବାର ଦେଖାଯାଉଥିଲା। କିନ୍ତୁ କାନାଡାର ଜଣେ ବରିଷ୍ଠ ମନ୍ତ୍ରୀ ସୂଚାଇ ଦେଇଛନ୍ତି ଯେ, ବ୍ୟବସାୟ ଆଲୋଚନା ଆରମ୍ଭ କରିବା ପରିବର୍ତ୍ତେ ଖଲିସ୍ତାନୀ ନେତା ହରଦୀପ ସିଂ ନିଜାରଙ୍କ ହତ୍ୟା ଘଟଣାର ତଦନ୍ତରେ ଭାରତରୁ ସହଯୋଗ ପାଇବାକୁ ଅଧିକ ପ୍ରାଥମିକତା ଦିଆଯାଉଛି।
ଏକ ରିପୋର୍ଟ ଅନୁଯାୟୀ, ସାନ ଫ୍ରାନ୍ସିସ୍କୋରେ ଏସିଆ-ପାସିଫିକ ଅର୍ଥନୈତିକ ସହଯୋଗ ବୈଠକରେ ସାମ୍ବାଦିକମାନଙ୍କ ସହ କଥାବାର୍ତ୍ତା ବେଳେ କାନାଡାର ଅନ୍ତର୍ଜାତୀୟ ବାଣିଜ୍ୟ ଏବଂ ଅଥବୈତିକ ବିକାଶ ମନ୍ତ୍ରୀ ମେରି ଏନଜି କହିଛନ୍ତି, ନିଜାର ଘଟଣାର ଅନୁସନ୍ଧାନ ଜାରି ରଖିବା ଉପରେ କାନାଡାର ସମ୍ପୂର୍ଣ୍ଣ ଧ୍ୟାନ ଦିଆଯାଇଛି। ଅକ୍ଟୋବରରେ ମେରିଙ୍କ ନେତୃତ୍ୱରେ ଭାରତକୁ ଯାଇଥିବା ଟିମ କାନାଡା ବାଣିଜ୍ୟ ମିଶନକୁ ମଧ୍ୟ ବାତିଲ କରାଯାଇଥିଲା।
ନିଜାର ହତ୍ୟାରେ ଭାରତର ସମ୍ପୃକ୍ତି ଥିବା କାନାଡା ପ୍ରଧାନମନ୍ତ୍ରୀ ଅଭିଯୋଗ କରିଛନ୍ତି। ଏହା ପରେ ଭାରତ ଏହି ଅଭିଯୋଗକୁ ପ୍ରତ୍ୟାଖ୍ୟାନ କରି ସେମାନଙ୍କୁ ଅବୈଧ ଏବଂ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ବୋଲି କହିଛି। ଏହା ସହିତ ଉଭୟ ଦେଶ ଅନ୍ୟ ଜଣେ ଶୀର୍ଷ କୂଟନୀତିଜ୍ଞଙ୍କୁ ବହିଷ୍କାର କରିଛନ୍ତି। କାନାଡା ନାଗରିକଙ୍କ ପାଇଁ ଭାରତ ମଧ୍ୟ ଭିସା ସେବାକୁ ସାମୟିକ ଭାବେ ସ୍ଥଗିତ ରଖିଛି।
