ମୋରାଦାବାଦ୍,୩୦।୧: ରାସ୍ତାରେ ଘନ କୁହୁଡ଼ି ଯୋଗୁ ଉତ୍ତରପ୍ରଦେଶ ମୋରାଦାବାଦ୍ରେ ରାସ୍ତା ନ ଦେଖାଯିବାରୁ ଏକ ଟ୍ରକ୍ ଏବଂ ମିନି ବସ୍ ମଧ୍ୟରେ ଶନିବାର ସକାଳ ୮ଟା ୧୦ରେ ମୁହାଁମୁହିଁ ଧକ୍କା ହୋଇଛି। ଏହି ମର୍ମନ୍ତୁଦ ସଡ଼କ ଦୁର୍ଘଟଣାରେ ୧୦ ଜଣଙ୍କ ମୃତ୍ୟୁ ଘଟିଛି। ସେହିପରି ୨୫ରୁ ଅଧିକ ଲୋକ ଆହତ ହୋଇଛନ୍ତି। ଆହତଙ୍କୁ ଉଦ୍ଧାର କରାଯାଇ ଚିକିତ୍ସା ଲାଗି ହସ୍ପିଟାଲରେ ଭର୍ତ୍ତି କରାଯାଇଛି। ମୋରାଦାବାଦ୍-ଆଗ୍ରା ହାଇଓ୍ବେର କୁନ୍ଦରକି ଥାନା ଅଞ୍ଚଳର ହୁସେନପୁର ପୋଲ ନିକଟରେ ଦୁର୍ଘଟଣା ଘଟିଥିବା ପୋଲିସ ପକ୍ଷରୁ ସୂଚନା ଦିଆଯାଇଛି। ବସ୍ଟି ବିଲାରିରୁ ମୋରାଦାବାଦ୍ ଯାଉଥିଲା। ଏହାର ବିପରୀତି ଦିଗରୁ ଆସୁଥିବା ଟ୍ରକ୍ ସହିତ ବସ୍ଟି ଧକ୍କା ହୋଇଥିଲା। ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏହି ଘଟଣାରେ ଶୋକ ପ୍ରକାଶ କରିଛନ୍ତି। ମୃତକଙ୍କ ପରିବାର ସଦସ୍ୟଙ୍କ ଲାଗି ୨ ଲକ୍ଷ ଏବଂ ଆହତଙ୍କ ପରିବାରବର୍ଗଙ୍କ ପାଇଁ ୫୦ ହଜାର ଟଙ୍କାର ଅନୁକମ୍ପାମୂଳକ ସହାୟତା ସେ ଘୋଷଣା କରିଛନ୍ତି।
