ବେଙ୍ଗାଲୁରୁ,୭।୪(ପି.ଟି.): ମସ୍ଜିଦରେ ଡାକବାଜି ଯନ୍ତ୍ରର ଉତ୍କଟ ଶବ୍ଦକୁ ବିରୋଧ କରି କେତେକ ହିନ୍ଦୁ ସଂଗଠନ ଏହାକୁ ବନ୍ଦ କରିବା ଲାଗି ଦାବି କରିଥିଲେ। ଅନୁମୋଦିତ ଡେସିବେଲ୍ ସ୍ତରରେ ଡାକବାଜି ଯନ୍ତ୍ରର ଶବ୍ଦକୁ ସୀମିତ ରଖିବା ଲାଗି କର୍ନାଟକର ମସ୍ଜିଦଗୁଡ଼ିକୁ ପୋଲିସ ନୋଟିସ ପଠାଇଛି।
ମସ୍ଜିଦଗୁଡ଼ିକରୁ ଅତି ଉଚ୍ଚ ଶବ୍ଦରେ ଆଜାନ ପଢ଼ାଯାଉଥିବାରୁ ଆଖପାଖ ଅଞ୍ଚଳରେ ବସବାସ କରୁଥିବା ଲୋକେ ଅତିଷ୍ଠ ହୋଇପଡ଼ିଲେଣି। କେତେକ ମସ୍ଜିଦ ନିକଟରେ ହସ୍ପିଟାଲ, ଶିକ୍ଷାନୁଷ୍ଠାନ ଓ ଗୁରୁତ୍ୱପୂର୍ଣ୍ଣ ସରକାରୀ କାର୍ଯ୍ୟାଳୟ ମଧ୍ୟ ରହିଛି। ଡାକବାଜି ଯନ୍ତ୍ର ବନ୍ଦ କରିବା ଲାଗି କେତେକ ହିନ୍ଦୁ ସଂଗଠନ ପକ୍ଷରୁ ଅଭିଯାନ ଆରମ୍ଭ ହୋଇଥିଲା। କେବଳ ବେଙ୍ଗାଲୁରୁରେ ପ୍ରାୟ ୨୫୦ ମସ୍ଜିଦ ରହିଛି। ନୋଟିସ ପାଇବା ପରେ ମସ୍ଜିଦ କର୍ତ୍ତୃପକ୍ଷ ଶବ୍ଦକୁ ନିର୍ଦ୍ଦିଷ୍ଟ ସ୍ତର ମଧ୍ୟରେ ସୀମିତ ରଖିବା ଲାଗି ଉପକରଣ ଲଗାଇବା ଆରମ୍ଭ କରିଛନ୍ତି। ଧର୍ମୀୟ ସଂଗଠନ, ପବ୍, ନାଇଟ୍ କ୍ଲବ ଓ ଅନ୍ୟ ଅନୁଷ୍ଠାନ ତଥା ବିଭିନ୍ନ ଉତ୍ସବରେ ଶବ୍ଦ ପ୍ରଦୂଷଣ ନିୟମ ପାଳନ ହେଉଛି କି ନାହିଁ ତାହା ଯାଞ୍ଚ କରିବା ଲାଗି କର୍ନାଟକ ପୋଲିସ ମହାନିର୍ଦ୍ଦେଶକ ପ୍ରବୀଣ ସୁଦ୍ ସମସ୍ତ ପୋଲିସ କମିଶନର, ଆଇଜି ଓ ଏସ୍ପିମାନଙ୍କୁ ନିର୍ଦ୍ଦେଶ ଦେଇଛନ୍ତି। ମସ୍ଜିଦରେ ଡାକବାଜି ଯନ୍ତ୍ରର ଅପବ୍ୟବହାର ରୋକିବା ଲାଗି ମଙ୍ଗଳବାର ବିଭିନ୍ନ ଥାନାକୁ ସ୍ମାରକପତ୍ର ଦିଆଯାଇଥିଲା। ଡିଜିପିଙ୍କ ନିର୍ଦ୍ଦେଶ ପରେ ବେଙ୍ଗାଲୁରୁ ପୋଲିସ ବିଭିନ୍ନ ମସ୍ଜିଦକୁ ନୋଟିସ ଜାରି କରିଛି। ଡାକବାଜି ଯନ୍ତ୍ର ଶବ୍ଦକୁ ନିୟନ୍ତ୍ରଣ କରିବା ଲାଗି ଉପକରଣ ଲଗାଯାଉଛି ବୋଲି ବେଙ୍ଗାଲୁରୁ ଜାମା ମସ୍ଜିଦର ଖାତିମ୍-ଓ-ଇମାମ ମକ୍ସୁଦ୍ ଇମ୍ରାନ୍ କହିଛନ୍ତି।