କେନ୍ଦୁଝର,୧୮।୫(ସ୍ବ.ପ୍ର.)-କରୋନା ମହାମାରୀ ଧିରେ ଧିରେ ସହରଠାରୁ ଗ୍ରାମାଞ୍ଚଳକୁ ବ୍ୟାପିବାରେ ଲାଗିଛି। ଫଳରେ ସଂକ୍ରମଣକୁ ନେଇ ଲୋକଙ୍କ ମଧ୍ୟରେ ଭୟ ସୃଷ୍ଟି ହେଉଛି। ଲୋକେ ପଦାକୁ ବାହାରିବା ଉପରେ କଟକଣା ଲାଗୁ କରାଯାଇଛି। ଏଭଳି ସମୟରେ କେନ୍ଦୁଝର ସହରର କେତେଜଣ ଯୁବକ କରୋନା ସଂକ୍ରମିତ ପରିବାରକୁ ସହାୟତାର ହାତ ବଢ଼ାଇଛନ୍ତି। ଯେଉଁ ପରିବାରରେ ଅଧିକ ସଂଖ୍ୟକ ସଦସ୍ୟ ସଂକ୍ରମିତ ହୋଇଥିବାରୁ ଘରେ ରୋଷେଇ କରିପାରୁ ନାହାନ୍ତି କିମ୍ବା ବାହାରକୁ ଖାଦ୍ୟ ସାମଗ୍ରୀ ଆଣିବା ପାଇଁ ଯାଇ ପାରୁନାହାନ୍ତି, ସେହି ପରିବାରର ଲୋକଙ୍କୁ ଖାଇବା ଯୋଗାଇବା ଲାଗି ଅଣ୍ଟା ଭିଡ଼ିଛନ୍ତି ଏମାନେ। ସଂକ୍ରମଣର ଭୟକୁ ଭ୍ରୁକ୍ଷେପ ନ କରି କୋଭିଡ୍ ନିୟମ ମାନି ସମସ୍ତ ସତର୍କତା ପଦକ୍ଷେପ ଗ୍ରହଣ କରି ସେମାନଙ୍କ ଘରକୁ ଯାଇ ଖାଦ୍ୟ ପହଞ୍ଚାଉଛନ୍ତି। ଏଥିପାଇଁ ଯୁବକମାନେ ଫୋନ ନମ୍ବର ପ୍ରଚାର କରି କାହାରି ଏଭଳି ଆବଶ୍ୟକତା ଥିଲେ ଉକ୍ତ ନମ୍ବରରେ ଜଣାଇବାକୁ ନିବେଦନ କରିଛନ୍ତି।
ସୋମବାର ପ୍ରଥମ ଦିନରେ ପ୍ରାୟ ୭ ପରିବାରଠାରୁ ଫୋନ୍ କଲ୍ ଆସିଥିଲା। ସେମାନଙ୍କ ଘରକୁ ପ୍ରାୟ ୨୭ ଜଣଙ୍କ ପାଇଁ ଖାଦ୍ୟ ପହଞ୍ଚାଯାଇଛି। ସେହିପରି ବାଟରେ ଅନ୍ୟ ଅଭାବୀ ଲୋକଙ୍କୁ ମଧ୍ୟ ଖାଦ୍ୟ ଦିଆଯାଇଥିଲା। ଆଗାମୀ ଦିନରେ ଏହି ସଂଖ୍ୟା ବଢ଼ିବ ବୋଲି ଆଶା ରଖି ପ୍ରସ୍ତୁତ ରହିଛନ୍ତି। ଏବେ ୧୦ ଜଣ ସ୍ବେଚ୍ଛାସେବୀ କାମ କରୁଛନ୍ତି। ନିଜ ଖର୍ଚ୍ଚରେ ଗୋଟିଏ ସ୍ଥାନରେ ରୋଷେଇ କରି ଭଲ ଭାବେ ପ୍ୟାକିଂ କରି ଗାଡ଼ିରେ ବୁଲି ସଂକ୍ରମିତଙ୍କ ଘରେ ନେଇ ପହଞ୍ଚାଉଛନ୍ତି। ଏହାକୁ ଦେଖି ଅନେକ ଲୋକ ସହାୟତାର ହାତ ବଢ଼ାଇ ଗ୍ରୁପ୍ରେ ଯୋଡ଼ି ହେବାକୁ ଆଗେଇ ଆସୁଛନ୍ତି। ଏଭଳି କାମ କରି ଖୁସି ଲାଗୁଥିବା କହିଛନ୍ତି ଗ୍ରୁପର ସଦସ୍ୟ ତଥା ଶିକ୍ଷକ ବିଜୟ ବେହେରା। ରାତ୍ରିଭୋଜନ ମଧ୍ୟ ଦେବା ଲାଗି ବ୍ୟବସ୍ଥା କରୁଛନ୍ତି। ଖାଦ୍ୟ ଯେପରି ବଳକା ନ ରହେ ବା ନଷ୍ଟ ନ ହୁଏ ସେଥିପାଇଁ ପୂର୍ବରୁ ସୂଚିତ କରିବାକୁ ନିବେଦନ କରାଯାଇଛି। ବଳକା ରହିଲେ ସେସବୁ ରାସ୍ତାରେ ବୁଲୁଥିବା ଗୋରୁ, କୁକୁରଙ୍କୁ ଦେବା ପାଇଁ ନିଷ୍ପତ୍ତି ନେଇଛନ୍ତି ବୋଲି ଅନ୍ୟ ଜଣେ ସ୍ବେଚ୍ଛାସେବୀ ତଥା ବ୍ୟବସାୟୀ ମାନସ ପଣ୍ଡା କହିଛନ୍ତି।