ଭୁବନେଶ୍ୱର,୮ା୨(ବ୍ୟୁରୋ): କେନ୍ଦ୍ର ସରକାରଙ୍କ ଉପରେ ପ୍ରାୟ ୧୪,୨୪୯.୦୭ କୋଟି ଟଙ୍କା ଫୁଡ୍ ସବ୍ସିଡି ବାବଦ ଅର୍ଥ ବକେୟା ପଡ଼ିରହିଛି। ସେଥିରୁ ୨୦୨୨-୨୩ ଆର୍ଥିକ ବର୍ଷର ତୃତୀୟ ୩ ମାସର ବକେୟା ୫,୨୭.୩୬ କୋଟି ଟଙ୍କା ବକେୟା ରହିଥିବା ବେଳେ ଚତୁର୍ଥ ତ୍ରୈମାସିକ ଆଡ୍ଭାନ୍ସ ସବ୍ସିଡି ବାବଦରେ ୧୪୬୯.୭୮ କୋଟି ଟଙ୍କା ବକେୟା ପଡ଼ିରହିଛି। ତୁରନ୍ତ ବକେୟା ଅର୍ଥ ପ୍ରଦାନ କରିବାକୁ ରାଜ୍ୟ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ ଅତନୁ ସବ୍ୟସାଚୀ ନାୟକ ମଙ୍ଗଳବାର କେନ୍ଦ୍ର ଖାଉଟି ବ୍ୟାପାର, ଖାଦ୍ୟ ଓ ସାଧାରଣ ବଣ୍ଟନ ମନ୍ତ୍ରୀ ପୀୟୂଷ ଗୋଏଲଙ୍କୁ ଚିଠି ଲେଖିଛନ୍ତି।
ମନ୍ତ୍ରୀ ଚିଠିରେ ଉଲ୍ଲେଖ କରିଛନ୍ତି, ଓଡ଼ିଶା ଯୋଗାଣ ନିଗମ ସର୍ବନିମ୍ନ ସହାୟକ ମୂଲ୍ୟ(ଏମ୍ଏସ୍ପି)ରେ ଚାଷୀଙ୍କଠାରୁ ଧାନ କିଣିବା ଏବଂ ଜାତୀୟ ଖାଦ୍ୟ ସୁରକ୍ଷା ଯୋଜନା ଓ ଅନ୍ୟାନ୍ୟ ଜନକଲ୍ୟାଣ ଯୋଜନା ପାଇଁ ଖାଦ୍ୟଶସ୍ୟ ଯୋଗାଇ ଦେଉଛି। ଭାରତ ସରକାରଙ୍କ ଅନୁମୋଦିତ ଖାଦ୍ୟଶସ୍ୟ ସଂଗ୍ରହକାରୀ ସଂସ୍ଥା ଉପରେ କୌଣସି ଆର୍ଥିକ ବୋଝ ରହିବ ନାହିଁ ବୋଲି ବୁଝାମଣାପତ୍ରରେ ବ୍ୟବସ୍ଥା ରହିଛି। ପ୍ରତି ତ୍ରୈମାସିକର ପ୍ରଥମ ମାସରେ ୯୦ ପ୍ରତିଶତ ସବ୍ସିଡି ଅର୍ଥ ଆଗୁଆ ଆସିବା କଥା। ପ୍ରତି ୩ ମାସରେ ସବ୍ସିଡି ଅର୍ଥ ରାଜ୍ୟ ସରକାରଙ୍କୁ ପ୍ରଦାନ କରାଯାଇ ଆଡ୍ଭାନ୍ସ ଅର୍ଥରୁ ତାହାକୁ ହ୍ରାସ କରାଯାଇଥାଏ। ତେବେ ଓଡ଼ିଶାକୁ ଦିଆଯାଉଥିବା ଆଡ୍ଭାନ୍ସ ଓ ସବ୍ସିଡି ଅର୍ଥ ପ୍ରଦାନରେ ଅହେତୁକ ବିଳମ୍ବ କରାଯାଉଛି। ଏଠାରେ ସୂଚନାଯୋଗ୍ୟ, ୨୦୨୧ ଜୁଲାଇ ୧୬ ତାରିଖରେ କେନ୍ଦ୍ର ସରକାର ଚାଉଳ ଷ୍ଟକ୍ ତଦାରଖ କରିବାକୁ ଷ୍ଟାଣ୍ଡିଂ ଅପରେଟିଂ ପ୍ରୋସିଜିଓର(ଏସ୍ଓପି) କାର୍ଯ୍ୟକାରୀ କରିଛନ୍ତି। ଏହା ଦ୍ୱାରା ୬ ସପ୍ତାହ ମଧ୍ୟରେ ଯୁଗ୍ମ ଟିମ୍ ଷ୍ଟକ୍ ଯାଞ୍ଚ କରିବା ପରେ ମିଲରମାନଙ୍କୁ ଷ୍ଟକ୍ ରିପ୍ଲେସମେଣ୍ଟ ସାର୍ଟିଫିକେଟ ପ୍ରଦାନ କରିବା ବ୍ୟବସ୍ଥା ରହିଛି। ତେବେ ଏହି କାର୍ଯ୍ୟ ଡିଏଫ୍ପିଡି ଅଧିକାରୀଙ୍କ ଅବହେଳା ଯୋଗୁ ଅଯଥା ବିଳମ୍ବ ହେଉଛି। ଡିଏଫ୍ପିଡି ଅଧିକାରୀଙ୍କ ଦ୍ୱାରା ତଦାରଖ ବିଳମ୍ବକୁ ନିର୍ଦ୍ଧାରିତ ସମୟରେ ଶେଷ କରିବାକୁ ଅତନୁ କେନ୍ଦ୍ରମନ୍ତ୍ରୀଙ୍କ ହସ୍ତକ୍ଷେପ ଲୋଡ଼ିଛନ୍ତି। ଏଥିସହିତ ସବ୍ସିଡି ବାବଦ ବକେୟା ପଡ଼ିରହୁଥିବାରୁ ଯୋଗାଣ ନିଗମ ଉପରେ ଆର୍ଥିକ ଭାର ବଢ଼ି ଚାଲିଛି। ବକେୟା ରାଶି ତୁରନ୍ତ ପଇଠ କରିବାକୁ ଅତନୁ କେନ୍ଦ୍ରମନ୍ତ୍ରୀଙ୍କ ନିକଟରେ ଦାବି କରିଛନ୍ତି।