ଭୁବନେଶ୍ୱର,୬ା୧୨(ବ୍ୟୁରୋ): ଚାଷୀଙ୍କୁ ଦିଆଯାଉଥିବା ଟୋକନ ଏବଂ ଧାନକିଣାରେ ଅନିୟମିତତା ହେଉଥିବା ନେଇ କେତେକ ସଂଗଠନ ଚାଷୀଙ୍କ ନାମରେ ନିଜର ନ୍ୟସ୍ତ ସ୍ବାର୍ଥ ପାଇଁ ଆନ୍ଦୋଳନ କରୁଛନ୍ତି ବୋଲି ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ କହିଛନ୍ତି। ଗଣମାଧ୍ୟମକୁ ସୂଚନା ଦେଇ ମନ୍ତ୍ରୀ କହିଛନ୍ତି, ଧାନକିଣାରେ ସ୍ବଚ୍ଛତା ଆଣିବା ସକାଶେ ପ୍ରତ୍ୟେକ ଜିଲାପାଇଁ ଜଣେ ଲେଖାଏ ବରିଷ୍ଠ ଅଧିକାରୀଙ୍କୁ ନିଯୁକ୍ତି ଦିଆଯାଇଛି। ଯଦି କୌଣସି ଚାଷୀଙ୍କର ସମସ୍ୟା ଥିବ ତେବେ ସେହି ଅଧିକାରୀମାନେ ତାହାର ସମାଧାନ କରିବେ। ଯଦି କୌଣସି ସ୍ଥାନରେ ଅନିୟମିତତା ହେଉଛି ତେବେ ସମ୍ପୃକ୍ତ ଅଧିକାରୀଙ୍କୁ ଜଣାଇବାକୁ ମନ୍ତ୍ରୀ କୃଷକ ସଂଗଠନ ନେତାମାନଙ୍କୁ ଅନୁରୋଧ କରିଛନ୍ତି। ରାଜ୍ୟ ସରକାର ଜଳସେଚିତ ଜମି ପାଇଁ ୧୯ କୁଇଣ୍ଟାଲ ଓ ଅଣ ଜଳସେଚିତ ଜମି ପାଇଁ ପାଇଁ ୧୨ କୁଇଣ୍ଟାଲ ଧାର୍ଯ୍ୟ କରାଯାଇଛି। ଧାନ କିଣା ନେଇ ଜିଲାସ୍ତରୀୟ କମିଟି ନିଷ୍ପତ୍ତି ନେଇ ପାରିବେ। ବର୍ତ୍ତମାନ ସୁଧା ୧୬ ଜିଲାରେ ୫୬ ପ୍ରତିଶତ ଧାନ କିଣା ହୋଇଛି ବୋଲି ମନ୍ତ୍ରୀ କହିଛନ୍ତି। ଯେଉଁ ଚାଷୀମାନେ ଧାନ ବିକ୍ରି କରିବା ପାଇଁ ଅନ୍ଲାଇନ୍ ଟୋକନ ପାଇ ନାହାନ୍ତି ସେମାନଙ୍କ ଜମି, ବ୍ୟାଙ୍କ ଆକାଉଣ୍ଟ ଏବଂ ଆଧାର କାର୍ଡ ଯାଞ୍ଚ କରି ଟୋକନ ଯୋଗାଇ ଦିଆଯିବ। ଏ ନେଇ ଜିଲାପାଳଙ୍କୁ ନିଦ୍ଦେର୍’ଶ ଦିଆଯାଇଛି। ଯାଞ୍ଚ ଶେଷ ହେବାର ୨୪ ଘଣ୍ଟା ମଧ୍ୟରେ ଚାଷୀଙ୍କୁ ଟୋକନ ମିଳିବ ବୋଲି ସେ କହିଛନ୍ତି। ଧାନ କିଣା ସମ୍ପର୍କରେ ସୂଚନା ଦେଇ ମନ୍ତ୍ରୀ କହିଛନ୍ତି, ଡିସେମ୍ବର ୫ ମଧ୍ୟରେ ୧୬ ଜିଲାରୁ ୭୧, ୭୪୪ ଚାଷୀଙ୍କ ଠାରୁ ୪ ଲକ୍ଷ ୬୮ ହଜାର ୧୧୦ ମେଟିକ ଟନ ଧାନ କିଣାଯାଇଛି। ଏବାବଦରେ ଚାଷୀଙ୍କ ଆକାଉଣ୍ଟକୁ ୫୭୦ କୋଟି ଟଙ୍କା ପ୍ରଦାନ କରାଯାଇଛି। ବାକି ଥିବା ୧୪ ଜିଲାରେ ଜିଲାସ୍ତରୀୟ ଧାନ କିଣା କମିଟି ବୈଠକ ପରେ ଧାନ ସଂଗ୍ରଂହ ଆରମ୍ଭ ହେବ । ବରଗଡ ଜିଲାରୁ ସର୍ବାଧିକ ୨,୩୨,୮୩୪ ମେଟ୍ରିକ୍ଟନ୍ ଧାନ ସଂଗ୍ରହ କରାଯାଇଥିବା ବେଳେ ସମ୍ବଲପୁର ୭୨,୮୧୩, କଳାହାଣ୍ଡି ୫୯,୧୪୭, ସୋନପୁର ୩୨,୮୦୫, ବଲାଙ୍ଗୀର ୨୧୦୦୦, ନୂଆପଡା ୧୯,୧୦୦ ଏବଂ କୋରାପୁଟରୁ ୧୩୩,୭୦୦ ମେଟ୍ରିକ ଟନ ଧାନ କ୍ରୟ କରାଯାଇଥିବା ମନ୍ତ୍ରୀ ସୂଚନା ଦେଇଛନ୍ତି।
